‘ବିବାଦ’ର ସମାପ୍ତି ପାଇଁ ଆହ୍ଵାନ ଦେଲା ଶ୍ରୀଲଙ୍କା ସାମରିକ ବାହିନୀ

କଲମ୍ବୋ: ଶ୍ରୀଲଙ୍କାର ସୈନ୍ୟ ବାହିନୀ ଏବଂ ପୁଲିସ ବୁଧବାର ସନ୍ଧ୍ୟାରେ ସଂସଦର ବାଚସ୍ପତିଙ୍କୁ ଅନୁରୋଧ କରିଛନ୍ତି ଯେ ସେ ଦେଶର ବିଭିନ୍ନ ରାଜନୈତିକ ଦଳର ନେତାମାନଙ୍କର ଏକ ସର୍ବଦଳୀୟ ବୈଠକ ଡାକି ନୂତନ ରାଷ୍ଟ୍ରପତି ନିଯୁକ୍ତି ପୂର୍ବରୁ ‘ସାମ୍ପ୍ରତିକ ବିବାଦ’ର ରାଜନୈତିକ ସମାଧାନ ସୁନିଶ୍ଚିତ କରିବା ପାଇଁ ପଦକ୍ଷେପ ଗ୍ରହଣ କରନ୍ତୁ।
ଏକ ବିବୃତ୍ତିରେ ପ୍ରତିରକ୍ଷା ମୁଖ୍ୟ ଜେନେରାଲ ଶଭେନ୍ଦ୍ରସିଲଭା ଦେଶରେ ଆଇନ ଶୃଙ୍ଖଳା ବଜାୟ ରଖିବା ପାଇଁ ତିନି ବାହିନୀ -ସେନା, ନୌସେନା ଏବଂ ବାୟୁସେନା- ଏବଂ ପୁଲିସକୁ ସହଯୋଗ ଓ ସମର୍ଥନ କରିବାକୁ ଜନସାଧାରଣ, ବିଶେଷ କରି ଯୁବକମାନଙ୍କୁ ‘ଏକ ସ୍ୱତନ୍ତ୍ର ନିବେଦନ’ କରିଛନ୍ତି।

ଆନ୍ଦୋଳନ କାଳରେ ଜାତୀୟ କିମ୍ବା ବ୍ୟକ୍ତିଗତ ସମ୍ପତ୍ତିର ଭଙ୍ଗାରୁଜା ନକରିବାକୁ ସେ ବିକ୍ଷୋଭକାରୀଙ୍କୁ ଅନୁରୋଧ କରିଛନ୍ତି। ପ୍ରତିରକ୍ଷା ମୁଖ୍ୟ ସିଲଭା କହିଛନ୍ତି, ‘ଆମେ, ତ୍ରି-ବାହିନୀ କମାଣ୍ଡର ଏବଂ ପୁଲିସ ମହାନିରୀକ୍ଷକ ବାଚସ୍ପତି ମହିନ୍ଦା ୟାପା ଆବେୱାର୍ଡେନାଙ୍କୁ ଏକ ସର୍ବଦଳୀୟ ବୈଠକ ଡାକିବାକୁ ଏବଂ ଏକ ନୂତନ ରାଷ୍ଟ୍ରପତି ନିଯୁକ୍ତି ପାଇଁ ସାମ୍ପ୍ରତିକ ବିବାଦର ରାଜନୈତିକ ସମାଧାନ ସୁନିଶ୍ଚିତ କରିବା ପାଇଁ ସେମାନେ ଗ୍ରହଣ କରୁଥିବା ପଦକ୍ଷେପ ବିଷୟରେ ଆମକୁ ଜଣାଇବାକୁ ଅନୁରୋଧ କରିଛୁ’।

ଶ୍ରୀଲଙ୍କାରେ ବଢୁଥିବା ରାଜନୈତିକ ସଙ୍କଟ ଏବଂ ଦେଶରୁ ରାଷ୍ଟ୍ରପତି ଗୋଟାବାୟା ରାଜପାକ୍ଷେଙ୍କ ପଳାୟନ ପରେ ଆରମ୍ଭ ହୋଇଥିବା ବିକ୍ଷୋଭର ଏକ ନୂତନ ତରଙ୍ଗ ଦେଖିବାକୁ ମିଳୁଛି। ଏ ପରିସ୍ଥିତିରେ ଜରୁରୀକାଳୀନ ପରିସ୍ଥିତିକୁ ଅସ୍ୱୀକାର କରି ଶ୍ରୀଲଙ୍କା ପତାକା ହାତରେ ଧରି ରାଜରାସ୍ତାରେ ବୁଲୁଥିବା ହଜାର ହଜାର ବିକ୍ଷୋଭକାରୀ ପ୍ରଧାନମନ୍ତ୍ରୀଙ୍କ କାର୍ଯ୍ୟାଳୟକୁ ଘେରି ରହିଛନ୍ତି। ପୁଲିସ ବିକ୍ଷୋଭକାରୀଙ୍କ ଉପରେ ଲୁହବୁହା ଗ୍ୟାସ ପ୍ରୟୋଗ କରିଥିଲା, ଯେଉଁମାନେ ଏକ ବ୍ୟାରିକେଡ୍‌ ଭାଙ୍ଗି ପ୍ରଧାନମନ୍ତ୍ରୀଙ୍କ କାର୍ଯ୍ୟାଳୟରେ ଆକ୍ରମଣ କରିଥିଲେ ଏବଂ ତାଙ୍କ ଇସ୍ତଫା ଦାବୀ କରିଥିଲେ।

ସମ୍ବନ୍ଧିତ ଖବର