ନୂଆଦିଲ୍ଲୀ: ଉତ୍ତରପ୍ରଦେଶର ଲକ୍ଷ୍ମୀପୁର ଖେରିରୁ ଏକ ଆଶ୍ଚର୍ଯ୍ୟଜନକ ଘଟଣା ସାମ୍ନାକୁ ଆସିଛି। ଏଠାରେ କୋଟି କୋଟି ଟଙ୍କା ବ୍ୟୟରେ ନିର୍ମିତ ଏକ ପାଣି ଟାଙ୍କି ପରୀକ୍ଷଣ ସମୟରେ ଫାଟି ଯାଇଛି। ଏହି ଘଟଣାର ଏକ ଭିଡିଓ ସୋସିଆଲ ମିଡିଆରେ ଦ୍ରୁତ ଗତିରେ ଘୁରି ବୁଲୁଛି। 

Advertisment

ଲକ୍ଷ୍ମୀପୁର ଖେରିରେ ଜଳ ଜୀବନ ମିଶନ ଅଧୀନରେ ଏକ ପାଣି ଟାଙ୍କି ନିର୍ମାଣ କରାଯାଇଥିଲା। ସାଧାରଣ ଲୋକଙ୍କ ଦ୍ୱାରା ବ୍ୟବହାର କରାଯିବା ପୂର୍ବରୁ ଏହି ପାଣିଟାଙ୍କିକୁ ପରୀକ୍ଷଣ କରାଯାଇଥିଲା। ଟାଙ୍କିରେ ପାଣି ଭର୍ତ୍ତି କରି ପରୀକ୍ଷଣ କରାଯାଉଥିବା ସମୟରେ କେହିକିଛି ବୁଝିବା ପୂର୍ବରୁ ଏହି ପାଣି ଟ୍ୟାଙ୍କଟି ବେଲୁନ ଭଳି ଫାଟି ଯାଇଥିଲା। ପାଣିସବୁ ଉଛୁଳି ତଳେ ପଡ଼ିଥିଲା। କିଛି ସମୟ ପାଇଁ ଘଟଣାସ୍ଥଳରେ ବନ୍ୟା ପରିସ୍ଥିତି ସୃଷ୍ଟି ହୋଇଯାଇଥିଲା। ଯେଉଁ କାରଣରୁ ପାଖ ଜମିରେ ଲାଗିଥିବା ଗହମ ଚାଷ ସବୁ ନଷ୍ଟ ହୋଇଯାଇଥିଲା। 

ଏହି ଟାଙ୍କିର ନିର୍ମାଣ କାର୍ଯ୍ୟ ୨୦୨୨ ମସିହାରେ ଆରମ୍ଭ ହୋଇ ୩.୪୦ କୋଟି ଟଙ୍କା ବିନିମୟରେ ୨୦୨୪ ମସିହାରେ ଶେଷ ହୋଇଥିଲା। ଏହି ଘଟଣା ଟାଙ୍କି ନିର୍ମାଣର ଗୁଣବତ୍ତା ଏବଂ ଦୁର୍ନୀତିକୁ ନେଇ ଅନେକ ପ୍ରଶ୍ନ ଉଠିଛି। ସେହିପରି, ସ୍ଥାନୀୟ ଗ୍ରାମବାସୀମାନେ ଏହି ଘଟଣାର ଉଚ୍ଚସ୍ତରୀୟ ତଦନ୍ତ ଦାବି କରିଛନ୍ତି।