ବିହାରରେ କମ୍‌ ମତଦାନ ଚିନ୍ତାର କାରଣ: ନିର୍ବାଚନ କମିଶନ

ପାଟନା: ଗଣତନ୍ତ୍ରକୁ ଜନ୍ମ ଦେଇଥିବା ଏବଂ ଏବେ ବି ରାଜନୈତିକ ଭାବେ ସଚେତନ ନାଗରିକ ବସବାସ କରୁଥିବା ବିହାରରେ କମ୍‌ ମତଦାନ ଚିନ୍ତାର କାରଣ ବୋଲି ବୁଧବାର ଦିନ ନିର୍ବାଚନ ଆୟୋଗ କହିଛନ୍ତି। ମୁଖ୍ୟ ନିର୍ବାଚନ କମିଶନର (ସିଇସି) ରାଜୀବ କୁମାର ପାଟନାରେ ଏକ ସାମ୍ବାଦିକ ସମ୍ମିଳନୀରେ ଏହି ସୂଚନା ଦେଇଛନ୍ତି ଏବଂ ଲୋକସଭା ନିର୍ବାଚନ ପୂର୍ବରୁ ପ୍ରସ୍ତୁତିର ସମୀକ୍ଷା ପାଇଁ ରାଜ୍ୟ ଗସ୍ତ ଶେଷ କରିଛନ୍ତି।

ପ୍ରାଚୀନ ବୈଶାଳୀର ଗଣତନ୍ତ୍ରକୁ ନେଇ କୁମାର କହିଛନ୍ତି, ବିହାର ଗଣତନ୍ତ୍ରର ଜନନୀ ଭାବେ ପରିଚିତ। ଯଦିଓ ରାଜ୍ୟବାସୀ ରାଜନୈତିକ ଦୃଷ୍ଟିରୁ ସଚେତନ ଅଛନ୍ତି, ତଥାପି ଏଠାରେ ମତଦାନ ହାର କମ୍‌ ରହିଛି। ୨୦୧୯ରେ ଏହା କେବଳ ଜାତୀୟ ହାରାହାରି ଠାରୁ କମ୍‌ ନୁହେଁ, ବରଂ ଦେଶରେ ଦ୍ଵିତୀୟ ସର୍ବନିମ୍ନ ସ୍ତରରେ ଥିଲା। କେବଳ ଜମ୍ମୁ-କଶ୍ମୀରରେ କମ୍‌ ମତଦାନ ହୋଇଛି ବୋଲି କୁମାର କହିଛନ୍ତି।

ସିଇସି କହିଛନ୍ତି ଯେ ମତଦାନରେ ଉନ୍ନତି ସୁନିଶ୍ଚିତ କରିବା ପାଇଁ ଅନେକ ପଦକ୍ଷେପ ନିଆଯାଉଛି ଏବଂ ଯେଉଁ କ୍ଷେତ୍ରରେ ଏହା ବିଶେଷ ଭାବରେ କମ୍‌ ରହିଛି ସେଗୁଡ଼ିକ ଉପରେ ବିଶେଷ ଧ୍ୟାନ ଦିଆଯାଉଛି। ୨୦୧୯ରେ ସହରାଞ୍ଚଳରେ ମତଦାନ ହାର କମ୍‌ ଥିଲା ବୋଲି ଆମେ ଲକ୍ଷ୍ୟ କରିଛୁ। ରାଜ୍ୟରେ ୧୬ଟି ବିଧାନସଭା ନିର୍ବାଚନ ମଣ୍ଡଳୀ ରହିଛି ଯାହା ମୁଖ୍ୟତଃ ସହରାଞ୍ଚଳ ଅଟେ। ସେଥିମଧ୍ୟରୁ ୧୨ଟିରେ ଅର୍ଥାତ୍‌ ମୋଟ ୭୫ ପ୍ରତିଶତ ମତଦାନ ହୋଇଥିବା ବେଳେ ରାଜ୍ୟର ହାରାହାରି ୫୭.୩୩ ପ୍ରତିଶତ ମତଦାନ ତୁଳନାରେ କମ୍‌ ମତଦାନ ହୋଇଛି ବୋଲି ସିଇସି ପ୍ରକାଶ କରିଛନ୍ତି।

ଏହାବ୍ୟତୀତ ୪୭ ପ୍ରତିଶତରୁ କମ୍‌ ମତଦାନ ହୋଇଥିବା ୧୪ ପ୍ରତିଶତ ବୁଥ୍‌ ଚିହ୍ନଟ କରାଯାଇଛି। ଯାହା କି ରାଜ୍ୟର ହାରାହାରି ତୁଳନାରେ ୧୦ ପ୍ରତିଶତରୁ ଅଧିକ। ୯ଟି ଜିଲ୍ଲାରେ ୩୧ଟି ବିଧାନସଭା ନିର୍ବାଚନ ମଣ୍ଡଳୀରେ ମହିଳା ଭୋଟରଙ୍କ ସଂଖ୍ୟା ଯଥେଷ୍ଟ କମ୍‌ ରହିଛି ବୋଲି ଶ୍ରୀ କୁମାର କହିଛନ୍ତି।

ଏପ୍ରକାର ପରିସ୍ଥିତିରେ ସ୍ଥାନୀୟ ଭାଷାରେ, ଏଫଏମ ରେଡିଓ ଚ୍ୟାନେଲ ଏବଂ ସୋସିଆଲ ମିଡିଆ ଭଳି ପ୍ଲାଟଫର୍ମରେ ମେସେଜିଂ ବ୍ୟବହାର କରି ଉତ୍ତମ ମତଦାନ ସୁନିଶ୍ଚିତ କରିବାକୁ ଜିଲ୍ଲା ନିର୍ବାଚନ ଅଧିକାରୀମାନଙ୍କୁ କୁହାଯାଇଛି ଏବଂ ଯୁବ ଭୋଟରଙ୍କ ସଂଖ୍ୟାରେ ଉଲ୍ଲେଖନୀୟ ବୃଦ୍ଧି ହେଲେ ଏଥର ସାମଗ୍ରିକ ମତଦାନରେ ଯଥେଷ୍ଟ ଉନ୍ନତି ଆସିବ ବୋଲି ମୁଖ୍ୟ ନିର୍ବାଚନ କମିଶନର ଆଶା ବ୍ୟକ୍ତ କରିଛନ୍ତି।

ବର୍ତ୍ତମାନ ସୁଦ୍ଧା ବିହାରରେ ପ୍ରାୟ ୭.୬୪ କୋଟି ଭୋଟର ଅଛନ୍ତି, ସେମାନଙ୍କ ମଧ୍ୟରୁ ୨ କୋଟିରୁ ଅଧିକ ୩୦ ବର୍ଷରୁ କମ୍‌ ବୟସର। ୯.୨୬ ଲକ୍ଷ ଲୋକ ୧୮ରୁ ୧୯ ବର୍ଷ ବୟସର ହୋଇଥିବା ବେଳେ ପ୍ରଥମ ଥର ପାଇଁ ସେମାନଙ୍କ ମତାଧିକାର ସାବ୍ୟସ୍ତ କରିବେ ଏବଂ ଆଉ ୧.୬ କୋଟି ଲୋକ ୨୦ରୁ ୨୯ ବର୍ଷ ବୟସ ମଧ୍ୟରେ ଅଛନ୍ତି।
ସିଇସି ଆହୁରି ମଧ୍ୟ କହିଛନ୍ତି ଯେ ୨୦୧୯ରୁ ରାଜ୍ୟରେ ୩୧.୦୯ ଲକ୍ଷ ମହିଳା ଭୋଟର ଯୋଡ଼ି ହୋଇଛନ୍ତି, ସେମାନଙ୍କ ମଧ୍ୟରୁ ୪.୫ ଲକ୍ଷ ୧୮-୧୯ ବର୍ଷ ବୟସର।

ସମ୍ବନ୍ଧିତ ଖବର