ଫ୍ଲୋରିଡା : ଆମର ପଡୋଶୀ ଗ୍ରହ ମଙ୍ଗଳରେ ପାଣି ଥିବାର ସମ୍ଭାବନା ବଢିଯାଇଛି । ନିକଟରେ ଏହି ଗ୍ରହରେ ଏକ ଭୂତଳ ହ୍ରଦ ଥିବାର ପ୍ରମାଣ ମିଳିଛି । ଇଟାଲୀ ଓ ଆମେରିକାର ଏକ ଅନ୍ତର୍ଜାତୀୟ ଗବେଷକଦଳ ଏ ସଂପର୍କରେ ବୁଧବାରଦିନ ପ୍ରକାଶ କରିଛନ୍ତି । ଏହି ଆବଷ୍କାର ସମ୍ପର୍କରେ ୟୁଏସ ଜର୍ନାଲ ଅନ ସାଇନ୍ସରେ ଏକ ରିପୋର୍ଟ ପ୍ରକାଶ ପାଇଛି । ଏହି ରିପୋର୍ଟରେ କୁହାଯାଇଛି ଯେ ଏହି ହ୍ରଦର ଲମ୍ବ ପ୍ରାୟ ୨୦ କିଲୋମିଟର ରହିଥିବା ଅନୁମାନ କରାଯାଉଛି । ଏହା ହେଉଛି ମଙ୍ଗଳରେ ଆବିଷ୍କାର କରାଯାଇଥିବା ବୃହତ୍ତମ ଜଳାଶୟ । ତେବେ ଏହି ହ୍ରଦଟି ବରଫ ଆବରଣର ୧.୫ କିଲୋମିଟର ତଳେ ରହିଛି ।
Sambad is now on WhatsApp
Join and get latest news updates delivered to you via WhatsApp
ମଙ୍ଗଳରେ ହ୍ରଦ ଆବିଷ୍କାର ହେବାକୁ ବେଶ ଗୁରୁତ୍ୱପୂର୍ଣ୍ଣ ମନେ କରାଯାଉଛି, କାରଣ ପୂର୍ବରୁ ମଙ୍ଗଳ ଅଳ୍ପ କିଛି ଜଳର ପ୍ରମାଣ ମିଳିଥିଲା । କିନ୍ତୁ ଏକ ହ୍ରଦ ଆବଷ୍କାର ହେବା ଦ୍ୱାରା ମଙ୍ଗଳରେ ଅତୀତରେ, ଏପରିକି ବର୍ତ୍ତମାନ ଜୀବନ ଥିବା ସମ୍ଭାବନା ବଢିଯିବ ବୋଲି କହିଛନ୍ତି ଅଷ୍ଟ୍ରେଲିଆର ସିନବର୍ନ ବିଶ୍ୱବିଦ୍ୟାଳୟର ପ୍ରଫେସର ଆଲାନ ଡଫି । ମଙ୍ଗଳଗ୍ରହଟି ଏବେ ଥଣ୍ଡା ଓ ମରୁଭୂମି ପୂର୍ଣ୍ଣ ଥିବାବେଳେ ପ୍ରାୟ ୩୬୦ କୋଟି ବର୍ଷ ପୂର୍ବେ ଏହା ଉଷ୍ମ ଓ ଆର୍ଦ୍ର ଥିବା ଅନୁମାନ କରାଯାଏ ।