ଦିଲ୍ଲୀରେ ସଫଳ ହୋଇଛି ଲକଡାଉନ, କମୁଛି ସଂକ୍ରମଣ: ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲ

ନୂଆଦିଲ୍ଲୀ: ଦିଲ୍ଲୀରେ ସଫଳ ହୋଇଛି ଲକଡାଉନ | ଦିନକୁ ଦିନ କମୁଛି ସଂକ୍ରମଣ | ଆଜି ଏବିଷୟରେ ଜଣାଇଛନ୍ତି ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲ | ଦିଲ୍ଲୀରେ ସଂକ୍ରମଣ ବଢିବା ସହ ଅମ୍ଳଜାନର ଅଭାବ ଦେଖାଦେବା ପରେ ଦିଲ୍ଲୀ ସରକାର ଲକଡାଉନ ଘୋଷଣା କରିଥିଲେ, ଯାହା ଏବେ ସଫଳ ହୋଇଥିବା କହିଛନ୍ତି ଅରବିନ୍ଦ କେଜ୍ରିୱାଲ |

ସେ କହିଛନ୍ତି ଯେ, ଦିଲ୍ଲୀରେ କରୋନା ଆକ୍ରାନ୍ତଙ୍କ ସଂଖ୍ୟା ହ୍ରାସ ପାଇବାରେ ଲାଗିଛି। ଲୋକଙ୍କ ସହଯୋଗ ପାଇଁ ଲକଡାଉନ୍ ସଫଳ ହେଲା | ଗତ କିଛି ଦିନ ମଧ୍ୟରେ ଆମେ ଅମ୍ଳଜାନ ଶଯ୍ୟା ସଂଖ୍ୟା ବୃଦ୍ଧି କରିଛୁ | ଗତକାଲି, ଆମେ ଜିଟିବି ହସ୍ପିଟାଲ ନିକଟରେ ୫୦୦ ନୂତନ ଆଇସିୟୁ ବେଡ୍ ଆରମ୍ଭ କଲୁ | ବର୍ତ୍ତମାନ ଦିଲ୍ଲୀରେ ଆଇସିୟୁ ଏବଂ ଅମ୍ଳଜାନ ଶଯ୍ୟାର ଅଭାବ ନାହିଁ।

ଏହା ସହ କରୋନା ଟିକାକୁ ନେଇ ସେ କହିଛନ୍ତି ଯେ, କେବଳ ୨ଟି କମ୍ପାନି ଟିକା ଉତ୍ପାଦନ କରୁଛନ୍ତି। ସେମାନେ ମାସକୁ ମାତ୍ର ୬-୭ କୋଟି ଟିକା ଉତ୍ପାଦନ କରନ୍ତି | ଏମିତି ଚାଲିଲେ ସମସ୍ତଙ୍କ ଟିକାକରଣ ପାଇଁ ୨ବର୍ଷରୁ ଅଧିକ ସମୟ ଲାଗିବ | ସେତେବେଳକୁ କରୋନାର ଅନେକ ତରଙ୍ଗ ଆସି ଯାଇଥିବ | ସେଥିପାଇଁ ଯୁଦ୍ଧକାଳୀନ ଭିତ୍ତିରେ ଟିକା ଉତ୍ପାଦନ ବୃଦ୍ଧି ଏବଂ ସମସ୍ତଙ୍କୁ ଟିକାକରଣ ପାଇଁ ଏକ ଜାତୀୟ ଯୋଜନା ପ୍ରସ୍ତୁତ କରିବା ଗୁରୁତ୍ୱପୂର୍ଣ୍ଣ |

ଅନ୍ୟପକ୍ଷରେ ଦିଲ୍ଲୀର ସ୍ୱାସ୍ଥ୍ୟମନ୍ତ୍ରୀ ସତ୍ୟେନ୍ଦ୍ର ଜୈନ କହିଛନ୍ତି, “ଗତ କିଛି ଦିନ ମଧ୍ୟରେ ଦିଲ୍ଲୀରେ ପଜିଟିଭିଟି ହାର ୩୬% ରୁ ୧୯.୧% କୁ ହ୍ରାସ ପାଇଛି। ଆକ୍ରାନ୍ତଙ୍କ ସଂଖ୍ୟା ମଧ୍ୟ ଦିନକୁ ୨୮,୦୦୦ ରୁ ପ୍ରାୟ ୧୨,୫୦୦ କୁ ହ୍ରାସ ପାଇଛି।