ଇସଲାମାବାଦ : ପାକିସ୍ତାନ ଜେଲରେ ବନ୍ଦୀ ଥିବା ଭାରତର ଅବସରପ୍ରାପ୍ତ ନୌସେନା ଅଧକାରୀ କୁଳଭୂଷଣ ଯାଦବଙ୍କୁ ଅପିଲ କରିବାର ଅଧିକାର ଦେବାକୁ ପାକିସ୍ତାନ ସଂସଦରେ ଏକ ବିଲ୍ ଗୃହୀତ ହୋଇଛି । ପାକିସ୍ତାନ ସଂସଦ ବା ନ୍ୟାସନାଲ ଆସେମ୍ବଲିର ମିଳିତ ଅଧିବେଶନରେ ଏହି ବିଲ ଗୃହୀତ ହୋଇଛି । ଏହା ଫଳରେ ଯାଦବ ନିଜର ମୃତ୍ୟୁଦଣ୍ଡାଦେଶ ବିରୋଧରେ ଅପିଲ କରିପାରିବେ ।
Sambad is now on WhatsApp
Join and get latest news updates delivered to you via WhatsApp
ଅନ୍ତର୍ଜାତୀୟ ନ୍ୟାୟାଳୟଙ୍କ ରାୟ ଅନୁସାରେ କୁଳଭୂଷଣଙ୍କୁ ଅପିଲ କରିବାର ଅଧିକାର ଦେବାକୁ ଗତ ଜୁନ ମାସରେ ପାକିସ୍ତାନ ନ୍ୟାସନାଲ ଆସେମ୍ବଲିରେ ଏହି ବିଲ ଆଗତ ହୋଇଥିଲା । ୨୦୧୯ରେ ଅନ୍ତର୍ଜାତୀୟ ନ୍ୟାୟାଳୟ ଦେଇଥିବା ରାୟ ଦେଇଥିଲେ ଯେ ପାକିସ୍ତାନ ନିଜର ରାୟର ପୁନର୍ବିଚାର କରୁ ଓ ଯାଦବଙ୍କୁ କନସୁଲାର ଆକସେସ ( ଭାରତୀୟ କନସୁଲେଟ ଅଧିକାରୀଙ୍କୁ ଭେଟିବାକୁ ଅନୁମତି) ପ୍ରଦାନ କରୁ । ଏହି ରାୟକୁ ଭିତ୍ତି କରି ଇମ୍ରାନ ଖାଁ ସରକାର ୨୦୨୦ରେ ପାକିସ୍ତାନ ନ୍ୟାସନାଲ ଆସେମ୍ବଲି (ସଂସଦ)ରେ ଏକ ଅର୍ଡିନାନ୍ସ ଆଗତ କରିଥିଲେ । ତେବେ ଏହାକୁ ପାକିସ୍ତାନର ବିରୋଧୀ ଦଳମାନେ ପ୍ରବଳ ବିରୋଧ କରିଥିଲେ ।
ପାକିସ୍ତାନର ଏକ ସେନା ଅଦାଲତ ୨୦୧୭ ଏପ୍ରିଲରେ କୁଳଭୂଷଣଙ୍କୁ ଗୁପ୍ତଚରବୃଦ୍ଧି ଅଭିଯୋଗରେ ମୃତ୍ୟୁଦଣ୍ଡ ଦେଇଥିଲେ । ଏହି ରାୟ ଓ କନସୁଲାର ଆକସେସ ନ ଦେବା ବିରୋଧରେ ଭାରତ ସରକାର ଅନ୍ତର୍ଜାତୀୟ ନ୍ୟାୟାଳୟଙ୍କ ଦ୍ବାରସ୍ଥ ହୋଇଥିଲେ । ହେଗଠାରେ ଥିବା ଅନ୍ତର୍ଜାତୀୟ ନ୍ୟାୟାଳୟ ୨୦୧୯ ଜୁଲାଇରେ ରାୟର ପୁନର୍ବିଚାର ଓ କନସୁଲାର ଆକସେସ ପ୍ରଦାନ ପାଇଁ ନିର୍ଦ୍ଦେଶ ଦେଇଥିଲେ ।