ସୋମବାର ଠାରୁ ମହାରାଷ୍ଟ୍ରରେ ପଞ୍ଚ-ସ୍ତରୀୟ ‘ଅନ୍‌ଲକ୍‌ ଯୋଜନା’ ଆରମ୍ଭ; ୧୮ ଜିଲ୍ଲାରେ ଖୋଲିବ ମଲ୍‌ ଓ ଥିଏଟର୍‌

ମୁମ୍ବାଇ: ଆଗାମୀ ସୋମବାର ଠାରୁ ରାଜ୍ୟରୁ କୋଭିଡ୍‌-୧୯ ଲକ୍‌ଡାଉନ୍‌ ଉଠିବା ଆରମ୍ଭ ହେବ ବୋଲି ଶୁକ୍ରବାର ରାତିରେ ମହାରାଷ୍ଟ୍ର ସରକାର ଘୋଷଣା କରିଛନ୍ତି। ଏଥିନିମନ୍ତେ ସୋମବାର (ଜୁନ୍‌ ୭ ତାରିଖ) ଠାରୁ ଲାଗୁ ହେବାକୁ ଥିବା ରାଜ୍ୟ ସରକାରଙ୍କଦ୍ବାରା ପ୍ରସ୍ତୁତ ଏକ ପଞ୍ଚ-ସ୍ତରୀୟ ଯୋଜନାକୁ ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟ ସେୟାର୍ କରିଛି।

କିନ୍ତୁ, କୋଭିଡ୍‌-୧୯ ପଜିଟିଭିଟି ହାର ଏବଂ ଅକ୍ସିଜେନ୍‌ ବେଡ୍‌ ଉପଲବ୍ଧତା ଆଧାରରେ ‘ଲକ୍‌ଡାଉନ୍‌’ କଟକଣା କୋହଳ କରାଯିବ ବୋଲି ମଧ୍ୟ ରାଜ୍ୟ ସରକାର ସ୍ପଷ୍ଟ କରି କହିଛନ୍ତି।

ଏ ସଂକ୍ରାନ୍ତରେ ବିବୃତି ଦେଇ ରାଜ୍ୟ ସରକାର କହିଛନ୍ତି, ବିଭିନ୍ନ ବର୍ଗ/ବର୍ଗୀୟ କାର୍ଯ୍ୟକଳାପ ନିମନ୍ତେ ପଞ୍ଚ-ସ୍ତରୀୟ କଟକଣା ଲାଗୁ ହେବ। ଦୁଇଟି ମାନଦଣ୍ଡକୁ ଆଧାର କରି ଏହି କଟକଣାସ୍ତର ସବୁ ଲାଗୁ କରାଯିବ। ତାହା ହେଲା, ସଂକ୍ରମଣ ମାମଲା ହାର ଏବଂ ଅକ୍ସଜେନ୍‌ ବେଡ୍‌ ଦଖଲ।

ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟ ଦେଇଥିବା ବିବୃତିରେ ମଧ୍ୟ କୁହାଯାଇଛି ଯେ, ସମ୍ପୃକ୍ତ ଜିଲ୍ଲାରେ କୋଭିଡ୍‌-୧୯ ପରିସ୍ଥିତି ଅନୁଯାୟୀ କର୍ତ୍ତୃପକ୍ଷମାନେ କୋହଳର ମାତ୍ରା ସ୍ଥିର କରିପାରିବେ।

ଏହା ପୂର୍ବରୁ, ଗୁରୁବାର ଦିନ ସାମ୍ବାଦିକ ସମ୍ମିଳନୀରେ ଉଦ୍‌ବୋଧନ ଦେବା ବେଳେ, ରିଲିଫ୍‌ ଓ ପୁନଃଥଇଥାନ ମନ୍ତ୍ରୀ ବିଜୟ ୱାଡେଟ୍ଟିକର କହିଥିଲେ, ପ୍ରଥମ ସ୍ତରରେ ୧୮ଟି ଜିଲ୍ଲାରେ ‘ଅନ୍‌ଲକ୍‌’ ଘୋଷଣା କରାଯିବ। ୫ଟି ଜିଲ୍ଲାରେ ୨ୟସ୍ତରୀୟ, ୧୦ଟି ଜିଲ୍ଲାରେ ୩ୟସ୍ତରୀୟ ୨ଟି ଜିଲ୍ଲାରେ ୪ର୍ଥସ୍ତରୀୟ ଏବଂ ବାକି ଜିଲ୍ଲାରେ ୫ମସ୍ତରୀୟ ‘ଅନ୍‌ଲକ୍‌’ ଘୋଷଣା କରାଯିବ।