ମହାରାଷ୍ଟ୍ର: ଅଚଳାବସ୍ଥାର ଅବସାନ; ଶିବସେନା- ଏନ୍ସିପି- କଂଗ୍ରେସ ମିଳିତ ଭାବେ ଗଠନ କରିବେ ନୂତନ ସରକାର
ନୂଆଦିଲ୍ଲୀ: ଶେଷରେ ମହାରାଷ୍ଟ୍ରରେ ନୂତନ ସରକାର ଗଠନ ନେଇ ସୃଷ୍ଟି ହୋଇଥିବା ସମସ୍ତ ଅଚଳାବସ୍ଥାର ଅବସାନ ଘଟିଛି। ଏବଂ ମହାରାଷ୍ଟ୍ରରେ ନୂତନ ସରକାର ଶିବସେନା- ଏନ୍ସିପି- କଂଗ୍ରେସ ମିଳିତ ଭାବେ ଗଠନ କରିବେ ବୋଲି ଆଜି ଅପରାହ୍ଣରେ ଘୋଷଣା କରିଛନ୍ତି ଶିବସେନା ନେତା ତଥା ସାଂସଦ ସଞ୍ଜୟ ରାଉତ।
Sambad is now on WhatsApp
Join and get latest news updates delivered to you via WhatsApp
ଏସଂପର୍କରେ ଗଣମାଧ୍ୟମକୁ ସୂଚନା ଦେଇ ଶ୍ରୀ ରାଉତ କହିଛନ୍ତି ଯେ ରାଜ୍ୟରେ ନୂତନ ସରକାର ଗଠନ ନେଇ ଶିବସେନା- ଏନ୍ସିପି- କଂଗ୍ରେସ ମଧ୍ୟରେ ସବୁ ଆଳୋଚନା ଶେଷ ହେବା ସହ ନୂତନ ସରକାରର ଚୂଡ଼ାନ୍ତ ରୂପରେଖ ମଧ୍ୟ ପ୍ରସ୍ତୁତ ହୋଇସାରିଛି। ଆସନ୍ତା ୨୩ ତାରିଖ ଦିନ ରାଜ୍ୟରେ ନୂତନ ସରକାର ଗଠନ ନିମନ୍ତେ ଶିବସେନା- ଏନ୍ସିପି- କଂଗ୍ରେସର ସମସ୍ତ ନିର୍ବାଚିତ ବିଧାୟକମାନଙ୍କର ସ୍ବାକ୍ଷର ସମ୍ବଳିତ ଏକ ଦାବୀପତ୍ର ରାଜ୍ୟପାଳ ଭଗତ ସିଂହ କୋଶୀୟାରୀଙ୍କୁ ପ୍ରଦାନ କରାଯିବ ଏବଂ ଆସନ୍ତା ୨୪ କିମ୍ବା ୨୫ ତାରିଖରେ ନୂତନ ସରକାରର ଶପଥ ଗ୍ରହଣ ଉତ୍ସବ ଅନୁଷ୍ଠିତ ହେବ।
ନୂତନ ସରକାରର ରୂପରେଖ ସଂପର୍କରେ ସୂଚନା ଦେଇ ଶ୍ରୀ ରାଉତ କହିଛନ୍ତି ଶିବସେନା ଓ ଏନ୍ସିପି ପାଳିକରି ୨.୫ ବର୍ଷ ଲେଖାଏଁ ମୁଖ୍ୟମନ୍ତ୍ରୀ ପଦରେ ରହିବେ। ତେବେ, ପ୍ରଥମ ପାଳିରେ କିଏ ଶବସେନା ନା ଏନ୍ସିପି ମୁଖ୍ୟମନ୍ତ୍ରୀ ଆସନରେ ବସିବ, ତାହା ଚୂଡ଼ାନ୍ତ ହୋଇନାହିଁ। ତେବେ, କଂଗ୍ରେସ ନୂତନ ସରକାରରେ ୫ ବର୍ଷ ପାଇଁ ଉପ-ମୁଖ୍ୟମନ୍ତ୍ରୀ ପଦ ସମ୍ଭାଳିବ। ସେହିପରି ଶବସେନା କିମ୍ବା ଏନ୍ସିପି କିଏ ବାଚସ୍ପତି ପଦ ସମ୍ଭାଳିବ ତାହା ଚୂଡ଼ାନ୍ତ ହୋଇନାହିଁ। ତେବେ, ଆଗାମୀ ୫ ବର୍ଷ ପାଇଁ ଶିବସେନା- ଏନ୍ସିପି- କଂଗ୍ରେସ ମିଳିତ ସରକାର ରାଜ୍ୟକୁ ସ୍ଥିର ଓ ସ୍ଥାୟୀ ସରକାର ଦେବେ ବୋଲି କହିଛନ୍ତି ଏନ୍ସିପି ସୁପ୍ରିମୋ ଶରଦ ଯାଦବ।