ଅପରାଧିକ ମାମଲାରେ ଜଡ଼ିତ ସାଂସଦ ଓ ବିଧାୟକଙ୍କ ବିଚାର ପାଇଁ ସ୍ୱତନ୍ତ୍ର ଅଦାଲତ ଗଠନ ହେଉ : ସୁପ୍ରିମକୋର୍ଟ
ନୂଆଦିଲ୍ଲୀ: ବୁଧବାର ସୁପ୍ରିମକୋର୍ଟ କେନ୍ଦ୍ର ସରକାରଙ୍କୁ ଏକ ଯୋଜନା ପ୍ରସ୍ତୁତ କରିବାକୁ କହିଛନ୍ତି, ଯାହା ମାଧ୍ୟମରେ ବିଭିନ୍ନ ଅପରାଧରେ ଜଡ଼ିତ ବିଧାୟକ ଓ ସାଂସଦଙ୍କ ତ୍ୱରିତ ବିଚାର ଲାଗି ସ୍ୱତନ୍ତ୍ର ଅଦାଲତ ଗଠନ ହୋଇପାରିବ। ଏହି ଅଦାଲତ ପ୍ରତିଷ୍ଠା ପାଇଁ କେତେ ସମୟ ଓ କେତେ ଟଙ୍କା ଖର୍ଚ୍ଚ ହେବ ତାହାର ସୂଚନା ୬ ସପ୍ତାହ ମଧ୍ୟରେ ଦେବା ପାଇଁ କେନ୍ଦ୍ର ସରକାରଙ୍କୁ ନିର୍ଦ୍ଦେଶ ଦେଇଛନ୍ତି ଶୀର୍ଷ ଅଦାଲତ। ଏହାପରେ ଏହି ସ୍ୱତନ୍ତ୍ର ଅଦାଲତରେ ବିଚାରପତି ନିୟୁକ୍ତି ଓ ଢ଼ାଞ୍ଚା କିପରି ହେବ, ତାହା ସ୍ଥିର ହେବ।
Sambad is now on WhatsApp
Join and get latest news updates delivered to you via WhatsApp
ଏହି ପ୍ରସଙ୍ଗରେ କେନ୍ଦ୍ର ସରକାର ସୁପ୍ରିମକୋର୍ଟଙ୍କୁ କହିଛନ୍ତି, ଏହି ମାମଲାରେ ନିର୍ବାଚନ କମିସନ ଓ ଆଇନ କମିସନଙ୍କ ସୁପାରିଶ ସହ ସରକାର ଏକମତ ଅଛନ୍ତି। ଅପରାଧିକ ମାମଲାରେ ଦୋଷୀସାବ୍ୟସ୍ତ ହେଉଥିବା ରାଜନେତାଙ୍କ ଉପରେ ଜୀବନବ୍ୟାପି ପ୍ରତିବନ୍ଧକ ଲାଗୁ ପ୍ରସ୍ତାବ ଉପରେ ସକ୍ରିୟ ଭାବେ ବିଚାର-ବିମର୍ଷ କରାଯାଉଛି।
ବିଚାରପତି ରଞ୍ଜନ ଗୋଗୋଇ ଓ ନବୀନ ସିହ୍ନାଙ୍କ ଖଣ୍ଡପୀଠ ଅପରାଧିକ ମାମଲାରେ ଦୋଷୀସାବ୍ୟସ୍ତ ହେଉଥିବା ସାଂସଦ ଓ ବିଧାୟକଙ୍କ ବିଚାର ପାଇଁ ଏକ ସ୍ୱତନ୍ତ୍ର ଅଦାଲତ ପ୍ରସ୍ତୁତ ହେବ ବୋଲି କହିଛନ୍ତି। ସ୍ୱତନ୍ତ୍ର ଅଦାଲତର ପ୍ରସଙ୍ଗ ଉପରେ କେନ୍ଦ୍ରସରକାର ବି ସମର୍ଥନ ଜଣାଇଛନ୍ତି।
ସୁପ୍ରିମକୋର୍ଟ ସରକାରଙ୍କୁ ପ୍ରଶ୍ନ କରିଛନ୍ତି କି, ୨୦୧୪ରେ ସାଂସଦ ଓ ବିଧାୟକଙ୍କ ଉପରେ ୧୫୮୧ଟି ମାମଲା ରୁଜୁ ହୋଇଥିଲା ବେଳେ କେତେଟିର ସମାଧାନ ହୋଇଛି, ତାହା ଜଣାଯାଉ। ଏହାବାଦ୍ କୋର୍ଟ ୨୦୧୪ରୁ ୨୦୧୭ ମଧ୍ୟରେ ରାଜନେତାଙ୍କ ବିରୋଧରେ ରୁଜୁ ହୋଇଥିବା ଅପରାଧିକ ମାମଲାର ତାଲିକା ବି ମାଗିଛନ୍ତି।