ଆଜିଠାରୁ ଲୋକସଭା ଅଧିବେଶନ: ଶପଥ ନେବେ ପ୍ରଧାନମନ୍ତ୍ରୀ, ମନ୍ତ୍ରୀ ଓ ସାଂସଦ
ଜୁନ୍ ୨୬ରେ ବାଚସ୍ପତି ନିର୍ବାଚନ
ନୂଆଦିଲ୍ଲୀ: ଅଷ୍ଟାଦଶ ଲୋକସଭାର ପ୍ରଥମ ଅଧିବେଶନ ଆସନ୍ତାକାଲିଠାରୁ ଆରମ୍ଭ ହେବ। ପ୍ରଥମ ଦିବସରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ସମେତ ନବନିର୍ବାଚିତ ସାଂସଦମାନେ ଶପଥ ଗ୍ରହଣ କରିବେ। ୨୬ ତାରିଖ ଦିନ ବାଚସ୍ପତି ନିର୍ବାଚନ ହେବ ଏବଂ ୨୭ ତାରିଖରେ ରାଷ୍ଟ୍ରପତି ଦ୍ରୌପଦୀ ମୁର୍ମୁ ଉଭୟ ଗୃହର ମିଳିତ ଅଧିବେଶନରେ ଉଦ୍ବୋଧନ ଦେବେ। ଏପ୍ରିଲ-ଜୁନ୍ରେ ସାଧାରଣ ନିର୍ବାଚନ ହେବା ପରେ ଏହା ହେଉଛି ପ୍ରଥମ ଲୋକସଭା ଅଧିବେଶନ। ଅଷ୍ଟାଦଶ ଲୋକସଭାରେ ଏନଡିଏ ପାଖରେ ୨୯୩ଟି ଆସନ ସହ ସଂଖ୍ୟାଗରିଷ୍ଠତା ଥିବା ବେଳେ ବିଜେପି ପାଖରେ ୨୪୦ଟି ଆସନ ରହିଛି। ତେବେ ବିଜେପି ଏକାକୀ ସଂଖ୍ୟାଗରିଷ୍ଠତା ସଂଖ୍ୟା ୨୭୨ଠାରୁ ପଛରେ ରହିଛି। ବିରୋଧୀ ଇଣ୍ଡି ମେଣ୍ଟ ପାଖରେ ୨୩୪ଟି ଆସନ ଥିବା ବେଳେ କଂଗ୍ରେସର ୯୯ଟି ଆସନ ରହିଛି। ଆସନ୍ତାକାଲି ପୂର୍ବାହ୍ନ ୧୧ଟାରୁ ପ୍ରଧାନମନ୍ତ୍ରୀ ମୋଦୀ ଏବଂ ତାଙ୍କ ମନ୍ତ୍ରିମଣ୍ଡଳ ସଦସ୍ୟମାନେ ଶପଥ ଗ୍ରହଣ କରିବେ। ପ୍ରଧାନମନ୍ତ୍ରୀ ଶପଥ ନେବା ପରେ ଅନ୍ୟ ମନ୍ତ୍ରୀମାନେ ଶପଥ ନେବେ। ଏହାପରେ ବିଭିନ୍ନ ରାଜ୍ୟର ସାଂସଦମାନେ ଶପଥ ଗ୍ରହଣ କରିବେ। ଆସନ୍ତାକାଲି ପ୍ରଧାନମନ୍ତ୍ରୀଙ୍କ ସମେତ ୨୮୦ ଜଣ ନବନିର୍ବାଚିତ ସାଂସଦ ଶପଥ ଗ୍ରହଣ କରିବେ ଏବଂ ୨୫ ତାରିଖରେ ଆଉ ୨୬୪ ଜଣ ସାଂସଦ ଶପଥ ଗ୍ରହଣ କରିବେ।
Sambad is now on WhatsApp
Join and get latest news updates delivered to you via WhatsApp
ବିଜେପି ନେତା ତଥା ୭ ଥର ସଦସ୍ୟ ଥିବା ଭର୍ତ୍ତୃହରି ମହତାବଙ୍କୁ ପ୍ରୋଟେମ୍ ବାଚସ୍ପତି ଭାବେ ନିଯୁକ୍ତିକୁ ନେଇ ସୃଷ୍ଟି ହୋଇଥିବା ବିବାଦ ଅଧିବେଶନ ଉପରେ ପ୍ରଭାବ ପକାଇବା ସମ୍ଭାବନା ରହିଛି। କଂଗ୍ରେସ ସଦସ୍ୟ କେ ସୁରେଶଙ୍କୁ ଏହି ପଦ ପାଇଁ ଦାବିକୁ ସରକାର ଅଣଦେଖା କରିଛନ୍ତି ବୋଲି ବିରୋଧୀ ଦଳମାନେ ଅଭିଯୋଗ କରିଛନ୍ତି। ସଂସଦୀୟ ବ୍ୟାପାର ମନ୍ତ୍ରୀ କିରଣ ରିଜିଜୁ କହିଛନ୍ତି ଯେ ମହତାବ ଲୋକସଭା ସଦସ୍ୟ ଭାବରେ ୭ ଥର ନିରବଚ୍ଛିନ୍ନ କାର୍ଯ୍ୟକାଳ ଅତିବାହିତ କରିଛନ୍ତି, ଯାହା ତାଙ୍କୁ ଏହି ପଦ ପାଇଁ ଯୋଗ୍ୟ କରିଛି। ସୁରେଶ ୧୯୯୮ ଏବଂ ୨୦୦୪ରେ ନିର୍ବାଚନ ହାରିଥିଲେ, ଯାହା ତାଙ୍କର ବର୍ତ୍ତମାନର କାର୍ଯ୍ୟକାଳକୁ ନିମ୍ନ ସଦନରେ କ୍ରମାଗତ ଚତୁର୍ଥ ଥରରେ ପରିଣତ କରିଛି। ସୋମବାର ରାଷ୍ଟ୍ରପତି ଦ୍ରୌପଦୀ ମୁର୍ମୁ ରାଷ୍ଟ୍ରପତି ଭବନରେ ମହତାବଙ୍କୁ ଲୋକସଭାର ପ୍ରୋଟେମ୍ ବାଚସ୍ପତି ଭାବେ ଶପଥ ପାଠ କରାଇବେ। ଏହାପରେ ମହତାବ ସଂସଦରେ ପହଞ୍ଚି ପୂର୍ବାହ୍ନ ୧୧ଟାରେ ଲୋକସଭା ଡାକିବେ।