ନୂଆଦିଲ୍ଲୀ : ବରିଷ୍ଠ କଂଗ୍ରେସ ନେତା ସଲମାନ ଖୁର୍ସିଦଙ୍କ ବହିରେ ରାଷ୍ଟ୍ରୀୟ ସ୍ବୟଂ ସେବକ ସଂଘ (ଆରଏସଏସ)କୁ ଅନ୍ତର୍ଜାତୀୟ ଆତଙ୍କବାଦୀ ସଂଗଠନ ଆଇଏସଆଇଏସ ସହ ତୁଳନା କରିବା ପରେ ତାହାକୁ ନେଇ ବିବାଦ ବଢିବାରେ ଲାଗିଛି । ସୋମବାର ଖୁର୍ସିଦଙ୍କ ନୈନିତାଲସ୍ଥିତ ବାସଭବନରେ କେତେକ ଯୁବକ ଭଙ୍ଗାରୁଜ୍ଜା କରିଥିବାର ଖବର ହସ୍ତଗତ ହୋଇଛି ।
Sambad is now on WhatsApp
Join and get latest news updates delivered to you via WhatsApp
ଏ ସମ୍ପର୍କରେ ସୂଚନା ଦେଇ କୁମାୟୁଁର ଜିଡିଆଇ ନୀଲେଶ ଆନନ୍ଦ କହିଛନ୍ତି ଯେ ଏହି ଘଟଣାରେ ରାକେଶ, କପିଳ ସମେତ ୨୦ ଜଣ ଯୁବକଙ୍କ ବିରୁଦ୍ଧରେ ମାମଲା ରୁଜ୍ଜୁ ହୋଇଛି । ଦୋଷୀମାନଙ୍କ ବିରୋଧରେ ଦୃଢ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ।
ଏହି ଭଙ୍ଗାରୁଜ୍ଜା ଘଟଣା ଉପରେ ପ୍ରତିକ୍ରିୟା ରଖି ଖୁର୍ସିଦ କହିଛନ୍ତି ଯେ ସେ ବହିରେ ଲେଖିଛନ୍ତି ଏପରି ଲୋକମାନେ ହିନ୍ଦୁ ହୋଇନପାରନ୍ତି । ହିନ୍ଦୁ ଧର୍ମ ଭାରତକୁ ଏକ ମହାନ ସଂସ୍କୃତି ଦେଇଛି ଓ ସେଥିପାଇଁ ସେ ଗର୍ବିତ । ଏହି ଆକ୍ରମଣ ତାଙ୍କ ଉପରେ ନଥିଲା, ଥିଲା ହିନ୍ଦୁ ଧର୍ମ ଉପରେ ।
ତାଙ୍କ ଘରେ ହୋଇଥିବା ଭଙ୍ଗାରୁଜ୍ଜା ଓ ପୋଡ଼ାଜଳାର ଫଟୋ ଓ ଭିଡିଓ ସେ ସୋସିଆଲ ମିଡିଆରେ ସେୟାର କରିଛନ୍ତି । ଗୋଟିଏ ଭିଡିଓରେ କିଛି ଲୋକ ଜୟ ଶ୍ରୀରାମ କହିବା ସହ ବିଜେପି ପତାକା ଧରିଥିବା ଦେଖାଯାଉଛି ।
ଖୁର୍ସିଦଙ୍କ ଘର ଉପରେ ହୋଇଥିବା ଆକ୍ରମଣକୁ କଂଗ୍ରେସ ନେତା ଶଶୀ ଥରୁର ନିନ୍ଦା କରିଛନ୍ତି ।