ରନ୍ଧନ ଗ୍ୟାସ ସିଲିଣ୍ଡର ପିଛା ବଢ଼ିଲା ୧୪୫ ଟଙ୍କା; ଭୁବନେଶ୍ବରରେ ଦର ୮୯୫ ଟଙ୍କା ୫୦

ନୂଆଦିଲ୍ଲୀ: ରନ୍ଧନ ଗ୍ୟାସ (ଏଲ୍‌ପିଜି)ର ସିଲିଣ୍ଡର ପିଛା ମୂଲ୍ୟରେ ଆଜି (ବୁଧବାର) ୧୪୪ ଟଙ୍କା ୫୦ ପଇସାର ବୃଦ୍ଧି ଘଟାଇଛନ୍ତି କେନ୍ଦ୍ର ସରକାର। ପୂର୍ବରୁ ୧୪.୨ କିଲୋ ଓଜନ ବିଶିଷ୍ଟ ଏଲପିଜି ସିଲିଣ୍ଡରର ପିଛା ମୂଲ୍ୟ ୭୧୪ ଟଙ୍କା ଥିବା ବେଳେ ଏବେ ମୂଲ୍ୟବୃଦ୍ଧି ପରେ ମୂଲ୍ୟ ୮୫୮ଟଙ୍କା ୫୦ ପଇସାରେ ଆସି ପହଞ୍ଚିଛି। ଚଳିତ ବର୍ଷ ଜାନୁଆରିରୁ ଏଲପିଜି ସିଲିଣ୍ଡରର ମୂଲ୍ୟରେ ବୃଦ୍ଧି ଘଟି ନଥିବା ବେଳେ ଏହା ଚଳିତ ବର୍ଷର ପ୍ରଥମ ମୂଲ୍ୟବୃଦ୍ଧି ଥିବା ଜଣାପଡ଼ିଛି।

୨୦୧୪ ଜାନୁଆରି ପରେ ଏଲପିଜି ସିଲିଣ୍ଡରର ମୂଲ୍ୟ ବୃଦ୍ଧି କ୍ଷେତ୍ରରେ ଏହା ସର୍ବାଧିକ ରହିଥିବା ଜାଣିବାକୁ ମିଳିଛି। ଉଲ୍ଲେଖଯୋଗ୍ୟ, ୨୦୧୪ ଜାନୁଆରିରେ କେନ୍ଦ୍ର ସରକାର ଏଲପିଜି ସିଲିଣ୍ଡରର ପିଛା ମୂଲ୍ୟରେ ୨୨୦ ଟଙ୍କା ବୃଦ୍ଧି ଘଟାଇଥିଲେ। ଯାହାକି ଏଲପିଜି ସିଲିଣ୍ଡରର ପିଛା ମୂଲ୍ୟରେ ସର୍ବାଧିକ ବୃଦ୍ଧି ଥିଲା। ଅନ୍ତର୍ଜାତିକ ସ୍ତରରେ ଘଟିଥିବା ମୂଲ୍ୟ ବୃଦ୍ଧି ଯୋଗୁଁ ଭାରତରେ ଏଲପିଜି ସିଲିଣ୍ଡରର ମୂଲ୍ୟ ବୃଦ୍ଧି କରିବା ପାଇଁ ସରକାର ବାଧ୍ୟ ହୋଇଥିବା କୁହାଯାଉଛି।

NewsHunt

କିନ୍ତୁ, ଅନ୍ୟପକ୍ଷରେ ସରକାର ଗ୍ରାହକମାନଙ୍କ ପାଇଁ ସବ୍‌ସିଡି ମୂଲ୍ୟରେ ବୃଦ୍ଧି ଘଟାଇଛନ୍ତି। ପୂର୍ବରୁ ଗ୍ରାହକମାନେ ଏଲପିଜି ସିଲିଣ୍ଡରର ପିଛା ୧୫୩ଟଙ୍କା ୮୬ ପଇସାର ସବସିଡି ପାଉଥିବା ବେଳେ ଏବେ ସରକାର ତାହାକୁ ୨୯୧.୪୮ ପଇସାକୁ ବୃଦ୍ଧି କରି ଦେଇଛନ୍ତି। ଜଣେ ଗ୍ରହକ ବର୍ଷକୁ ୧୨ଟି ସବସିଡି ଯୁକ୍ତ ଏଲପିଜି ସିଲିଣ୍ଡରର ପାଇପାରିବ। ସେହିପରି ପ୍ରଧାନମନ୍ତ୍ରୀ ଉଜ୍ୱଳା ଯୋଜନାରେ ହିତାଧିକାରୀମାନେ ୧୭୪ ଟଙ୍କା ୮୬ ପଇସାର ସବସିଡି ପାଉଥିବା ବେଳେ ଏବେ ତାହା ୩୧୨ଟଙ୍କା ୪୮ ପଇସାକୁ ବୃଦ୍ଧି ପାଇଛି।

ଏହି ମୂଲ୍ୟବୃଦ୍ଧି ପରେ ଭୁବନେଶ୍ୱରରେ ଏବେ ୧୪.୨ କିଲୋ ଓଜନ ବିଶିଷ୍ଟ ଏଲପିଜି ସିଲିଣ୍ଡରର ପିଛା ମୂଲ୍ୟ ୮୯୫ ଟଙ୍କା ୫୦ ପଇସା ହୋଇଛି।

ସମ୍ବନ୍ଧିତ ଖବର