ପାଟନା: ଲାଲୁ ଯାଦବଙ୍କ ଆର୍‌ଜେଡି ଓ କଂଗ୍ରେସ ସହ ମେଣ୍ଟରୁ ଓହରି ପୁନଶ୍ଚ ବିଜେପି ସହ ମିଶି ସରକାର ଗଢ଼ିଥିବା ଜନତା ଦଳ (ୟୁନାଇଟେଡ୍) ମୁଖ୍ୟ ନୀତୀଶ କୁମାରଙ୍କୁ ଟାର୍ଗେଟ କରି ଲାଲୁଙ୍କ ଝିଅ ରୋହିଣୀ ଆଚାର୍ଯ୍ୟ କହିଛନ୍ତି ଯେ ‘ଆବର୍ଜନା ଡଷ୍ଟବିନ୍ ଭିତରକୁ ଗଲା’। ୧୮ ମାସ ତଳେ ମହାମେଣ୍ଟରେ ନୀତୀଶ ସାମିଲ ହେବା ଏବଂ ବିରୋଧୀ ଇଣ୍ଡିଆ ମେଣ୍ଟରେ ତାଙ୍କ ପାଇଁ ସବୁକିଛି ଠିକ୍‌ଠାକ୍ ଚାଲି ନ ଥିବା ଦର୍ଶାଇ ନୀତୀଶ ଇସ୍ତଫା ଦେଇଥିଲେ। ଏହାକୁ ନେଇ ରୋହିଣୀ ନୀତୀଶଙ୍କୁ ଆବର୍ଜନା ଓ ବିଜେପିକୁ ଡଷ୍ଟ୍‌ବିନ ଭାବେ ଉଲ୍ଲେଖ କରିଥିବା ବେଳେ ପୂର୍ବରୁ ମଧ୍ୟ ଗୁରୁବାର ସେ ଅନ୍ୟ ଏକ ବିବାଦୀୟ ପୋଷ୍ଟ କରି ତାକୁ ଡିଲିଟ୍ କରିଥିଲେ । ତିନି ଦିନ ତଳେ ବଂଶବାଦ ରାଜନୀତିକୁ ନିନ୍ଦା କରିଥିବା ଆରଜେଡିର ପୂର୍ବତନ ସହଯୋଗୀ ନୀତୀଶ କୁମାରଙ୍କୁ ସମାଲୋଚନା କରିବାକୁ ଆର୍‌ଜେଡି ନେତାମାନେ ପଛଘୁଞ୍ଚା ଦେଉଥିବା ବେଳେ ଆଜି ଖୋଲାଖୋଲି ଟାର୍ଗେଟ୍‌ କରିଛନ୍ତି।