ଯୁବକଙ୍କ ଜୀବନ ବଞ୍ଚାଇଲେ ଟ୍ରାଫିକ୍ ପୁଲିସ, ଗାଡ଼ି ଚଳାଉଥିବା ବେଳେ ହଠାତ୍ ହୃଦ୍ଘାତ ହେବା ଦେଖି ନିଜେ ଗାଡ଼ି ଚଳାଇ ପହଞ୍ଚିଲେ ଡ଼ାକ୍ତରଖାନାରେ
ଥାଣେ: ମହାରାଷ୍ଟ୍ରରେ ଜଣେ ଟ୍ରାଫିକ୍ ପୁଲିସ କନେଷ୍ଟବଳ କରିଥିବା କାମକୁ ନେଇ ଏବେ ଚର୍ଚ୍ଚା ଆରମ୍ଭ ହୋଇଛି । ଥାଣେ ଜିଲ୍ଲାରେ ଥିବା ଖରିଗାଓଁ ଟୋଲ ବୁଥ୍ ପାଖରେ ଜଣେ ଯୁବକ କାର୍ରେ ନିଜ ବୃଦ୍ଧ ବାପାଙ୍କୁ ନେଇ ଯାଉଥିବା ବେଳେ ହଠାତ୍ ହୃଦ୍ଘାତର ଶିକାର ହୋଇଥିଲେ । ଏ ଖବର କାର୍ଯ୍ୟରେ ଥିବା ଟ୍ରାଫିକ୍ କନେଷ୍ଟବଳଙ୍କୁ ମିଳିବା ପରେ ସେ ତୁରନ୍ତ ଗାଡ଼ି ପାଖକୁ ଯାଇ ଯୁବକଙ୍କୁ ଗାଡ଼ି ପଛରେ ବସାଇବା ସହ ନିଜେ ଗାଡ଼ି ଚଳାଇ ଡ଼ାକ୍ତରଖାନାରେ ନେଇ ପହଞ୍ଚାଥିଲେ । ଠିକ୍ ସମୟରେ ଡ଼ାକ୍ତରଖାନାରେ ପହଞ୍ଚିବାରୁ ଯୁବକଙ୍କ ଜୀବନ ବଞ୍ଚାଯାଇ ପାରିଲା ବୋଲି କହିଛନ୍ତି ଡ଼ାକ୍ତର । ତେବେ କନେଷ୍ଟବଳଙ୍କ ଏହି କାମ ପାଇଁ ତାଙ୍କୁ ପ୍ରଶଂସା କରାଯାଇଛି ।
Sambad is now on WhatsApp
Join and get latest news updates delivered to you via WhatsApp
ସୂଚନା ମୁତାବକ,ନିଖିଲ ତାମ୍ବୋଲେ ନାମକ ଜଣେ ଯୁବକ କାର୍ ଯୋଗେ ନିଜ ବୃଦ୍ଧ ବାପାଙ୍କୁ ନେଇ ପାଡ଼୍ଘାରୁ ଥାଣେ ଆଡ଼କୁ ଯାଉଥିଲେ । ମଧ୍ୟାହ୍ନ ୧୨.୩୦ ସମୟରେ ଯେତେବେଳେ ତାଙ୍କ ଗାଡ଼ି ଖରିଗାଓଁ ଟୋଲ ବୁଥ୍ ପାଖରେ ପହଞ୍ଚିଥିଲା, ସେତେବେଳେ ହଠାତ୍ ତାଙ୍କର ହୃଦ୍ଘାତ ହୋଇଥିଲା । ଯେତେବେଳେ ଟ୍ରାଫିକ୍ ପୁଲିସ କନେଷ୍ଟବଳ ପଣ୍ଠାରିନାଥ ମୁଣ୍ଡେଙ୍କୁ ଏ ବିଷୟରେ ସୂଚନା ମିଳିଲା ସେ ଗୋଟେ ସେକେଣ୍ଡ ମଧ୍ୟ ବିଳମ୍ବ ନ କରି ସେଠାରେ ପହଞ୍ଚିବା ସହ ନିଖିଲଙ୍କୁ ଥାଣେରେ ଥିବା ଜୁପିଟର ଡ଼ାକ୍ତରଖାନାରେ ନେଇ ପହଞ୍ଚିଥିଲେ । ଏବେ ନିଖିଲଙ୍କ ଅବସ୍ଥା ସ୍ଥିର ଥିବା ସହ ତାଙ୍କର ଚିକିତ୍ସା ଚାଲୁ ରହିଥିବା ଜଣା ପଡ଼ିଛି ।