ଏପଟେ ନିଆଁ ଜଳୁଥିଲା, ସେପଟେ ମଦ ଲୁଟୁଥିଲେ ଲୁଟେରା
ନୂଆଦିଲ୍ଲୀ: ଦିଲ୍ଲୀରେ ଜଳୁଛି ନାଗରିକତା ଆଇନ ନିଆଁ । ନାଗରିକତା ସଂଶୋଧନ ଆଇନକୁ ନେଇ ଦୁଇ ଗୋଷ୍ଠୀ ମଧ୍ୟରେ ଆରମ୍ଭ ହୋଇଥିବା ବିବାଦ ତୀବ୍ର ରୂପ ଧାରଣ କରିଛି । ଆଉ ଏହାରି ଭିତରେ ଏମିତି ଏକ ଖବର ସାମ୍ନାକୁ ଆସିଛି, ଯାହା ସମସ୍ତଙ୍କୁ ଆଶ୍ଚର୍ଯ୍ୟ କରିଦେଇଛି । ଏକ ମଦ ଦୋକାନରୁ ପାଖାପାଖି ୮୦ ଲକ୍ଷ ଟଙ୍କାର ବିୟର ଏବଂ ୱାଇନ୍ ଲୁଟି ନେଇଛନ୍ତି ଲୁଟେରା । ଗତ ସୋମବାର ଚାନ୍ଦବାଗରେ ଘଟିଥିଲା କିଛି ଏମିତି ଘଟଣା ।
Sambad is now on WhatsApp
Join and get latest news updates delivered to you via WhatsApp
ମଦ ଦୋକାନର ମ୍ୟାନେଜରଙ୍କ କହିବା ଅନୁଯାୟୀ, ହିଂସାକାରୀମାନେ ହଠାତ ଦୋକାନ ଭିତରକୁ ପଶି ଆସିଥିଲେ ଏବଂ ଭଙ୍ଗାରୁଜା କରିଥିଲେ । କେବଳ ଏତିକି ନୁହେଁ ଦୋକାନ ଭିତରେ ଥିବା ମଦ ମଧ୍ୟ ଲୁଟିନେଇଥିଲେ ଲୁଟେରା । ଯାହାର ମୂଲ୍ୟ ପାଖାପାଖି ୮୦ ଲକ୍ଷ ଟଙ୍କା ହେବ । ହିଂସାକାରୀମାନେ ଅଧିକ ସଂଖ୍ୟାରେ ଥିବାରୁ ଦୋକାନରେ ଥିବା କର୍ମଚାରୀମାନେ ମଧ୍ୟ କିଛି କରିପାରିନଥିଲେ ।
ଭିଡ ଭିତରେ ମଦ ଲୁଟିବା ସହ ସ୍କାନର ମେସିନ୍, ଏଲଇଡି ଟିଭି, ସିସିଟିଭି ସିଷ୍ଟମ, ଦୁଇଟି ଫ୍ରିଜ୍ ମଧ୍ୟ ଭାଙ୍ଗିଦେଇଛନ୍ତି ହିଂସାକାରୀ । ମଦ ଦୋକାନର ମ୍ୟାନେଜରଙ୍କ କହିବା ଅନୁଯାୟୀ, ସେ ପୁଲିସକୁ ସଙ୍ଗେ ସଙ୍ଗେ ଏନେଇ ସୂଚନା ଦେଇଥିଲେ ମଧ୍ୟ, ଘଟଣାସ୍ଥଳରେ ପୁଲିସ ପହଞ୍ଚିନଥିଲା |