ମହାକୁମ୍ଭରେ ୫ ଟଙ୍କାରେ ଅଟା, ୬ ଟଙ୍କାରେ ଚାଉଳ ମିଳିବ

ପ୍ରୟାଗରାଜ: ଉତ୍ତରପ୍ରଦେଶର ପ୍ରୟାଗରାଜରେ ଜାନୁଆରି ୧୩ରୁ ଆରମ୍ଭ ହେବାକୁ ଥିବା ମହାକୁମ୍ଭ ମେଳା ପାଇଁ ପ୍ରସ୍ତୁତି ଶେଷ ହୋଇଛି। ମହାକୁମ୍ଭରେ ଯୋଗୀ ସରକାର ଆଖଡ଼ା, ଅନୁଷ୍ଠାନ ଓ କଳ୍ପବାସୀମାନଙ୍କ ପାଇଁ ବିପୁଳ ପରିମାଣର ଶସ୍ୟଭଣ୍ଡାରର ବ୍ୟବସ୍ଥା କରିଛନ୍ତି। ମହାକୁମ୍ଭରେ ପ୍ରଥମ ଥର ପାଇଁ ଆଖଡ଼ା, ଅନୁଷ୍ଠାନ ଓ କଳ୍ପବାସିଙ୍କୁ ନାମମାତ୍ର ମୂଲ୍ୟରେ ରାସନ ସୁବିଧା ଯୋଗାଇ ଦିଆଯିବ। ମୁଖ୍ୟମନ୍ତ୍ରୀ ଯୋଗୀଙ୍କ ନିର୍ଦ୍ଦେଶକ୍ରମେ ସେମାନଙ୍କୁ ମାତ୍ର ୫ ଟଙ୍କାରେ ଅଟା ଏବଂ ୬ ଟଙ୍କାରେ ଚାଉଳ ଯୋଗାଇ ଦେବାର ବ୍ୟବସ୍ଥା ରହିଛି। ଏଥିପାଇଁ ମେଳା ଅଞ୍ଚଳରେ ଥିବା ୧୩୮ଟି ସୁଲଭ ମୂଲ୍ୟ ଦୋକାନରେ ରାସନ ଉପଲବ୍ଧ କରାଯାଇଛି।

ଏଥର ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ମହାକୁମ୍ଭକୁ ଦିବ୍ୟ, ଭବ୍ୟ ତଥା ନୂଆ ରୂପ ଦେବାରେ ଲାଗିପଡ଼ିଛନ୍ତି। ଏଥିପାଇଁ ସମସ୍ତ ପ୍ରକାର ବ୍ୟବସ୍ଥା କରିବାକୁ ସେ ଅଧିକାରୀମାନଙ୍କୁ ନିର୍ଦ୍ଦେଶ ଦେଇଛନ୍ତି। ବିଶେଷ କରି ଶ୍ରଦ୍ଧାଳୁଙ୍କ ଖାଦ୍ୟ ପାଇଁ ଏଥର ସ୍ୱତନ୍ତ୍ର ବ୍ୟବସ୍ଥା କରାଯାଇଛି। ମହାକୁମ୍ଭକୁ ଆସୁଥିବା ଲୋକଙ୍କ ପାଇଁ ମୁଖ୍ୟମନ୍ତ୍ରୀ ଶସ୍ୟଭଣ୍ଡାର ଖୋଲିଛନ୍ତି। ମେଳା ଅଞ୍ଚଳରେ ୧୩୮ଟି ସୁଲଭ ମୂଲ୍ୟ ଦୋକାନ ଖୋଲାଯାଇଥିବା ବେଳେ କଳ୍ପବାସିମାନଙ୍କ ପାଇଁ ୧.୨୦ ଲକ୍ଷ ଧଳା ରାସନ କାର୍ଡ ତିଆରି କରିବାର ବ୍ୟବସ୍ଥା କରାଯାଇଛି।