ଚୋରଙ୍କ ଗୁରୁ: ପୁଲିସ ଥାନାରୁ ଲୁଟିନେଲା ବନ୍ଧୁକ, ଗୁଳି
କାନପୁର: ପୁଲିସକୁ ଚ୍ୟାଲେଞ୍ଜ କଲା ଚୋର | ଥାନାରେ ପଶିଲା ଆଉ ଲୁଟିନେଲା ବନ୍ଧୁକ ସହ ଗୁଳି | କଥାଟି ଶୁଣିବାକୁ ଆଶ୍ଚର୍ଯ୍ୟ ଲାଗୁଥିଲେ ବି ଏକଥା ଏକଦମ ସତ | ଉତ୍ତରପ୍ରଦେଶର କାନପୁରରେ ଏଭଳି ଏକ ଘଟଣା ଘଟିଛି ଯାହାକି ପୁଲିସର ହୋସ ଉଡାଇ ଦେଇଛି | ଏଠାରେ ଚୋରମାନେ ନିଜେ ପୁଲିସ ଷ୍ଟେସନରେ ପଶି ବନ୍ଧୁକ ସହ ଗୁଳି ଲୁଟିନେଇଛନ୍ତି | କାନପୁରର ବିଧନୁ ପୁଲିସ ଷ୍ଟେସନରେ ଏହି ଘଟଣା ଘଟିଛି | ଏହି ଘଟଣା ଜଣାପଡିବା ପରେ କାନପୁରର ଆରକ୍ଷୀ ଅଧିକ୍ଷକ ତେଜ ସ୍ୱରୂପ ସିଂହ କହିଛନ୍ତି ଯେ ଥାନାରୁ ରାତିରେ ଗୋଟିଏ ପିସ୍ତଲ, ୧୦ଟି ଗୁଳି ଏବଂ ୨ଟି ମୋବାଇଲ ଚୋରି ହୋଇଛି | ତେବେ ଏହି ଘଟଣାରେ ଅବହେଳା ହେତୁ ୪ଜଣ ଅଧିକାରୀଙ୍କୁ ନିଲମ୍ବିତ କରାଯାଇଛି ଓ ବର୍ତ୍ତମାନ ଘଟଣାର ତଦନ୍ତ ଚାଲିଛି।
Sambad is now on WhatsApp
Join and get latest news updates delivered to you via WhatsApp
ସୂଚନା ଥାଉ କି ଯେ କିଛିଦିନ ତଳେ ଉତ୍ତରପ୍ରଦେଶର ଜଗଦୀଶପୁରା ପୁଲିସ ଷ୍ଟେସନରେ ମଧ୍ୟ ଏଭଳି ଏକ ଚୋରି ମାମଲା ସାମ୍ନାକୁ ଆସିଥିଲା | ଏଠାରେ ପୁଲିସ ଷ୍ଟେସନର ମାଲଖାନାରୁ ୨୫ ଲକ୍ଷ ଟଙ୍କା ଚୋରି ହେବାର ଖବର ସାମ୍ନାକୁ ଆସିଥିଲା। ସୂଚନାନୁସାରେ, ସକାଳେ ଡ୍ୟୁଟିରେ ଥିବା ହେଡକନେଷ୍ଟବଳ ଚା ପିଇବାକୁ ଯାଇଥିଲେ। ଚା ’ପିଇ ଫେରିବା ପରେ ତାଙ୍କର ସନ୍ଦେହ ହୋଇଥିଲା | ଏହାପରେ ଯେତେବେଳେ ପୁଲିସ ଅନୁସନ୍ଧାନ କଲା, ସେତେବେଳେ ମାଲଖାନାରେ ରଖାଯାଇଥିବା ୨୫ ଲକ୍ଷ ଟଙ୍କା ଚୋରି ହୋଇଥିବା ଜଣାପଡିଥିଲା | ଏହି ସୂଚନା ପାଇବା ପରେ ଖୋଦ ଏସପି ଫୋରେନସିକ୍ ଟିମ୍ ସହ ପହଞ୍ଚି ତଦନ୍ତ କରିଥିଲେ | ତେବେ କମ ଦିନ ମଧ୍ୟରେ ଦୁଇଟି ଥାନାରେ ଏଭଳି ଚୋରି ଘଟଣାକୁ ନେଇ ପୁଲିସ ଏବେ ଛାନଭିନ ଚଳାଇଛି |