ବିବାହିତ ମହିଳାଙ୍କୁ ଅବିବାହିତ ଦର୍ଶାଇ ବାହାଘର କରୁଥିଲେ, ଶ୍ୱଶୁରଘରୁ ଲୁଟିନେଉଥିଲେ ଟଙ୍କା ସହ ସୁନାଗହଣା

ଜୟପୁର: ବିବାହିତ ମହିଳାଙ୍କୁ ଅବିବାହିତ ଦର୍ଶାଇ ବାହାଘର କରାଉଥିଲେ | ବାହାଘରର କିଛିଦିନ ପରେ ସେହି ମହିଳାଙ୍କ ସହାୟତାରେ ଟଙ୍କା ସହ ସୁନାଗହଣା ଲୁଟୁଥିଲେ | ରାଜସ୍ଥାନର ଦୌସାରେ ପୁଲିସ ଏପରି ଏକ ଗ୍ୟାଙ୍ଗକୁ ଗିରଫ କରିଛି, ଯେଉଁମାନେ ଜାଲିଆତି କରି ଲୋକଙ୍କ ବିବାହ କରାଉଥିଲେ ଓ ବିବାହିତ ମହିଳାଙ୍କ ସାହାଯ୍ୟରେ ଲୁଟ୍ କରି ଚମ୍ପଟ ମାରୁଥିଲେ | ଏସପି ବନ୍ଦିତା ରାଣାଙ୍କ ନିର୍ଦ୍ଦେଶ କ୍ରମେ ଏକ ସ୍ୱତନ୍ତ୍ର ଟିମ ଗଠନ କରାଯାଇ ଏହି ଗ୍ୟାଙ୍ଗକୁ ଗିରଫ କରାଯାଇଛି | ଗିରଫ ହୋଇଥିବା ମହିଳାମାନଙ୍କ ମାନେ ହେଉଛନ୍ତି ସୋନିଆ ଓରଫ ନିଶା, ସଂଗୀତା ଏବଂ ଅନୀତା ଦେବୀ । ଏସପି ରାଣା କହିଛନ୍ତି ଯେ ଜୁଲାଇ ୨ରେ ଶିବ କଲୋନୀ ନିବାସୀ ବିଷ୍ଣୁ କୁମାର ଛିପା (୩୨) ଙ୍କ ଅଭିଯୋଗ କ୍ରମେ ଏହି କାର୍ଯ୍ୟାନୁଷ୍ଠାନ ନିଆଯାଇଛି |

ବିଷ୍ଣୁ କୁମାର ଅଭିଯୋଗ କରିଥିଲେ ଯେ ୨୦୨୦ ମସିହାରେ ତାଙ୍କ ପତ୍ନୀଙ୍କର କର୍କଟ ରୋଗରେ ମୃତ୍ୟୁ ହେବା ପରେ ପରିବାର ସଦସ୍ୟ ଜୁନ୍ ୧୪, ୨୦୨୩ରେ ନିଶା ନାମକ ଜଣେ ଯୁବତୀଙ୍କ ସହ ବିବାହ କରାଇଥିଲେ। ବିବାହ ପରେ ନିଶା ସମ୍ପର୍କ ନ ରଖିବା ନେଇ କହିଥିଲେ | ବିବାହର ୧ ସପ୍ତାହ ପରେ, ଜୁନ୍ ୨୧ରେ ନିଶା ଘରୁ ପଳାଇଯାଇଥିଲେ | ଘରୁ ପଳାଇବା ବେଳେ ସେ ସବୁ ସୁନା ଗହଣା ସହ ଟଙ୍କା ଲୁଟି ଫେରାର ହୋଇଯାଇଥିଲେ | ଏହା ପରେ ବିଷ୍ଣୁ କୁମାର ସୋସିଆଲ ମିଡିଆରେ ନିଶାଙ୍କ ବିଷୟରେ ଅନୁସନ୍ଧାନ ଆରମ୍ଭ କରିଥିଲେ ଓ ଜାଣିବାକୁ ପାଇଥିଲେ ଯେ ସେ ବିବାହିତ ଏବଂ ତାଙ୍କର ସନ୍ତାନ ମଧ୍ୟ ଅଛନ୍ତି | ଏସପି ରାଣା କହିଛନ୍ତି ଯେ ମଙ୍ଗଳବାର (ଅଗଷ୍ଟ ୧୫) ରେ ପୁଲିସ ଏହି ଗ୍ୟାଙ୍ଗକୁ ଧରିଛି ଏବଂ ନକଲି କନ୍ୟା ସମେତ ତିନିଜଣ ମହିଳାଙ୍କୁ ଗିରଫ କରିଛି। ଏହି ଗ୍ୟାଙ୍ଗ ବିବାହିତ ମହିଳାମାନଙ୍କୁ ଅବିବାହିତ ବୋଲି ଦର୍ଶାଇ ବାହାଘର କରାଉଥିଲେ | ପରେ ଘରର ଅଳଙ୍କାର ଓ ଟଙ୍କା ନେଇ କନ୍ୟା ପଳାଇଆସୁଥିଲେ |