ଖଲିସ୍ତାନୀ ଆତଙ୍କବାଦୀ ପ୍ରସଙ୍ଗ: ଆମେରିକା, କାନାଡ଼ାକୁ ଜବାବ ମାଗିବା ସମୟ ଆସିଛି

ନୂଆଦିଲ୍ଲୀ: ଫେଡେରାଲ ବ୍ୟୁରୋ ଅଫ୍ ଇନଭେଷ୍ଟିଗେସନ (ଏଫ୍‌ବିଆଇ)ର ନିର୍ଦ୍ଦେଶକ ଖ୍ରୀଷ୍ଟଫର ୱାରେ ଆସନ୍ତା ସପ୍ତାହରେ ଭାରତ ଗସ୍ତରେ ଆସିବାର ସମ୍ଭାବନା ରହିଛି। ଖଲିସ୍ତାନୀ ଆତଙ୍କବାଦୀ ତଥା ଆମେରିକୀୟ ନାଗରିକ ଗୁରପତୱନ୍ତ ସିଂହ ପନ୍ନୁର ହତ୍ୟା ଉଦ୍ୟମକୁ ନେଇ ବିବାଦ ଲାଗି ରହିଥିବା ବେଳେ ଆମେରିକା ସରକାର ଜଣେ ଭାରତୀୟ ନାଗରିକ ଏବଂ ଜଣେ ଭାରତୀୟ ଏଜେନ୍ସି ଅଧିକାରୀଙ୍କ ବିରୋଧରେ ଅଭିଯୋଗ ଆଣିଛନ୍ତି। ଏହାପରେ ପନ୍ନୁ ଧମକ ଦେଇଥିଲା ଯେ ସେ ଏହି ଷଡ଼ଯନ୍ତ୍ରକୁ ନେଇ ଡିସେମ୍ବର ୧୩ କିମ୍ବା ତା’ ପୂର୍ବରୁ ଭାରତୀୟ ସଂସଦ ଉପରେ ଆକ୍ରମଣ କରିବ।
ଭୂ-ରାଜନୈତିକ ବିଶେଷଜ୍ଞମାନେ କହିଛନ୍ତି ଯେ ସେମାନଙ୍କ ସରକାର କାହିଁକି କିଛି ପ୍ରମୁଖ ଖଲିସ୍ତାନୀ ତତ୍ତ୍ୱଙ୍କୁ ସୁରକ୍ଷା ଦେଉଛନ୍ତି ତାହାର ତଦନ୍ତ କରିବା ପାଇଁ ନୂଆଦିଲ୍ଲୀ ଆମେରିକା ଓ କାନାଡା ଉପରେ ଚାପ ବଢ଼ାଇବା ଉଚିତ। ଇଣ୍ଡିଆ ଟୁଡେ ଟିଭିର ଏକ ପ୍ୟାନେଲ ଆଲୋଚନାରେ ବିଶେଷଜ୍ଞମାନେ କହିଛନ୍ତି ଯେ ନୂଆଦିଲ୍ଲୀର ଚିନ୍ତା ଦୂର ନ ହେବା ପର୍ଯ୍ୟନ୍ତ ଆମେରିକା ଓ ଭାରତ ମଧ୍ୟରେ ପ୍ରକୃତ ଆତଙ୍କବାଦ ବିରୋଧୀ ସହଯୋଗ ହୋଇପାରିବ ନାହିଁ।

ଜାତୀୟ ନିରାପତ୍ତା ପରାମର୍ଶଦାତା ବୋର୍ଡର ପୂର୍ବତନ ସଦସ୍ୟ ବ୍ରହ୍ମା ଚେଲାନି ଭାରତୀୟ ଦୂତାବାସ ଉପରେ ଆକ୍ରମଣ, ଗାୟକ ସିଦ୍ଧୁ ମୁସେୱାଲାଙ୍କ ମୃତ୍ୟୁ ସହ ଲିଙ୍କ୍ ଏବଂ ପନ୍ନୁ ଦ୍ୱାରା ଜାରି ଏକାଧିକ ଧମକ ସମେତ ଖଲିସ୍ତାନୀ ତତ୍ତ୍ୱମାନଙ୍କ ଦ୍ୱାରା କରାଯାଇଥିବା ବିଭିନ୍ନ ଆକ୍ରମଣକୁ ତାଲିକାଭୁକ୍ତ କରିଛନ୍ତି। ଆମେରିକା ସରକାର କାହିଁକି ଆମେରିକା ମାଟିରୁ ଏଭଳି ତତ୍ତ୍ୱମାନଙ୍କୁ କାର୍ଯ୍ୟ କରିବାକୁ ଅନୁମତି ଦେଉଛନ୍ତି ସେ ନେଇ ଭାରତ ଜବାବ ମାଗିବାର ସମୟ ଆସିଛି ବୋଲି ସେ କହିଛନ୍ତି। ଚେଲାନି କହିଛନ୍ତି ଯେ ବଡ଼ ପ୍ରସଙ୍ଗ ହେଉଛି ଆମେରିକା ଭାରତ ସହ ଭାଗୀଦାରି କରି ଭାରତ-ପ୍ରଶାନ୍ତ ଅଞ୍ଚଳରେ କିପରି ରଣନୈତିକ ଫାଇଦା ହାସଲ କରିପାରିବ ତାହା ଉପରେ ଧ୍ୟାନ ଦେଉଛି କିନ୍ତୁ ଭାରତର ନିରାପତ୍ତାକୁ ସୁଦୃଢ଼ କରିବାରେ ଏହା କିପରି ଯୋଗଦାନ ଦେଇପାରିବ ତାହା ଉପରେ ନୁହେଁ। ନୂଆଦିଲ୍ଲୀର ଚିନ୍ତାଗୁଡ଼ିକର ସମାଧାନ ନ ହେବା ପର୍ଯ୍ୟନ୍ତ ପ୍ରକୃତ ଆତଙ୍କବାଦ ବିରୋଧୀ ସହଯୋଗ ହୋଇପାରିବ ନାହିଁ।

କାନାଡାର ଜଣେ ସାମ୍ବାଦିକ ଟେରି ମିଲ୍ୟୁସ୍କି କହିଛନ୍ତି ଯେ ଏଫ୍‌ବିଆଇ ନିର୍ଦ୍ଦେଶକଙ୍କ ସହ ଆଲୋଚନା ‘ବଧିରଙ୍କ ସହ ଆଲୋଚନା’ ହୋଇପାରେ କାରଣ ସେ ଭାରତର ଚିନ୍ତା ଦୂର କରିବାକୁ ଅନିଚ୍ଛା ପ୍ରକାଶ କରିବେ ଏବଂ ଏହା ବଦଳରେ ଆମେରିକୀୟ ମାଟିରେ ପନ୍ନୁ ହତ୍ୟା ଷଡ଼ଯନ୍ତ୍ର ଉପରେ ଗୁରୁତ୍ବ ଦେବେ। ଆମେରିକା ଓ କାନାଡା ଭାରତ ସହ ରଣନୈତିକ ଅଂଶୀଦାର ବୋଲି ଦାବି କରୁଛନ୍ତି କିନ୍ତୁ ଖଲିସ୍ତାନୀ ଧମକକୁ ଦମନ କରିବା କ୍ଷେତ୍ରରେ ‘ବେଖାତିର ମନୋଭାବ’ ପୋଷଣ କରୁଛନ୍ତି। ଜଣେ ଲେଖକ ତାରା କର୍ଥା କହିଛନ୍ତି ଯେ ଯଦି ଏଫ୍‌ବିଆଇ ମୁଖ୍ୟ ଖଲିସ୍ତାନୀ ପ୍ରସଙ୍ଗରେ ଆଲୋଚନା କରିବାକୁ ମନା କରନ୍ତି, ତେବେ ଏହା ବ୍ୟୁରୋର କାର୍ଯ୍ୟଧାରାର ବିପରୀତ ହେବ, କାରଣ ଆମେରିକାରେ ଆତଙ୍କବାଦୀ ସେଲ୍ ଏବଂ କାର୍ଯ୍ୟକଳାପକୁ ନିପାତ କରିବା ପାଇଁ ବ୍ୟୁରୋ ଏହାର ସହଯୋଗୀମାନଙ୍କ ସହ ଘନିଷ୍ଠ ଭାବରେ କାର୍ଯ୍ୟ କରେ। ପନ୍ନୁ ଦ୍ବାରା ଆମେରିକାରେ ପ୍ରତିଷ୍ଠିତ ଖଲିସ୍ତାନୀ ସଂଗଠନ ଶିଖ୍ ଫର୍ ଜଷ୍ଟିସ୍ (ଏସ୍‌ଏଫ୍‌ଜେ) ବ୍ରିଟେନ୍ ଓ ପାକିସ୍ତାନ ସମେତ ଅନେକ ଦେଶରେ କାର୍ଯ୍ୟ କରୁଛି ଏବଂ ଏହା ଅନେକ ଆତଙ୍କବାଦୀ କାର୍ଯ୍ୟକଳାପରେ ସଂପୃକ୍ତ ରହିଛି ବୋଲି ସେ ଯୁକ୍ତି ବାଢ଼ିଥିଲେ।

ଖଲିସ୍ତାନୀ ତତ୍ତ୍ୱଙ୍କ ବିରୋଧରେ କାର୍ଯ୍ୟାନୁଷ୍ଠାନ ପାଇଁ ଅଦାଲତରେ ଉପସ୍ଥାପିତ ହୋଇପାରୁଥିବା ପ୍ରମାଣ ସମ୍ପର୍କରେ ପଚରାଯିବାରୁ ପଞ୍ଜାବ ପୁଲିସର ପୂର୍ବତନ ମହାନିର୍ଦ୍ଦେଶକ ଶଶିକାନ୍ତ କହିଛନ୍ତି ଯେ ଭାରତ କାନାଡା ଓ ଆମେରିକାକୁ ୨୬ଟି ଚିଠି ପଠାଇ ସେମାନଙ୍କ ମାଟିରେ ଆତଙ୍କବାଦୀ କାର୍ଯ୍ୟକଳାପର ପ୍ରମାଣ ପ୍ରଦାନ କରିଛି। କିନ୍ତୁ ଆମେରିକା ଓ କାନାଡା ସରକାର କୌଣସି ପଦକ୍ଷେପ ନେଉନାହାନ୍ତି। ଦ୍ୱିପାକ୍ଷିକ ସମ୍ପର୍କ ଏକତରଫା ହୋଇପାରିବ ନାହିଁ ଏବଂ ଭାରତ ଏହି ନିର୍ଦ୍ଦିଷ୍ଟ ପ୍ରସଙ୍ଗ ଉଠାଇବାର ସମୟ ଆସିଛି। ସମ୍ଭାବ୍ୟ ବିପଦ ବିଷୟରେ ଭାରତର ଚେତାବନୀକୁ କାନାଡା ଐତିହାସିକ ଭାବେ ଅଣଦେଖା କରୁଛି ବୋଲି ଟେରି ମିଲ୍ୟୁସ୍କି ଅଭିଯୋଗ କରିଛନ୍ତି। ସେ ଆହୁରି ମଧ୍ୟ କହିଛନ୍ତି ଯେ ୧୯୮୫ରେ ଏୟାର ଇଣ୍ଡିଆ ବିମାନ ବୋମା ବିସ୍ଫୋରଣରେ ୩୨୯ ଜଣଙ୍କ ମୃତ୍ୟୁ ହେବା ପୂର୍ବରୁ କାନାଡା କର୍ତ୍ତୃପକ୍ଷଙ୍କୁ ତିନି ସପ୍ତାହ ପୂର୍ବରୁ ଆକ୍ରମଣ ବିଷୟରେ ଚେତାବନୀ ଦିଆଯାଇଥିଲା। ଏୟାର ଇଣ୍ଡିଆ ପକ୍ଷରୁ କାନାଡା, ବିଶେଷ କରି ଟରୋଣ୍ଟୋ ଏୟାରପୋର୍ଟ ଏବଂ ରୟାଲ କାନାଡିଆନ ମାଉଣ୍ଟେଡ ପୁଲିସ (ଆର୍‌ସିଏମ୍‌ପି)କୁ ସ୍ପଷ୍ଟ ଚେତାବନୀ ଦିଆଯାଇଥିଲା। କିନ୍ତୁ ସେମାନେ ଏହି ଚେତାବନୀକୁ ଅଣଦେଖା କରି ସୁରକ୍ଷା ଏଜେନ୍ସିକୁ ସୂଚନା ଦେଇ ନ ଥିଲେ।