କ୍ଷମତାରେ ମୋଦୀଙ୍କ ୨୦ ବର୍ଷ
ନୂଆଦିଲ୍ଲୀ : ଗୋଟିଏ ସରକାରର ମୁଖ୍ୟ ଭାବେ ୨୦ ବର୍ଷ ପୂରଣ କରିଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ । ଏହି ୨୦ ବର୍ଷ ମଧ୍ୟରେ ୧୩ ବର୍ଷ ସେ ଗୁଜୁରାଟର ମୁଖ୍ୟମନ୍ତ୍ରୀ ଓ ୭ ବର୍ଷ ଦେଶର ପ୍ରଧାନମନ୍ତ୍ରୀ ରହିଛନ୍ତି । ଏହି ସଫଳତାକୁ ନେଇ ଆଜି ବିଭିନ୍ନ ବର୍ଗର ଲୋକେ ପ୍ରଧାନମନ୍ତ୍ରୀଙ୍କୁ ଅଭିନନ୍ଦନ ଜଣାଇଛନ୍ତି ।
Sambad is now on WhatsApp
Join and get latest news updates delivered to you via WhatsApp
ଆଜି ଉତ୍ତରାଖଣ୍ଡର ଋଷିକେଶରେ ଉଦବୋଧନ ଦେଇ ମୋଦୀ କହିଛନ୍ତି “କେବେ ଭାବିନଥିଲି ଯେ ମୁଁ ମୁଖ୍ୟମନ୍ତ୍ରୀ ପଦରୁ ଉନ୍ନୀତ ହୋଇ ଦେଶର ପ୍ରଧାନମନ୍ତ୍ରୀ ହେବି ବୋଲି । ବିଗତ କିଛି ଦଶନ୍ଧି ଧରି ମୁଁ ଲୋକମାନଙ୍କ ସେବା କରିଆସିଛି । କିନ୍ତୁ ୨୦ ବର୍ଷ ତଳେ ଆଜିର ଦିନରେ ମୋତେ ଗୁଜୁରାଟର ମୁଖ୍ୟମନ୍ତ୍ରୀ ଭାବେ ଏକ ନୂଆ ଦାୟିତ୍ବ ଦିଆଯାଇଥିଲା” ।
ମୋଦୀଙ୍କୁ ଅଭିନନ୍ଦନ ଜଣାଇ ବିଜେପି ସଭାପତି ଜେପି ନଡ୍ଡା କହିଛନ୍ତି ଯେ ତାଙ୍କ ନେତୃତ୍ବରେ ଭାରତ ବିଶ୍ବର ଏକ ଶକ୍ତିଶାଳୀ ଦେଶଭାବେ ଉଭା ହୋଇଛି ।
ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଅକ୍ଟୋବର ୭, ୨୦୦୧ରେ ଗୁଜୁରାଟର ମୁଖ୍ୟମନ୍ତ୍ରୀ ଭାବେ ଶପଥ ଗ୍ରହଣ କରିଥିଲେ । ତାହାର ୫ ମାସ ଅର୍ଥାତ ଫେବ୍ରୁଆରି ୨୭ରେ ଗୋଧ୍ରା ଟ୍ରେନ ପୋଡ଼ି ଘଟଣା ଘଟିଥିଲା । ତା’ପରେ ଗୁଜୁରାଟରେ ଏକ ଭୟଙ୍କର ସାଂପ୍ରଦାୟିକ ଦଙ୍ଗା ହୋଇଥିଲା । ଏହାକୁ ନେଇ ମୋଦୀଙ୍କ ଉପରେ ଅନେକ ଅଭିଯୋଗ ଆସିଥିଲା । କିନ୍ତୁ ପରେ ସେ ସୁପ୍ରିମକୋର୍ଟରୁ ଦୋଷମୁକ୍ତ ହୋଇଥିଲେ । ୨୦୧୩ରେ ମୋଦୀଙ୍କୁ ବିଜେପି ନିଜର ପ୍ରଧାନମନ୍ତ୍ରୀ ପ୍ରାର୍ଥୀ କରିଥିଲା । ୨୦୧୪ରେ ବିଜେପି ନେତୃତ୍ବାଧୀନ ଏନଡିଏ ମେଣ୍ଟ ନିର୍ବାଚନ ଜିତିବା ପରେ ମୋଦୀ ଦେଶର ପ୍ରଧାନମନ୍ତ୍ରୀ ହୋଇଥିଲେ । ୨୦୧୯ରେ ପୁଣି ବିଜେପି ଜିତିବା ପରେ ମୋଦୀ ୨ୟ ଥର ପାଇଁ ଦେଶର ପ୍ରଧାନମନ୍ତ୍ରୀ ହୋଇଥିଲେ ।