କୋଲକାତା ଗଣଦୁଷ୍କର୍ମ ଘଟଣା: କସବା ଥାନା ବାହାରେ ବିକ୍ଷୋଭ ପୁଲିସର ଲାଠିଚାଳନା

କୋଲକାତା: ପଶ୍ଚିମବଙ୍ଗର ଏକ ଲ’ କଲେଜରେ ଛାତ୍ରୀଙ୍କୁ ଗଣଦୁଷ୍କର୍ମ ଘଟଣା ପରେ ପଶ୍ଚିମବଙ୍ଗରେ ଉତ୍ତେଜନା ସୃଷ୍ଟି ହୋଇଛି। ବାମପନ୍ଥୀ ଛାତ୍ର ସଂଗଠନ ଏସ୍ଏଫ୍ଆଇ ଓ ଡିୱାଇଏଫ୍ଆଇର କର୍ମକର୍ତ୍ତାମାନେ କସବା ଥାନା ବାହାରେ ହଙ୍ଗାମା କରିଥିଲେ। ଏହାପରେ ପୁଲିସ ବଳ ପ୍ରୟୋଗ କରି ସେମାନଙ୍କୁ ଘଉଡ଼ାଇ ଦେଇଥିଲା। ପୁଲିସର କାର୍ଯ୍ୟାନୁଷ୍ଠାନରେ ଅନେକ ବିକ୍ଷୋଭକାରୀ ଆହତ ହୋଇଛନ୍ତି। ଏଥିସହ ଅନେକ ବିକ୍ଷୋଭକାରୀଙ୍କୁ ଅଟକ ରଖି ଲାଲବଜାର ମୁଖ୍ୟାଳୟକୁ ନିଆଯାଇଛି। ବିକ୍ଷୋଭକାରୀମାନେ କସବା ଥାନାକୁ ଯିବା ରାସ୍ତା ଅବରୋଧ କରିଥିଲେ। ଏହାବ୍ୟତୀତ କସବାର ରାଜଦଙ୍ଗା ମୁଖ୍ୟ ରାସ୍ତା ଅବରୋଧ ହୋଇଥିଲା। ଏହାପରେ ପୁଲିସ ବିକ୍ଷୋଭକାରୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରିଥିଲା।

ପୁଲିସ ଲାଠିଚାର୍ଜ କରିବାରୁ ବିକ୍ଷୋଭକାରୀମାନେ ସେମାନଙ୍କ ଲାଠି ଧରିବାକୁ ଚେଷ୍ଟା କରୁଥିବା ଦେଖିବାକୁ ମିଳିଥିଲା। ପୁଲିସ ଓ ବିକ୍ଷୋଭକାରୀଙ୍କ ମଧ୍ୟରେ ଧସ୍ତାଧସ୍ତି ମଧ୍ୟ ହୋଇଥିଲା। ଯାଦବପୁର ବ୍ଲକ୍‌ର ଡେପୁଟି କମିସନର ବିଦିଶା କଳିତା ଦାସଗୁପ୍ତାଙ୍କ ନେତୃତ୍ବରେ ସୁରକ୍ଷା ବାହିନୀ ଲାଠି ଧରି ବିକ୍ଷୋଭକାରୀଙ୍କୁ ହଟାଇବାକୁ ଉଦ୍ୟମ କରିବାରୁ ସଂଘର୍ଷ ହୋଇଥିଲା। ବିକ୍ଷୋଭକାରୀମାନେ ମଧ୍ୟ ସେମାନଙ୍କର କିଛି ସହଯୋଗୀଙ୍କୁ ପୁଲିସ କର୍ମଚାରୀଙ୍କ କବଳରୁ ମୁକ୍ତ କରିବାକୁ ଚେଷ୍ଟା କରିଥିଲେ। ବିକ୍ଷୋଭକାରୀଙ୍କୁ ଘଉଡ଼ାଇବା ପାଇଁ ପୁଲିସ ବହୁ ଦୂର ଯାଏ ରାସ୍ତାରେ ସେମାନଙ୍କ ପିଛା କରିଥିଲା।