୫.୩ ନିୟୁତ ଡଲାରରେ ବିକ୍ରି ହେଲା ବୃହତ୍ତମ ମଙ୍ଗଳ ପଥର

ନ୍ୟୁୟର୍କ: ଚଳିତ ସପ୍ତାହରେ ମଙ୍ଗଳ ଗ୍ରହର ୨୪.୫ କିଲୋଗ୍ରାମ୍ ଓଜନର ଏକ ଉଲ୍‌କାପିଣ୍ଡ ୫.୩ ନିୟୁତ ଡଲାରରେ ବିକ୍ରି ହୋଇ ରେକର୍ଡ ସୃଷ୍ଟି କରିଛି। ଏନ୍‌ଡବ୍ଲୁଏ-୧୬୭୮୮ ଭାବେ ନାମିତ ଏହି ଉଲ୍‌କାପିଣ୍ଡ ସୋଥବିର ନ୍ୟୁୟର୍କ ନିଲାମ ସମୟରେ ଉତ୍ସାହ ସୃଷ୍ଟି କରିଥିଲା। ନଭେମ୍ବର ୨୦୨୩ରେ ସାହାରା ମରୁଭୂମିର ନାଇଜରର ଦୁର୍ଗମ ଆଗାଡେଜ ଅଞ୍ଚଳରେ ଜଣେ ଅଭିଜ୍ଞ ଉଲ୍‌କାପିଣ୍ଡ ସଂଗ୍ରହକାରୀଙ୍କ ଦ୍ୱାରା ଏହା ଆବିଷ୍କୃତ ହୋଇଥିଲା। 

ବିଶେଷଜ୍ଞଙ୍କ କହିବା ଅନୁଯାୟୀ, ପ୍ରାୟ ୫୦ ଲକ୍ଷ ବର୍ଷ ପୂର୍ବେ ଏକ ଶକ୍ତିଶାଳୀ ଗ୍ରହାଣୁ ବା ଧୂମକେତୁର ପ୍ରଭାବରେ ଏହି ପଥର ମଙ୍ଗଳ ଗ୍ରହ ପୃଷ୍ଠରୁ ଛିଟିକି ପୃଥିବୀକୁ ଖସିବା ପୂର୍ବରୁ ମହାକାଶ ଦେଇ ୧୪୦ ନିୟୁତ ମାଇଲ ଅତିକ୍ରମ କରିଥିଲା। ସୋଥବିର ଉପାଧ୍ୟକ୍ଷ ତଥା ବିଜ୍ଞାନ ଓ ପ୍ରାକୃତିକ ଇତିହାସର ଗ୍ଲୋବାଲ ହେଡ୍ କାସାନ୍ଦ୍ରା ହାଟନ୍ କହିଛନ୍ତି, ଏହା ଅବିଶ୍ୱସନୀୟ ଯେ ଏହା ମରୁଭୂମିରେ ପଡ଼ିଛି, ଯେଉଁଠାରେ ଏହାର ମହତ୍ତ୍ୱକୁ ଚିହ୍ନିପାରୁଥିବା ଜଣେ ବ୍ୟକ୍ତି ଏହାକୁ ପାଇଥିଲେ। ଏଭଳି ଅଧିକାଂଶ କ୍ଷୁଦ୍ର ମହାକାଶୀୟ ପିଣ୍ଡ ପୃଥିବୀର ବାୟୁମଣ୍ଡଳରେ ଜଳିଯାଏ କିମ୍ବା ସମୁଦ୍ରରେ ପଡ଼ିଥାଏ। ପରୀକ୍ଷାଗାରରେ ପରୀକ୍ଷଣ ପରେ ବୈଜ୍ଞାନିକମାନେ ଏହା ମଙ୍ଗଳ ଗ୍ରହର ବୋଲି ନିଶ୍ଚିତ କରିଥିଲେ। ପୃଥିବୀରେ ପଡ଼ିଥିବା  ଅନ୍ୟ ମଙ୍ଗଳ ପଥରଠାରୁ ଏହା ପ୍ରାୟ ୭୦% ବଡ଼।