ଲୋକସଭାରେ ମୋଟରଯାନ (ସଂଶୋଧନ) ବିଲକୁ ମଂଜୁରୀ
ନୂଆଦିଲ୍ଲୀ : ଲୋକସଭାରେ ଆଜି ମୋଟର ଯାନ (ସଂଶୋଧନ) ବିଲ୍ ପାଶ ହୋଇଛି । ୧୯୮୮ର ମୋଟରଯାନ ଆଇନର ସଂଶୋଧନ ଉଦ୍ଦେଶ୍ୟରେ ସରକାର ଗତ ୧୫ ତାରିଖରେ ଏହି ବିଲ ଉପସ୍ଥାପନ କରିଥିଲେ । ବାଚନିକ ଭୋଟରେ ଏହି ବିଲଟି ପାଶ ହୋଇଛି ବୋଲି ଘୋଷଣା କରିଛନ୍ତି ବାଚସ୍ପତି ଓମ ବିରଲା ।
Sambad is now on WhatsApp
Join and get latest news updates delivered to you via WhatsApp
ଏହି ସମାନ ବିଲଟି ଗତ ବର୍ଷ ମଧ୍ୟ ଲୋକସଭାରେ ପାଶ ହୋଇଥିଲା, ତେବେ ଏହା ରାଜ୍ୟ ସଭାରେ ପାଶ ହୋଇପାରିନଥିଲା । ଏହାପରେ ୧୬ତମ ଲୋକସଭା ଭାଙ୍ଗିଯିବା ସହ ବିଲଟି ଆଇନରେ ପରିଣତ ହୋଇପାରିନଥିଲା ।
ଏଥିରେ ଥିବା ପ୍ରସ୍ତାବିତ ନିୟମ ଅନୁସାରେ କାର ବା ଅନ୍ୟ ଗାଡ଼ି ଚାଳନା ବେଳେ ସିଟ ବେଲଟ ନ ଭିଡିଲେ ୧ ହଜାର ଟଙ୍କା ପର୍ଯ୍ୟନ୍ତ ଜୋରିମାନା ପଡିପାରେ । ଏବେ ଏହା ମାତ୍ର ୧୦୦ ଟଙ୍କା ରହିଛି । ସେହିପରି ଅଧିକ ବେଗରେ ଡ୍ରାଇଭିଂ କଲେ ୫ ହଜାର ଟଙ୍କା ପର୍ଯ୍ୟନ୍ତ ତଣ୍ଡ ଗଣିବାକୁ ହେବ । ମଦ ପିଇ ଡ୍ରାଇଭିଂ କଲେ ଜୋରିମାନା ପରିମାଣ ୨ ହଜାର ଟଙ୍କାରୁ ୧୦ ହଜାର ଟଙ୍କାକୁ ବୃଦ୍ଧି କରାଯାଇଛି । ଆମ୍ବୁଲାନ୍ସ ପରି ଜରୁରୀକାଳୀନ ସେବା ଯୋଗାଉଥିବା ଯାନକୁ ବାଟ ନ ଛାଡିଲେ ମଧ୍ୟ ୫ ହଜାର ଟଙ୍କା ପର୍ଯ୍ୟନ୍ତ ତଣ୍ଡ ଗଣିବାକୁ ପଡିପାରେ । ଅନ୍ୟପକ୍ଷରେ ଏହି ବିଲରେ ଡ୍ରାଇଭିଂ ଲାଇସେନ୍ସ ନିୟମରେ କେତେକ ପରବର୍ତ୍ତନର ବ୍ୟବସ୍ଥା ରହିଛି । ଏହା ଅନୁସାରେ ଡ୍ରାଇଭିଂ ଲାଇସେନ୍ସ ପାଇଁ ଆଧାର ବାଧ୍ୟତାମୂଳକ ହେବ । ସେହିପରି ପୂର୍ବରୁ ଡ୍ରାଇଭିଂ ଲାଇସେନ୍ସର ବୈଧତା ସମୟ ୨୦ ବର୍ଷ ଥିବାବେଳେ ଏବେ ତାହାକୁ ୧୦ ବର୍ଷକୁ ହ୍ରାସ କରିବାକୁ ପ୍ରସ୍ତାବ ରହିଛି ।