ନୂଆଦିଲ୍ଲୀ: ମତଦାନ ପାଇଁ ବ୍ୟବହାର ହେଉଥିବା ଇଲେକ୍ଟ୍ରୋନିକ୍ ଭୋଟିଂ ମେସିନ୍ ବା ଇଭିଏମ ତ ଆପଣ ଦେଖିଥିବେ | ବର୍ତ୍ତମାନ ପ୍ରତ୍ୟେକ ନିର୍ବାଚନରେ ଇଭିଏମ ବ୍ୟବହାର କରାଯାଉଥିବାବେଳେ ଆପଣ ଜାଣନ୍ତି କି କିଏ ଇଭିଏମ୍ ମେସିନ୍ ତିଆରି କରୁଛି? ଇଭିଏମ ମେସିନର ମୂଲ୍ୟ କେତେ ? ଏହି ଖବରରେ ଆଜି ଆମେ ଆପଣଙ୍କୁ ଏହି ସମସ୍ତ ପ୍ରଶ୍ନର ଉତ୍ତର ଦେବୁ। ଇଲେକ୍ଟ୍ରୋନିକ୍ ଭୋଟିଂ ମେସିନ୍ ଭାରତର ଦୁଇଟି ସରକାରୀ କମ୍ପାନୀ ନିର୍ମାଣ କରନ୍ତି | ଏଥିମଧ୍ୟରୁ ପ୍ରଥମଟି ହେଉଛି ଭାରତ ଇଲେକ୍ଟ୍ରୋନିକ୍ସ ଲିମିଟେଡ୍ (BEL) ଯାହା ବାଙ୍ଗାଲୋରରେ ଅବସ୍ଥିତ | ଏଥି ସହିତ ଦ୍ୱିତୀୟ କମ୍ପାନୀ ହେଉଛି ଇଲେକ୍ଟ୍ରୋନିକ୍ସ କର୍ପୋରେସନ୍ ଅଫ୍ ଇଣ୍ଡିଆ ଯାହା ହାଇଦ୍ରାବାଦରେ ଅବସ୍ଥିତ। ନିର୍ବାଚନ ଆୟୋଗର ଅଫିସିଆଲ୍ ୱେବସାଇଟରେ ପ୍ରକାଶିତ ରିପୋର୍ଟ ଅନୁଯାୟୀ ୧୯୮୨ ମସିହାରେ ଭାରତରେ ପ୍ରଥମ ଥର ପାଇଁ ଇଲେକ୍ଟ୍ରୋନିକ୍ ଭୋଟିଂ ମେସିନ୍ ବ୍ୟବହାର କରାଯାଇଥିଲା। କେରଳର ସାଧାରଣ ନିର୍ବାଚନ ସମୟରେ ଏହା ପ୍ରଥମ ଥର ବ୍ୟବହାର କରାଯାଇଥିଲେ ବି ଏହାର ବ୍ୟବହାରକୁ ନେଇ ନିର୍ଦ୍ଦିଷ୍ଟ କୌଣସି ଆଇନ ନଥିବାରୁ ସୁପ୍ରିମକୋର୍ଟ ଏହି ନିର୍ବାଚନକୁ ରଦ୍ଦ କରିଦେଇଥିଲେ |
Sambad is now on WhatsApp
Join and get latest news updates delivered to you via WhatsApp
ଏହା ପରେ ୧୯୯୮ ମସିହାରେ ମଧ୍ୟପ୍ରଦେଶ, ରାଜସ୍ଥାନ ଏବଂ ଦିଲ୍ଲୀର ୨୫ଟି ବିଧାନସଭା ନିର୍ବାଚନରେ ଇଭିଏମ୍ ବ୍ୟବହାର କରାଯାଇଥିଲା। ଇଲେକ୍ଟ୍ରୋନିକ୍ ଭୋଟିଂ ମେସିନ୍ ଚଳାଇବା ପାଇଁ ବିଦ୍ୟୁତ୍ ଆବଶ୍ୟକ ନାହିଁ। ଏହା ୬ ଭୋଲ୍ଟ ଆଲଫାଲାଇନ ବ୍ୟାଟେରୀରେ ଚାଲିଥାଏ | ଏକ ଇଭିଏମ୍ ମେସିନରେ ସର୍ବାଧିକ ୩୮୪୦ ଭୋଟ୍ ରେକର୍ଡ କରାଯାଇପାରିବ | ଯେତେବେଳେ କି, ମୋଟ ୬୪ ପ୍ରାର୍ଥୀଙ୍କ ନାମ ଏକ ଇଭିଏମ୍ ମେସିନରେ ଅନ୍ତର୍ଭୂକ୍ତ କରାଯାଇପାରିବ | ପ୍ରାରମ୍ଭିକ ପର୍ଯ୍ୟାୟରେ ଯଥା ୧୯୯୦ ମସିହାରେ, ଯେତେବେଳେ ପ୍ରଥମ ଥର ପାଇଁ ଇଭିଏମ୍ ମେସିନ୍ କ୍ରୟ କରାଯାଇଥିଲା, ଏହାର ମୂଲ୍ୟ (ଇଭିଏମ୍ ମୂଲ୍ୟ) ପ୍ରାୟ ୫୫୦୦ ଟଙ୍କା ଥିଲା | ଏହା ପରେ, ୨୦୧୪ ମସିହାରେ, ଯେତେବେଳେ ଇଭିଏମ୍ ମେସିନ୍ ଅର୍ଡର ହେଲା, ଗୋଟିଏ ମେସିନର ମୂଲ୍ୟ ୧୦୫୦୦ ଟଙ୍କା ସ୍ଥିର କରାଯାଇଥିଲା।