ଶିକ୍ଷା କ୍ଷେତ୍ରରେ ମୁସଲିମ୍ ଛାତ୍ରଛାତ୍ରୀଙ୍କୁ ୫ପ୍ରତିଶତ ସଂରକ୍ଷଣ ଦେବେ ମହାରାଷ୍ଟ୍ର ସରକାର
ମୁମ୍ବାଇ: ମହାରାଷ୍ଟ୍ରର ମହା ବିକାଶ ଅଘାଡ଼ି(ଏମଭିଏ) ସରକାର ମୁସଲିମ୍ ଛାତ୍ର-ଛାତ୍ରୀମାନଙ୍କ ପାଇଁ ଏକ ବଡ଼ ଯୋଜନା ଆଣିବାକୁ ଯାଉଛନ୍ତି। ଖୁବ୍ ଶୀଘ୍ର ମହାରାଷ୍ଟ୍ରରେ ମୁସଲିମ୍ ଛାତ୍ର-ଛାତ୍ରୀମାନଙ୍କୁ ଶିକ୍ଷା କ୍ଷେତ୍ରରେ ୫ପ୍ରତିଶତ ସଂରକ୍ଷଣ ଦିଆଯିବା ନେଇ ଯୋଜନା କରୁଛି ଏମଭିଏ। ସରକାର। ସ୍କୁଲ ଏବଂ କଲେଜରେ ପଢ଼ୁଥିବା ମୁସଲିମ୍ ଛାତ୍ର-ଛାତ୍ରୀମାନଙ୍କୁ ଏହି ସୁବିଧା ଦେବାକୁ ଯାଉଛନ୍ତି ମହାରାଷ୍ଟ୍ରର ଉଦ୍ଧବ ଠାକରେ ସରକାର।
ସଂଖ୍ୟାଲଘୁ ବିଭାଗ ମନ୍ତ୍ରୀ ନବାବ୍ ମଲିକ୍ ଶୁକ୍ରବାର ଏହି ସୂଚନା ଦେଇ କହିଛନ୍ତି କି, ମହାରାଷ୍ଟ୍ର ସରକାର ଖୁବ୍ ଶୀଘ୍ର ସ୍କୁଲ ଏବଂ କଲେଜରେ ପଢ଼ୁଥିବା ମୁସଲିମ୍ ଛାତ୍ର-ଛାତ୍ରୀମାନଙ୍କୁ ୫ପ୍ରତିଶତ ସଂରକ୍ଷଣ ଦେବା ଲାଗି ବିଲ୍ ଆଣିବାକୁ ଯାଉଛନ୍ତି। ଦୀର୍ଘ ସମୟ ଧରି ଏହି ସୁବିଧା ଉପରେ ଆଲୋଚନା ଚାଲୁଥିଲେ ମଧ୍ୟ ଏ ନେଇ ବିଧାନସଭାରେ ବିଲ ପାସ୍ କରାଯାଇ ପାରିନାହିଁ। କିନ୍ତୁ ମହାରାଷ୍ଟ୍ର ସରକାର କିଛି ଦିନ ମଧ୍ୟରେ ବିଧାନସଭାରେ ଏହି ବିଲ୍ ପାସ କରାଇ ପାରିବେ ବୋଲି ଆଶା କରାଯାଉଥିବା କହିଛନ୍ତି ନବାବ୍ ମଲିକ୍।
ଏହା ସହ ସେ କହିଛନ୍ତି, ହାଇକୋର୍ଟ ଏ ନେଇ ଆଦେଶ ଦେଇ ସାରିଥିଲେ ମଧ୍ୟ ପୂର୍ବରୁ କ୍ଷମତାରେ ଥିବା ସରକାର ଏ ବିଷୟକୁ ନେଇ କୌଣସି ନିଷ୍ପତ୍ତି ନେଇ ନଥିଲେ। କିନ୍ତୁ ଆମ ସରକାର ହାଇକୋର୍ଟଙ୍କ ଆଦେଶକୁ ପାଳନ କରିବା ସହ ବିଧାନସଭାରେ ଏହି ବିଲ୍ ପାସ କରାଇବ ବୋଲି ଘୋଷଣା କରିଛି।
