ଲାଉଡସ୍ପିକର ବିବାଦକୁ ଅର୍ଥହୀନ କହି ଏ ବିଷୟରେ ଆଲୋଚନା ପାଇଁ ମନାକଲେ ବିହାର ମୁଖ୍ୟମନ୍ତ୍ରୀ ନୀତୀଶ
ପାଟନା: ବିହାର ମୁଖ୍ୟମନ୍ତ୍ରୀ ନୀତୀଶ କୁମାର ଶନିବାର ପୂଜାସ୍ଥାନରେ ଲାଉଡସ୍ପିକର ବ୍ୟବହାରକୁ ନେଇ ସଂପ୍ରତି ସୃଷ୍ଟି ହୋଇଥିବା ବିବାଦକୁ ଖାରଜ କରି ଏହାକୁ ଏକ ଅର୍ଥହୀନ ପ୍ରସଙ୍ଗ ବୋଲି କହିଛନ୍ତି ଏବଂ ତାଙ୍କ ସରକାର ଧାର୍ମିକ ପ୍ରଥାରେ ହସ୍ତକ୍ଷେପ କରନ୍ତି ନାହିଁ ବୋଲି ଦୃଢୋକ୍ତି ପ୍ରକାଶ କରିଛନ୍ତି।
Sambad is now on WhatsApp
Join and get latest news updates delivered to you via WhatsApp
ଏକ କାର୍ଯ୍ୟକ୍ରମ ଅବସରରେ ବିହାରର ପୂର୍ଣ୍ଣିଆ ଜିଲ୍ଲାରେ ସାମ୍ବାଦିକମାନଙ୍କ ସହ ଆଲୋଚନା ବେଳେ ମୁଖ୍ୟମନ୍ତ୍ରୀ ନୀତୀଶ କୁମାର ଏହି ବିବାଦ ଉପରେ ପ୍ରତିକ୍ରିୟା ପ୍ରକାଶ କରିଥିଲେ।
ମୁଖ୍ୟମନ୍ତ୍ରୀ ନୀତୀଶ କହିଥିଲେ, ‘ଆସନ୍ତୁ ଏହି ଅର୍ଥହୀନ ବିଷୟରେ କଥାବାର୍ତ୍ତା କରିବା ନାହିଁ। ଏହା ସମସ୍ତଙ୍କୁ ଜଣା ଯେ ବିହାରରେ ଆମେ କୌଣସି ପ୍ରକାରର ଧାର୍ମିକ ପ୍ରଥାରେ ହସ୍ତକ୍ଷେପ କରୁନାହୁଁ । ଅବଶ୍ୟ, କିଛି ଲୋକ ଭାବନ୍ତି ଯେ ଗଣ୍ଡଗୋଳ କରିବା ସେମାନଙ୍କର ବ୍ୟବସାୟ ଏବଂ ସେମାନେ ଏହାକୁ କରନ୍ତି’ ବୋଲି ନୀତୀଶ କହିଛନ୍ତି।
ମୁଖ୍ୟମନ୍ତ୍ରୀ ନୀତୀଶଙ୍କ ମନ୍ତବ୍ୟ ରାଜ୍ୟରେ ଭାରତୀୟ ଜନତା ପାର୍ଟି (ବିଜେପି) ନେତାଙ୍କ ଦାବି ଉପରେ ପର୍ଯ୍ୟବେସିତ ଥିଲା। କାରଣ ବିହାରର ନୀତୀଶ ସରକାର ମଧ୍ୟ ଉତ୍ତରପ୍ରଦେଶର ଯୋଗୀ ମଡେଲ ଅନୁସରଣ କରିବାକୁ ବିଜେପି ନେତାମାନେ ଦାବୀ କରୁଥିଲେ, ଯେଉଁଠାରେ ଉଚ୍ଚ ଡେସିବଲ୍ ଧ୍ୱନି ଦ୍ୱାରା ସୃଷ୍ଟି ହୋଇଥିବା ସ୍ୱାସ୍ଥ୍ୟ ବିପଦକୁ ଦର୍ଶାଇ ନିକଟରେ ପୂଜାସ୍ଥାନରୁ ହଜାର ହଜାର ଲାଉଡସ୍ପିକର ହଟାଇ ଦିଆଯାଇଛି।
ନୀତୀଶ କୁମାରଙ୍କ କ୍ୟାବିନେଟ୍ ସହକର୍ମୀ ତଥା ବିଜେପି ନେତା ଜାନକ ରାମ ଶୁକ୍ରବାର ଦିନ ଦୃଢୋକ୍ତି ପ୍ରକାଶ କରି କହିଥିଲେ ଯେ ଦେଶର ସର୍ବବୃହତ ରାଜ୍ୟ (ୟୁପି)ରେ ଏହି କଟକଣା ଲାଗୁ ହେବାପରେ ବିହାର ଏବେ ଏହାକୁ ଲାଗୁ କରିବାକୁ ବାଧ୍ୟ।