ମଇ ପହିଲାରୁ ମହାରାଷ୍ଟ୍ରରେ ଏନପିଆର୍ ଲାଗୁ କରିବାକୁ ମୁଖ୍ୟମନ୍ତ୍ରୀଙ୍କ ଘୋଷଣା, କଂଗ୍ରେସ ଓ ଏନସିପିର ବିରୋଧ
ମୁମ୍ବାଇ: ଚଳିତ ବର୍ଷ ମଇ ପହିଲାରୁ ମହାରାଷ୍ଟ୍ରରେ ରାଷ୍ଟ୍ରୀୟ ଜନସଂଖ୍ୟା ରେଜିଷ୍ଟର୍(ଏନପିଆର) ଲାଗୁ ହେବ ବୋଲି ମୁଖ୍ୟମନ୍ତ୍ରୀ ଉଦ୍ଧବ ଠାକରେ ଘୋଷଣା କରିବା ପରେ ଏନେଇ ମହାବିକାଶ ଅଘାଡି ମେଣ୍ଟର ଅନ୍ୟ ଦୁଇ ପ୍ରମୁଖ ସହଯୋଗୀ କଂଗ୍ରେସ ଓ ଏନସିପି ତୀବ୍ର ବିରୋଧ କରୁଥିବା ଜଣାଯାଇଛି।
Sambad is now on WhatsApp
Join and get latest news updates delivered to you via WhatsApp
ଏହାର କାରଣ ହେଲା ଯେ ସମଗ୍ର ଦେଶରେ ଏନପିଆର,ଏନଆରସି ଓ ସିଏଏକୁ କଂଗ୍ରେସ ପକ୍ଷରୁ ବିରୋଧ କରାଯାଉଛି। ଅପରପକ୍ଷରେ ଏନସିପି ପକ୍ଷରୁ ଏହାକୁ ବିରୋଧ କରାଯାଇନଥିଲେ ମଧ୍ୟ ସମର୍ଥନ ମଧ୍ୟ ଦିଆଯାଇନାହିଁ । ଏନସିପି ନେତା ତଥା ମନ୍ତ୍ରୀ ଅନୀଲ ଦେଶମୁଖ ଏନପିଆରକୁ ବିରୋଧ କରୁଥିବା ପ୍ରତିନିଧିମାନଙ୍କ ସହ ଆଲୋଚନା କରାଯିବା ଉଚିତ ବୋଲି ମତ ଦେଇଛନ୍ତି। ସେ ଆହୁରି ମଧ୍ୟ କହିଛନ୍ତି ଯେ ଏସଂପର୍କରେ ଆଇନ ବିଶେଷଜ୍ଞଙ୍କ ପରାମର୍ଶ ନେବା ଉଚିତ।
ସୂଚନାଯୋଗ୍ୟ, ଏନପିଆର, ଏନଆରସି ଓ ସିଏଏ କୁ ନେଇ ଦେଶରେ ପ୍ରବଳ ବିରୋଧ କରାଯାଉଥିଲେ ମଧ୍ୟ ମଇ ୧ ତାରିଖରୁ ଜୁନ ୧୫ ତାରିଖ ମଧ୍ୟରେ ଏନପିଆର୍ ଜରିଆରେ ସମସ୍ତ ରାଜ୍ୟ ତଥ୍ୟ ଏକାଠି କରିବା ପାଇଁ କେନ୍ଦ୍ର ଗୃହ ମନ୍ତ୍ରାଳୟ ପକ୍ଷରୁ ନିର୍ଦେଶ ଜାରି ହୋଇଛି। ଏହି ନିର୍ଦେଶ ଅନୁସାରେ ମହାରାଷ୍ଟ୍ର ରେଜିଷ୍ଟ୍ରାର୍ ଜେନେରାଲ୍ ତଥା ଜନଗଣନା ଆଯୁକ୍ତଙ୍କ କାର୍ଯ୍ୟାଳୟ ପକ୍ଷରୁ ଏନପିଆର ଓ ଜନଗଣନାକୁ ନେଇ ରାଜ୍ୟର ବରିଷ୍ଠ ଅଧିକାରୀଙ୍କ ସହ ଇତିମଧ୍ୟରେ ଏକ ଗୁରୁତ୍ୱପୂର୍ଣ୍ଣ ବୈଠକ ଅନୁଷ୍ଠିତ ହୋଇଯାଇଥିବାର ସୂଚନା ମିଳିଛି । ରାଜ୍ୟରେ ଏନପିଆର ଓ ଜନଗଣନା ପାଇଁ ୩.୩୪ ଲକ୍ଷ କର୍ମଚାରୀ ସାମିଲ ହେବେ ବୋଲି ଜଣାଯାଇଛି ।