ରବିବାର ଦିନ ସୃଷ୍ଟି ହେବାକୁ ଥିବା ଲଘୁଚାପ ପଶ୍ଚିମବଙ୍ଗ, ବିହାର ଉପରେ ଅଧିକ ପ୍ରଭାବ ପକାଇବ : ସ୍କାଏମେଟ୍
ନୂଆଦିଲ୍ଲୀ : ଆସନ୍ତା ୨୩ ତାରିଖ ବେଳକୁ ବଙ୍ଗୋପସାଗରରେ ସୃଷ୍ଟି ହେବାକୁ ଥିବା ଲଘୁଚାପ ଓଡ଼ିଶା ତୁଳନାରେ ପଶ୍ଚିମବଙ୍ଗ ଓ ବିହାର ଉପରେ ଅଧିକ ପ୍ରଭାବ ପକାଇବାର ସମ୍ଭାବନା ରହିଛି ବୋଲି ଘରୋଇ ପାଣିପାଗ ସଂସ୍ଥା ସ୍କାଏମେଟ କହିଛି । ଏହା ସତ୍ତ୍ୱେ ଓଡ଼ିଶାର ଉପକୂଳବର୍ତ୍ତୀ ଓ ଆଭ୍ୟନ୍ତରୀଣ ଜିଲ୍ଲାଗୁଡ଼ିକରେ ମଧ୍ୟମରୁ ପ୍ରବଳ ବର୍ଷା ହେବାର ସମ୍ଭାବନା ରହିଛି ।
Sambad is now on WhatsApp
Join and get latest news updates delivered to you via WhatsApp
ସ୍କାଏମେଟ କହିଛି ଯେ ଗତ ୧୯ ତାରିଖରେ ସୃଷ୍ଟି ହୋଇ ଓଡ଼ିଶାରେ ପ୍ରବଳ ବର୍ଷା କରାଇଥିବା ଲଘୁଚାପ ତୁଳନାରେ ନୂଆ ଲଘୁଚାପଟିର ଗତିପଥ ଉତ୍ତର ଦିଗକୁ ରହିବ । ଏହା ପଶ୍ଚିମବଙ୍ଗ, ବିହାର ଓ ଗାଙ୍ଗେୟ ସମତଳଭୂମି କ୍ଷେତ୍ର ଆଡ଼େ ଗତି କରି ବର୍ଷା କରାଇବ ।
ଭାରତୀୟ ପାଣିପାଗ ବିଭାଗର ପୂର୍ବାନୁମାନ ଅନୁସାରେ ଆସନ୍ତା ରବିବାରଦିନ ସୃଷ୍ଟି ହେବାକୁ ଥିବା ଲଘୁଚାପ ପ୍ରଭାବରେ ବାଲେଶ୍ୱର, ଭଦ୍ରକ, ଯାଜପୁର, କେନ୍ଦ୍ରାପ଼ଡ଼ା, କଟକ,ଜଗତସିଂହପୁର, ମୟୁରଭଞ୍ଜ,କେନ୍ଦୁଝର ଓ ଢେଙ୍କାନାଳରେ ପ୍ରବଳ ବର୍ଷା ହେବାର ସମ୍ଭାବନା ରହିଛି । ଏହିପାଇଁ ଏସବୁ ଜିଲ୍ଲାଗୁଡ଼ିକରେ ଅରେଞ୍ଜ ଓ୍ଵାର୍ଣ୍ଣିଂ ଜାରି କରାଯାଇଛି । ଏହାଛଡ଼ା ଅନୁଗୁଳ, ସମ୍ବଲପୁର,ମାଲକାନଗିରି,କୋରାପୁଟ, କନ୍ଧମାଳ,କଳାହାଣ୍ଡି, ସୁନ୍ଦରଗଡ଼,ଦେବଗଡ଼ ଓ ନବରଙ୍ଗପୁର ପାଇଁ ୟେଲୋ ଓ୍ଵାର୍ଣ୍ଣିଂ ଜାରି କରାଯାଇଛି । ଏହାର ପରବର୍ତ୍ତି ଦିନଗୁଡ଼ିକରେ ବର୍ଷା ପରିମାଣ ଆହୁରି ବଢିବ । ରାଜ୍ୟର ୧୮ଟି ଜିଲ୍ଲା ପାଇଁ ଅରେଞ୍ଜ ଓ୍ଵାର୍ଣ୍ଣିଂ ଜାରି କରାଯାଇଛି ବୋଲି ଭାରତୀୟ ପାଣିପାଗ ବିଭାଗ ପକ୍ଷରୁ ଶୁକ୍ରବାରଦିନ ପ୍ରକାଶିତ ବୁଲେଟିନରେ କୁହାଯାଇଛି ।