ଖରିଫ ଫସଲ ସହାୟକ ମୂଲ୍ୟ ବଢ଼ିଲା: ସାଧାରଣ ଧାନର ଏମ୍‌ଏସ୍‌ପି ୨୩୦୦ ଟଙ୍କା

ଗ୍ରେଡ୍‌ ଏ ଧାନର ଏମ୍ଏସ୍‌ପି ୨୩୨୦ ଟଙ୍କା

ଭୁବନେଶ୍ବର/ନୂଆଦିଲ୍ଲୀ: କେନ୍ଦ୍ର ସରକାର ଧାନ ସମେତ ୧୪ ପ୍ରକାର ଖରିଫ ଫସଲର ସର୍ବନିମ୍ନ ସହାୟକ ମୂଲ୍ୟ (ଏମ୍ଏସ୍‌ପି) ବୃଦ୍ଧି କରିଛନ୍ତି। ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଅଧ୍ୟକ୍ଷତାରେ ଅନୁଷ୍ଠିତ କ୍ୟାବିନେଟ୍ କମିଟି ବୈଠକରେ ଏହି ନିଷ୍ପତ୍ତି ନିଆଯାଇଛି। ସାଧାରଣ ଧାନର ଏମ୍‌ଏସ୍‌ପି କ୍ବିଣ୍ଟାଲ ପିଛା ୧୧୭ ଟଙ୍କା ବୃଦ୍ଧି ପାଇ ୨୩୦୦ ଟଙ୍କା ହୋଇଥିବା ବେଳେ ଗ୍ରେଡ୍‌ ଏ ଧାନର ଏମ୍ଏସ୍‌ପି ୨୩୨୦ ଟଙ୍କା କରାଯାଇଛି। କ୍ୟାବିନେଟ୍ ନିଷ୍ପତ୍ତି ସମ୍ପର୍କରେ ସୂଚନା ଦେଇ କେନ୍ଦ୍ର ମନ୍ତ୍ରୀ ଅଶ୍ବିନୀ ବୈଷ୍ଣବ କହିଛନ୍ତି ଯେ ଏମ୍ଏସ୍‌ପି ବୃଦ୍ଧି କରାଯାଇଥିବାରୁ ଚାଷୀମାନଙ୍କୁ ପ୍ରାୟ ୨ ଲକ୍ଷ କୋଟି ଟଙ୍କା ମିଳିବ। ପୂର୍ବ ଋତୁ ତୁଳନାରେ ଏହା ୩୫ ହଜାର କୋଟି ଟଙ୍କା ଅଧିକ ବୋଲି ସେ କହିଛନ୍ତି।

କେନ୍ଦ୍ର ସରକାରଙ୍କ ସୂଚନା ଅନୁସାରେ ବାଜରା ଏମ୍ଏସ୍‌ପି ୧୨୫ ଟଙ୍କା ବୃଦ୍ଧି ପାଇ ୨୬୨୫ ଟଙ୍କା, ମାଣ୍ଡିଆ ୪୪୪ ଟଙ୍କା ବୃଦ୍ଧି ପାଇ ୪୨୯୦ ଟଙ୍କା ଓ ମକା ଏମ୍ଏସ୍‌ପି ୧୩୫ ଟଙ୍କା ବୃଦ୍ଧି ପାଇ ୨୨୨୫ ଟଙ୍କାରେ ପହଞ୍ଚିଛି। ହରଡ଼ ଡାଲି ଏମ୍ଏସ୍‌ପି କ୍ବିଣ୍ଟାଲ ପିଛା ୫୫୦ ଟଙ୍କା ବୃଦ୍ଧି ପାଇ ୭୫୫୦ ଟଙ୍କା ହୋଇଥିବା ବେଳେ ମୁଗ ଡାଲି ୧୨୪ ଟଙ୍କା ବୃଦ୍ଧି ପାଇ ୮୬୮୨ ଟଙ୍କା ଧାର୍ଯ୍ୟ କରାଯାଇଛି। ବିରି ଏମ୍ଏସ୍‌ପି କ୍ବିଣ୍ଟାଲ ପିଛା ୪୫୦ ଟଙ୍କା ବୃଦ୍ଧି ପାଇ ୭୪୦୦ ଟଙ୍କାରେ ପହଞ୍ଚିଛି। ଚିନାବାଦାମ ଏମ୍‌ଏସ୍‌ପି କ୍ବିଣ୍ଟାଲ ପିଛା ୪୦୬ ଟଙ୍କା ବୃଦ୍ଧି ପାଇ ୬୭୮୩ ଟଙ୍କା ହୋଇଥିବା ବେଳେ ସୂର୍ଯ୍ୟମୁଖୀ ମଞ୍ଜି ଦାମ୍ ୭୨୮୦ ଟଙ୍କା, ସୋୟାବିନ୍‌ର ୨୯୨ ଟଙ୍କା ବୃଦ୍ଧି ପାଇ ୪୮୯୨ ଟଙ୍କାରେ ପହଞ୍ଚିଛି।

ସମ୍ବନ୍ଧିତ ଖବର