ମୁମ୍ବାଇର ତାଜ ହୋଟେଲକୁ ଉଡ଼ାଇଦେବାକୁ ଲସ୍କର-ଇ-ତୋଇବାର ଧମକ
ମୁମ୍ବାଇ : ପୁଣି ଥରେ ଚର୍ଚ୍ଚାକୁ ଆସିଛି ମୁମ୍ବାଇର ପ୍ରସିଦ୍ଧ ତାଜ ହୋଟେଲ । ଏହି ହୋଟେଲକୁ ଉଡ଼ାଇଦେବାକୁ ଧମକ ମିଳିଛି । ଗତ ରାତି ସାଢେ ୧୨ଟା ସମୟରେ ପାକିସ୍ତାନରୁ କେହି ଜଣେ ଫୋନ କରି ଏହାକୁ ଉଡ଼ାଇଦେବାକୁ ଧମକ ଦେଇଛି । ଏହା ପରେ ତାଜ ପରିସରରେ ସୁରକ୍ଷା ବ୍ୟବସ୍ଥାକୁ କଡ଼ାକଡ଼ି କରାଯାଇଛି ।
Sambad is now on WhatsApp
Join and get latest news updates delivered to you via WhatsApp
ମିଳିଥିବା ସୂଚନା ଅନୁସାରେ ରାତି ସାଢେ ୧୨ଟା ସମୟରେ ଏକ ପାକିସ୍ତାନୀ ନମ୍ବରରୁ ତାଜର କର୍ମଚାରୀଙ୍କ ନିକଟକୁ ଏହି ଫୋନ ଆସିଥିଲା । ସଂପୃକ୍ତ ବ୍ୟକ୍ତି ନିଜକୁ ଲସ୍କର-ଇ-ତୋଇବାର ସଦସ୍ୟ କହୁଥିଲା ଓ ୨୦୦୮ ପରି ତାଜକୁ ଉଡ଼ାଇଦେବାକୁ ଧମକ ଦେଇଥିଲା ।
ଏହାର କିଛି ସମୟ ପରେ ବାନ୍ଦ୍ରାସ୍ଥିତ ତାଜଲାଣ୍ଡସ ହୋଟେଲ କୁ ଆଉ ଏକ ଫୋନ ଆସି ସମାନ ଧରଣର ଧମକ ଆସିଥିଲା । ଏଥର ମଧ୍ୟ ସେହି ବ୍ୟକ୍ତି ନିଜକୁ ଲସ୍କର-ଇ-ତୋଇବାର ସଦସ୍ୟ କହୁଥିଲା ଓ ଉକ୍ତ ହୋଟେଲକୁ ଉଡ଼ାଇଦେବାକୁ ଧମକ ଦେଇଥିଲା । ଏହି ଦୁଇଟିଯାକ ଫୋନ ସମାନ ପାକିସ୍ତାନୀ ନମ୍ବରରୁ ଆସିଥିଲା ।
ହୋଟେଲ ପକ୍ଷରୁ ପୁଲିସକୁ ଏ ସଂପର୍କରେ ସୂଚୀତ କରାଯାଇଛି । ପୁଲିସ ଘଟଣାର ତଦନ୍ତ କରୁଛି ଓ ହେଟେଲର ସୁରକ୍ଷା ବଢାଇଦେଇଛି ।
୨୦୦୮ ନଭେମ୍ବର ୨୬ରେ ପାକିସ୍ତାନୀ ଆତଙ୍କବାଦୀମାନେ ତାଜ ହୋଟେଲ ସହ ମୁମ୍ବାଇର ବିଭିନ୍ନ ସ୍ଥାନରେ ଆକ୍ରମଣ କରିଥିଲେ । ତାଜରେ ବନ୍ଧକ ଥିବା ପର୍ଯ୍ୟଟକଙ୍କୁ ଏନଏସଜି କମାଣ୍ଡୋ ମୁକ୍ତ କରିଥିଲେ ।