କଙ୍ଗନାଙ୍କ କାର୍ଯ୍ୟାଳୟ ଭଙ୍ଗା ଘଟଣା: ବିଏମସି ପକ୍ଷରୁ ଲଢ଼ୁଥିବା ଓକିଲଙ୍କୁ ଦୁଇ ଦିନ ପାଇଁ ଦିଆଯାଇଛି ୮୨ଲକ୍ଷ ଟଙ୍କା
ମୁମ୍ବାଇ: ମହାରାଷ୍ଟ୍ରର ଉଦ୍ଧବ ଠାକରେ ଏବଂ ଚଳଚ୍ଚିତ୍ର ଅଭିନେତ୍ରୀ କଙ୍ଗନା ରାନାୱତଙ୍କ ମଧ୍ୟରେ ଚାଲିଥିବା ବିବାଦ ମଧ୍ୟରେ ଏକ ବଡ ଖବର ସାମ୍ନାକୁ ଆସିଛି | କିଛି ଦିନ ତଳେ ବ୍ରିହନ୍ ମୁମ୍ବାଇ ମ୍ୟୁନିସିପାଲ କର୍ପୋରେସନ (ବିଏମ୍ସି) ପ୍ରଥମେ କଙ୍ଗନାଙ୍କ କାର୍ଯ୍ୟାଳୟରେ ଏକ ନୋଟିସ୍ ଝୁଲାଇ ମାତ୍ର ୨୪ ଘଣ୍ଟାର ମହଲତ ଦେବାର ପରଦିନ ଯାଇ ତାଙ୍କ କାର୍ଯ୍ୟାଳୟକୁ ଭାଙ୍ଗିବା ଆରମ୍ଭ କରିଥିଲା। ଏହାକୁ ବିରୋଧ କରି କଙ୍ଗନା ବମ୍ବେ ହାଇକୋର୍ଟର ଦ୍ବାରସ୍ଥ ହୋଇଥିଲେ ଏବଂ କ୍ଷତିପୂରଣ ମାଗିଥିଲେ | ତେବେ ଏହି ମାମଲାରେ ବିଏମ୍ସି ପକ୍ଷରୁ ଲଢ଼ୁଥିବା ଓକିଲଙ୍କୁ ଦିଆଯାଇଥିବା ଟଙ୍କାକୁ ନେଇ ଏବେ ନୂଆ ବିବାଦ ଆରମ୍ଭ ହୋଇଛି | କୋର୍ଟରେ ଶୁଣାଣି ପାଇଁ ବିଏମସି ଓକିଲଙ୍କୁ ଦୁଇ ଦିନ ପାଇଁ ୮୨ ଲକ୍ଷ ଟଙ୍କା ଦିଆ ଯାଇଥିବା କଥା ସାମ୍ନାକୁ ଆସିଛି |
ଏହି ମାମଲାରେ ଆରଟିଆଇ କାର୍ଯ୍ୟକର୍ତ୍ତା ଶରଦ ଯାଦବ ପ୍ରଶ୍ନ ପଚାରିଥିଲେ। ଏହାର ଜବାବରେ କୁହାଯାଇଛି ଯେ, ଓକିଲ ଅସପି ଚେନାୟ ବିଏମସି ପକ୍ଷରୁ କୋର୍ଟରେ ଯୁକ୍ତି ଉପସ୍ଥାପନ କରିଥିଲେ। ଏଥିପାଇଁ ବିଏମସି ତାଙ୍କୁ ଦୁଇ ଦିନ ପାଇଁ ୮୨ ଲକ୍ଷ ୫୦ ହଜାର ଟଙ୍କା ଦେଇଥିଲା। ବର୍ତ୍ତମାନ ଶରଦ ଯାଦବ ପ୍ରଶ୍ନ ଉଠାଇଛନ୍ତି ଯେ ନିଜର ବ୍ୟକ୍ତିଗତ କାମ ପାଇଁ ଟିକସଦାତାଙ୍କ ଟଙ୍କା କାହିଁକି ବିଏମସି ଖର୍ଚ୍ଚ କରୁଛି?
ଶରଦ ଯାଦବଙ୍କ ଅନୁଯାୟୀ, ପ୍ରଥମେ ବିଏମସି ଏହି ସୂଚନା ଦେବାକୁ ମନା କରିଦେଇଥିଲା | କିନ୍ତୁ ପରେ ଯେତେବେଳେ ସେମାନେ ଦାବି ପ୍ରତ୍ୟାହାର କରି ନଥିଲେ, ସେତେବେଳେ ବିଏମସି ଉତ୍ତର ଦେଇଥିଲା । ସେ ପଚାରିଛନ୍ତି ଯେ ବିଏମସିର ନିଜସ୍ୱ ଓକିଲ ଅଛନ୍ତି ଯେଉଁମାନେ ଅଧିକ ଟଙ୍କା ନେଉଛନ୍ତି | ଏହି ମାମଲା ପାଇଁ ବିଏମସି କ’ଣ ପାଇଁ ନିଜସ୍ୱ ଓକିଲଙ୍କ ସାହାଯ୍ୟ ନେଲା ନାହିଁ ବୋଲି ପ୍ରଶ୍ନ କରିଛନ୍ତି ଶରଦ ଯାଦବ |
ଏ ଖବର ସାମ୍ନାକୁ ଆସିବା ପରେ ଚଳଚ୍ଚିତ୍ର ଅଭିନେତ୍ରୀ କଙ୍ଗନା ରାନାୱତ ମଧ୍ୟ ନିଜର ପ୍ରତିକ୍ରିୟା ରଖିଛନ୍ତି। କଙ୍ଗନା ଟ୍ୱିଟ୍ କରି ଲେଖିଛନ୍ତି ଯେ, ବିଏମସି ମୋ ସହ ଲଢ଼ିବା ପାଇଁ ୮୨ ଲକ୍ଷ ଟଙ୍କା ଖର୍ଚ୍ଚ କରିଛି, ଜଣେ ମହିଳାଙ୍କୁ ହଇରାଣ କରିବା ପାଇଁ ସାଧାରଣ ଜନତାଙ୍କ ଟଙ୍କା ଖର୍ଚ କରାଯାଉଛି। ଏଥିରୁ ମହାରାଷ୍ଟ୍ର ସରକାରଙ୍କ ପରିସ୍ଥିତି ଜଣା ପଡୁଛି।
