ଦେଶର ପ୍ରଥମ ରାଜ୍ୟଭାବେ ମହାରାଷ୍ଟ୍ରରେ ମୋଟ କରୋନା ଆକ୍ରାନ୍ତ ସଂଖ୍ୟା ୧ ଲକ୍ଷ ଟପିଲା, ଜୁନ ୧୬-୧୭ରେ ମୁଖ୍ୟମନ୍ତ୍ରୀମାନଙ୍କ ସହ ଆଲୋଚନା କରିବେ ମୋଦୀ
ନୂଆଦିଲ୍ଲୀ : ଦେଶର ପ୍ରଥମ ରାଜ୍ୟଭାବେ ମହାରାଷ୍ଟ୍ରରେ ମୋଟ କରୋନା ସଂକ୍ରମିତଙ୍କ ସଂଖ୍ୟା ୧ ଲକ୍ଷ ଟପିଯାଇଛି । ଏହା ମଧ୍ୟରେ ୩୭୧୭ଟି ମୃତ୍ୟୁମାମଲା ଥିବାବେଳେ ୪୭,୭୯୩ ଜଣ ଆରୋଗ୍ୟଲାଭ କରିଛନ୍ତି ।
Sambad is now on WhatsApp
Join and get latest news updates delivered to you via WhatsApp
ମହାରାଷ୍ଟ୍ର ସରକାରଙ୍କ ତଥ୍ୟ ଅନୁସାରେ ଶୁକ୍ରବାରଦିନ ୩୪୯୩ଟି ନୂଆ ମାମଲା ସାମନାକୁ ଆସିବା ପରେ ମୋଟ ସଂଖ୍ୟା ୧,୦୧,୧୪୧ରେ ପହଞ୍ଚିଛି । ତେବେ ଆଜି ରାଜ୍ୟରେ ପ୍ରାୟ ୧୭୧୮ ଜଣ କରୋନା ଆକ୍ରାନ୍ତ ସୁସ୍ଥ ହୋଇ ଘରକୁ ଫେରିଛନ୍ତି । ମହାରାଷ୍ଟ୍ର ତଳକୁ ତାମିଲନାଡୁ ଓ ଦିଲ୍ଲୀ ରହିଛନ୍ତି ।
ଅନ୍ୟପକ୍ଷରେ ସମଗ୍ର ଦେଶରେ ମୋଟ ସଂକ୍ରମିତଙ୍କ ସଂଖ୍ୟା ୧ ଲକ୍ଷ ଟପିଯାଇଛି । ଆଜି ସକାଳେ କେନ୍ଦ୍ର ସ୍ୱାସ୍ଥ୍ୟ ମନ୍ତ୍ରାଳୟ ପକ୍ଷରୁ ଜାରି ତଥ୍ୟ ଅନୁସାରେ ଦେଶର ମୋଟ କରୋନା ଆକ୍ରାନ୍ତ ସଂଖ୍ୟା ୨ ଲକ୍ଷ ୯୭ ହଜାର ୫୩୫ ଥିଲା । ଏହା ମଧ୍ୟରେ ମହାରାଷ୍ଟ୍ରର ୯୭୬୪୮ ଥିଲା । ଏଣୁ ମହାରାଷ୍ଟ୍ରର ୧ ଲକ୍ଷ ଟପିବା ସହ ଦେଶର ମୋଟ ଆକ୍ରାନ୍ତ ସଂଖ୍ୟା ମଧ୍ୟ ୩ ଲକ୍ଷ ଟପିଯାଇଛି ।
ଦେଶରେ କରୋନା ମାମଲା ବଢିଚାଲିଥିବାରୁ ପରବର୍ତ୍ତି କାର୍ଯ୍ୟପନ୍ଥା ନିର୍ଦ୍ଧାରଣ ଲାଗି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଆସନ୍ତା ୧୬ ଓ ୧୭ ତାରିଖରେ ରାଜ୍ୟ ଓ କେନ୍ଦ୍ର ଶାସିତ ଅଞ୍ଚଳର ମୁଖ୍ୟମନ୍ତ୍ରୀମାନଙ୍କ ସହ ଭିଡିଓ କନଫରେନ୍ସିଂ ମାଧ୍ୟମରେ ଆଲୋଚନା କରିବେ ବୋଲି ଜଣାପଡ଼ିଛି ।