ସମ୍ବଲପୁର : ଆଜି ଓଡ଼ିଶାର ସମ୍ବଲପୁରରେ ନିର୍ବାଚନୀ ରାଲିରେ ଯୋଗ ଦେଇଥିଲେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ । ଏଠାରେ ନିଜ ଭାଷଣରେ ସେ ଓଡ଼ିଶାରେ ଥିବା ନିଜର ଦୁଇ ବିପକ୍ଷ ଦଳ କଂଗ୍ରେସ ଏବଂ ବିଜୁ ଜନତା ଦଳକୁ କଟାକ୍ଷ କରିଥିବା ଦେଖାଯାଇଥିଲା । ଓଡ଼ିଶାର ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ନାଁ ନ ନେଇ ରାଜ୍ୟରେ କୃଷକମାନଙ୍କୁ ସାହାଯ୍ୟ ଯୋଗାଇ ଦେବା ରାସ୍ତାରେ ସେ ବାଧା ସାଜୁଥିବା କହିଥିଲେ ମୋଦୀ । ଓଡ଼ିଶାର ଜନତା ୨୦ବର୍ଷ ହେଲାଣି ଗୋଟେ ସରକାର ଉପରେ ଭରସା କରି ଆସୁଛନ୍ତି । କିନ୍ତୁ ଏବେ ଲୋକମାନେ ନିଜର ନିଷ୍ପତ୍ତି ବଦଳାଇବାକୁ ଚାହୁଁଛନ୍ତି ।
Sambad is now on WhatsApp
Join and get latest news updates delivered to you via WhatsApp
ଓଡ଼ିଶାରେ ରାଜ୍ୟ ସରକାର ଏକ ଟଙ୍କାରେ ୧କେଜି ଚାଉଳ ଦେଉଥିବା ନେଇ ଦାବି କରି ଆସୁଥିବା ବେଳେ ପ୍ରକୃତରେ ଏଥିରେ କେନ୍ଦ୍ରର ହାତ ରହିଛି, ତାହା ଜଣାଉ ନାହାନ୍ତି । ଦିଲ୍ଲୀରେ ଥିବା ଚୌକିଦାର ସରକାର ଗୋଟେ କିଲୋ ଚାଉଳକୁ ୨୯ ବା ୩୦ଟଙ୍କାରେ କିଣି ତାକୁ ଗରିବ ରାଜ୍ୟ ଗୁଡ଼ିକ ପଠାଉଛି । ରାଜ୍ୟ ସରକାର ଏହାକୁ କିଣିବାରେ ମାତ୍ର ୧ ବା ୨ ଟଙ୍କା ଖର୍ଚ୍ଚ କରି ଲୋକମାନଙ୍କୁ କମ୍ ଦାମ୍ରେ ଯୋଗାଇ ଦେଉଥିବା ନେଇ ଦାବି କରି ଆସୁଛନ୍ତି । କିନ୍ତୁ ଏଥିରେ କୌଣସି ସତ୍ୟତା ନାହିଁ । କାରଣ ଦିଲ୍ଲୀରୁ ଆସୁଥିବା ସାହାଯ୍ୟକୁ ସେ ପୋଷ୍ଟମ୍ୟାନ୍ ଭଳି ଓଡ଼ିଶାର ଲୋକମାନଙ୍କୁ ଦେଉଛନ୍ତି । ଯଦି ଆପଣଙ୍କ ପୁଅ ଦିଲ୍ଲୀରେ ରହି ଘରକୁ ଘର ଖର୍ଚ୍ଚ ପଠାଏ ଏବଂ ତାକୁ ଘରେ ଆଣି ପୋଷ୍ଟମ୍ୟାନ୍ ଦେଇଯାଏ । ତା’ମାନେ କ’ଣ ସେ ଟଙ୍କା ପୋଷ୍ଟମ୍ୟାନ୍ ଦେଉଛି ? ମୁଁ କହୁନାହିଁ କି ରାଜ୍ୟ ସରକାର ଲୋକମାନଙ୍କୁ ସାହାଯ୍ୟ କରିବା ପାଇଁ କିଛି କରୁ ନାହାନ୍ତି । କିନ୍ତୁ ସେ ସାହାଯ୍ୟ କେଉଁଠୁ ଆସୁଛି ସେଇଟା ଲୋକମାନଙ୍କୁ ଜଣାଇବା ଦରକାର ବୋଲି କହିଥିଲେ ମୋଦୀ ।