ନୂଆଦିଲ୍ଲୀ : ଭାରତୀୟ ସେନାରେ ସାମିଲ ହୋଇଛି ସ୍ବଦେଶୀ ଜ୍ଞାନକୌଶଳରେ ନିର୍ମିତ ଲାଇଟ୍ କମ୍ବାଟ୍ ହେଲିକପ୍ଟର (ଏଲସିଏଚ୍ ) । ହିନ୍ଦୁସ୍ତାନ ଏରୋନୋଟିକ୍ସ ଲିମିଟେଡ୍ (ହାଲ୍) ପକ୍ଷରୁ ନିର୍ମିତ ଏହି ହେଲିକପ୍ଟରକୁ ହାଲ ପକ୍ଷରୁ ଭାରତୀୟ ସେନାର ବିମାନ ବାହିନୀ ( ଆର୍ମି ଏଭିଏସନ କୋର୍)କୁ ହସ୍ତାନ୍ତର କରାଯାଇଛି । ଯୁଦ୍ଧ କ୍ଷେତ୍ରରେ ଅତ୍ୟନ୍ତ ଦକ୍ଷ ଓ ଦ୍ରୁତ କୁହାଯାଉଥିବା ଏହି ହେଲିକପ୍ଟର ସେନାର କ୍ଷମତାକୁ ବୃଦ୍ଧି କରିବାରେ ସହାୟକ ହେବ।
Sambad is now on WhatsApp
Join and get latest news updates delivered to you via WhatsApp
ପୂର୍ବରୁ ଭାରତ ରୁଷ ନିର୍ମିତ ହେଲିକପ୍ଟର କିମ୍ବା ଆମେରିକା ନିର୍ମିତ ଆପାଚେ ହେଲିକପ୍ଟର ବ୍ୟବହାର କରୁଥିଲା । ସରକାର ମେକ-ଇନ-ଇଣ୍ଡିଆ କାର୍ଯ୍ଯକ୍ରମ ମାଧ୍ୟମରେ ପ୍ରତିରକ୍ଷା କ୍ଷେତ୍ରକୁ ଆତ୍ମନିର୍ଭରଶୀଳ କରିବାକୁ ଉଦ୍ୟମ କରୁଥିବାବେଳେ ଏହି ହେଲିକପ୍ଟର ସେ ଦିଗରେ ଏକ ମହତ୍ତ୍ବପୂର୍ଣ୍ଣ ପଦକ୍ଷେପ ହେବ । ପୂର୍ବରୁ ଭାରତ ସ୍ବଦେଶୀ ଜ୍ଞାନକୌଶଳରେ ଲଢୁଆ ବିମାନ ଏଲସିଏ ( ତେଜସ୍) ନିର୍ମାଣ କରିଥିବାବେଳେ ଏବେ ଏଲସିଏଚ୍ ନିର୍ମାଣରେ ବି ଭାରତ ସଫଳ ହୋଇଛି ।
ଏହି ହେଲିକପ୍ଟରକୁ ଭାରତୀୟ ବାୟୁସେନାରେ ବି ସାମିଲ କରାଯିବ । ଏହା ସହିତ ଏହାକୁ ଭାରତ ଅନ୍ୟ ଦେଶମାନଙ୍କୁ ରପ୍ତାନି କରିବା ପାଇଁ ବି ଲକ୍ଷ୍ୟ ରଖିଛି ।
ଗୁରୁତ୍ବପୂର୍ଣ୍ଣ କଥା ହେଉଛି ଏହି ଲାଇଟ୍ କମ୍ବାଟ୍ ହେଲିକପ୍ଟର (ଏଲସିଏଚ୍)କୁ ସେନା ପକ୍ଷରୁ ରାଜସ୍ତାନର ଲଙ୍ଗେଓ୍ବାଲାଠାରେ ମୁତୟନ କରାଯିବ । ଏହି ଲଙ୍ଗେଓ୍ବାଲାରେ ହିଁ ଭାରତୀୟ ସେନା ୧୯୭୧ ଯୁଦ୍ଧରେ ପାକିସ୍ତାନୀ ସେନାର ଆକସ୍ମିକ ଆକ୍ରମଣର ମୁହଁତୋଡ ଜବାବ ଦେଇଥିଲା ।