ନୀତୀଶଙ୍କ ରାଜନୀତି: ଜାଣନ୍ତୁ ୩ଦଶନ୍ଧି ମଧ୍ୟରେ କେତେ ଥର ସହଯୋଗୀ ଦଳକୁ ଦେଇଛନ୍ତି ଧୋକା

ନୂଆଦିଲ୍ଲୀ: ବିହାର ମୁଖ୍ୟମନ୍ତ୍ରୀ ନୀତୀଶ କୁମାର ଆଜି ବିଜେପି ସହ ମେଣ୍ଟ ଭାଙ୍ଗିଛନ୍ତି। ଏହା ପ୍ରଥମ ଥର ନୁହେଁ, ଏହାପୂର୍ବରୁ ୨୦୧୩ରେ ନୀତୀଶ ନରେନ୍ଦ୍ର ମୋଦୀଙ୍କୁ ପ୍ରଧାନମନ୍ତ୍ରୀ ପ୍ରାର୍ଥୀ କରାଯିବାକୁ ବିରୋଧ କରି ଏନଡିଏରୁ ବିଦାୟ ନେବା ସହ ୧୭ବର୍ଷ ପୁରୁଣା ମେଣ୍ଟ ଭାଙ୍ଗିଥିଲେ। ଏହା ପରେ ୨୦୧୫ରେ, ସେ ପୁରୁଣା ସହଯୋଗୀ ଲାଲୁ ଯାଦବଙ୍କ ସହ ଏକ ମେଣ୍ଟ ଗଠନ କରିଥିଲେ, କିନ୍ତୁ ଏହି ସରକାର ମଧ୍ୟ ମାତ୍ର ୨୦ମାସ ଚାଲିଥିଲା। ଆରଜେଡିଠାରୁ ଅଲଗା ହେବା ପରେ ନୀତୀଶ ପୁଣି ଥରେ ଏନଡିଏରେ ଯୋଗ ଦେଇଥିଲେ ଏବଂ ଆଜି ସେ ପୁଣି ଏନଡିଏ ହାତ ଛାଡ଼ିଛନ୍ତି।

ସମୟ ସହ ନୀତୀଶ ନିଜର ଅନେକ ସହଯୋଗୀ ଦଳକୁ ଧୋକା ଦେଇଛନ୍ତି। ୧୯୯୪ରୁ ୨୦୨୨ ମଧ୍ୟରେ ସେ ଅନେକ ସହଯୋଗୀ ଦଳର ହାତ ଛାଡ଼ିବା ପରେ ପୁଣି ସେହି ଦଳର ହାତ ଧରିଛନ୍ତି। ନିଜର ସରକାର ବଞ୍ଚାଇବାକୁ ସମୟ ସହ ନୀତୀଶ ସହଯୋଗୀ ଦଳ ବଦଳାଇଥିବା ଜଣାପଡ଼ିଛି। ଆସନ୍ତୁ ନୀତୀଶଙ୍କ ରାଜନୈତିକ ଜୀବନର ଏହି ଦିଗ ଉପରେ ଆଲୋଚନା କରିବା।

– ୧୯୯୪ ମସିହାରେ ନୀତୀଶ କୁମାର ତାଙ୍କର ପୁରୁଣା ସହଯୋଗୀ ଲାଲୁ ଯାଦବଙ୍କୁ ଛାଡି ସମସ୍ତଙ୍କୁ ଆଶ୍ଚର୍ଯ୍ୟ କରିଥିଲେ। ଜନତା ଦଳରୁ ବିଦାୟ ନେଇ ନୀତୀଶ ଜର୍ଜ ଫର୍ଣ୍ଣାଣ୍ଡିଜଙ୍କ ସହ ସମତା ପାର୍ଟି ଗଠନ କରିଥିଲେ ଏବଂ ୧୯୯୫ ବିହାର ବିଧାନସଭା ନିର୍ବାଚନରେ ​​ଲାଲୁଙ୍କ ବିରୋଧରେ ନିର୍ବାଚନ ଲଢ଼ିଥିଲେ। କିନ୍ତୁ ନିର୍ବାଚନରେ ତାଙ୍କୁ ସଫଳତା ମିଳି ନଥିଲା। ପରାଜୟ ପରେ ସେ ୧୯୯୬ରେ ବିହାରରେ ଦୁର୍ବଳ ଦଳ ଭାବେ ବିବେଚନା କରାଯାଉଥିବା   ବିଜେପି ସହିତ ହାତ ମିଳାଇଥିଲା। ଫଳରେ ବିଜେପି ଏବଂ ସମତା ପାର୍ଟିର ମେଣ୍ଟ ଦୀର୍ଘ ୧୭ବର୍ଷ ଧରି ଚାଲିଥିଲା ​। ଏହି ସମୟ ମଧ୍ୟରେ ୨୦୦୩ ମସିହାରେ, ସମତା ପାର୍ଟି ଜନତା ଦଳ ୟୁନାଇଟେଡ୍ (ଜେଡିୟୁ)ରେ ପରିଣତ ହୋଇଥିଲା। ଏହା ପରେ ଜେଡିୟୁ ବିଜେପି ସହ ହାତ ମିଳାଇ ୨୦୦୫ ବିଧାନସଭା ନିର୍ବାଚନରେ ​​ବିଜୟ ହାସଲ କରିଥିଲା। ବିଜୟ ପରେ ଦୁଇ ଦଳ ୨୦୧୩ ପର୍ଯ୍ୟନ୍ତ ଏକାଠି ସରକାର ଚଳାଇଥିଲେ।

– ୨୦୧୩ ମସିହାରେ, ଯେତେବେଳେ ବିଜେପି ନରେନ୍ଦ୍ର ମୋଦୀଙ୍କୁ ୨୦୧୪ଲୋକସଭା ନିର୍ବାଚନରେ ​​ପ୍ରଧାନମନ୍ତ୍ରୀ ପ୍ରାର୍ଥୀ ଘୋଷଣା କଲା, ସେତେବେଳେ ନୀତୀଶ କୁମାର ଏହାକୁ ପସନ୍ଦ କରି ନଥିଲେ ଏବଂ ବିଜେପି ସହିତ ୧୭ବର୍ଷ ପୁରୁଣା ମେଣ୍ଟ ଭାଙ୍ଗିଥିଲେ। ଏହା ପରେ ଆରଜେଡି ସମର୍ଥନରେ ସରକାର ଚଳାଉଥିବା ନୀତୀଶ କୁମାର ଲୋକସଭା ନିର୍ବାଚନରେ ​​ପରାଜୟ ପରେ ମୁଖ୍ୟମନ୍ତ୍ରୀ ପଦରୁ ଇସ୍ତଫା ଦେଇଥିଲେ ଏବଂ ତାଙ୍କ ସରକାରର ମନ୍ତ୍ରୀ ତଥା ଦଳିତ ନେତା ଜିତନ ରାମ ମାଞ୍ଜୀଙ୍କୁ ମୁଖ୍ୟମନ୍ତ୍ରୀ ପଦ ହସ୍ତାନ୍ତର କରିଥିଲେ। ଇସ୍ତଫା ପରେ ସେ ନିଜେ ୨୦୧୫ ବିହାର ବିଧାନସଭା ନିର୍ବାଚନ ପାଇଁ ପ୍ରସ୍ତୁତି ଆରମ୍ଭ କରିଥିଲେ।

– ୨୦୧୪ ଲୋକସଭା ନିର୍ବାଚନରେ ​​ବିଜେପି ଦ୍ବାରା ପରାସ୍ତ ହୋଇଥିବା ନୀତୀଶ କୁମାର ପୁରୁଣା ସହଯୋଗୀ ଲାଲୁ ଯାଦବ ଏବଂ କଂଗ୍ରେସ ସହ ମେଣ୍ଟ ଗଠନ କରି ୨୦୧୫ରେ ବିଧାନସଭା ନିର୍ବାଚନରେ ​​ପ୍ରତିଦ୍ୱନ୍ଦ୍ୱିତା କରିଥିଲେ। ଏହି ନିର୍ବାଚନରେ ​​ଆରଜେଡି ଜେଡିୟୁ ଅପେକ୍ଷା ଅଧିକ ଆସନ ଆଣିଥିଲେ। ଏହା ସତ୍ତ୍ବେ ନୀତୀଶ କୁମାର ମୁଖ୍ୟମନ୍ତ୍ରୀ ହୋଇଥିଲେ ଏବଂ ଲାଲୁ ଯାଦବଙ୍କ ସାନପୁଅ ତେଜସ୍ୱୀ ଯାଦବ ଉପମୁଖ୍ୟମନ୍ତ୍ରୀ ହୋଇଥିଲେ। ଏହା ସହ ଲାଲୁଙ୍କ ବଡ ପୁଅ ତେଜ ପ୍ରତାପ ଯାଦବ ସ୍ୱାସ୍ଥ୍ୟମନ୍ତ୍ରୀ ହୋଇଥିଲେ।

– ୨୦ ମାସ ଧରି ଦୁଇ ପୁରୁଣା ସାଥୀଙ୍କ ସରକାର ସଠିକ୍ ଭାବରେ ଚାଲିଥିବା ବେଳେ ୨୦୧୭ରେ ଦୁଇ ଦଳ ମଧ୍ୟରେ ମତଭେଦ ଆରମ୍ଭ ହୋଇଥିଲା। ଏପ୍ରିଲ୍ ୨୦୧୭ରେ ଆରମ୍ଭ ହୋଇଥିବା ଏହି ବିବାଦ ଜୁଲାଇ ସୁଦ୍ଧା ଗୁରୁତର ରୂପ ନେଇଥିଲା, ଯାହା ପରେ ମୁଖ୍ୟମନ୍ତ୍ରୀ ନୀତୀଶ କୁମାର ଇସ୍ତଫା ଦେଇଥିଲେ। ସେହି ସମୟରେ ବିଧାନସଭାରେ ବିଜେପି ସର୍ବବୃହତ ବିରୋଧୀ ଦଳ ହୋଇଥିବାରୁ ମଧ୍ୟବର୍ତ୍ତୀକାଳୀନ ନିର୍ବାଚନ କରିବାକୁ ମନା କରି ବିଜେପି ପୁରୁଣା ସହଯୋଗୀଙ୍କୁ ସମର୍ଥନ କରିବାକୁ ନିଷ୍ପତ୍ତି ନେଇଥିଲା ଏବଂ ନୀତୀଶ କୁମାର ପୁଣି ଥରେ ମୁଖ୍ୟମନ୍ତ୍ରୀ ହୋଇଥିଲେ। ହେଲେ ଏବେ ପୁଣି ବିଜେପିକୁ ଧୋକା ଦେଇ ଇସ୍ତଫା ଦେଇଛନ୍ତି ନୀତୀଶ। ଇସ୍ତଫା ପରେ ସେ ଆରଜେଡି, କଂଗ୍ରେସ ଓ ବାମଦଳ ସହ ମେଣ୍ଟ କରିବାର ସମ୍ଭାବନା ରହିଛି।