ମୁମ୍ବାଇ: ୪୦ ଦିନ ପରେ ମହାରାଷ୍ଟ୍ରର ସିନ୍ଦେ ସରକାରଙ୍କ କ୍ୟାବିନେଟ ମନ୍ତ୍ରୀମାନେ ଶେଷରେ ମଙ୍ଗଳବାର ଦିନ ଶପଥ ନେଇଛନ୍ତି । ନୂତନ ମନ୍ତ୍ରିମଣ୍ଡଳରେ ସିନ୍ଦେଙ୍କ ଶିବସେନାରୁ ୯ ଜଣ ଏବଂ ବିଜେପିରୁ ୯ ଜଣ ମନ୍ତ୍ରୀ ହୋଇଛନ୍ତି। ଏହି ପରିପ୍ରେକ୍ଷୀରେ ମୁଖ୍ୟମନ୍ତ୍ରୀଙ୍କ ସମେତ ସିନ୍ଦେ କ୍ୟାବିନେଟରେ ମୋଟ ମନ୍ତ୍ରୀଙ୍କ ସଂଖ୍ୟା ୨୦କୁ ବୃଦ୍ଧି ପାଇଛି। ତେବେ ଆମେ ଆପଣଙ୍କୁ ମନ୍ତ୍ରିମଣ୍ଡଳରେ ସ୍ଥାନ ପାଇଥିବା ମନ୍ତ୍ରୀମାନଙ୍କ ଶିକ୍ଷାଗତ ଯୋଗ୍ୟତା ସହ ସମ୍ପତ୍ତି ବାବଦରେ କହିବୁ | ରତ୍ନଗିରି ବିଧାନସଭା ଆସନରୁ ଜିତିଥିବା ଶିବସେନା ବିଧାୟକ ଉଦୟ ସାମନ୍ତ କ୍ୟାବିନେଟର ସର୍ବକନିଷ୍ଠ ମନ୍ତ୍ରୀ। ୪୬ ବର୍ଷୀୟ ସାମନ୍ତ ନିର୍ବାଚନ ଆଫିଡେଭିଟରେ ଜଣେ କୃଷକ ତଥା ସମାଜସେବୀ ବୋଲି କହିଥିଲେ । ସାମନ୍ତଙ୍କ ବ୍ୟତୀତ ଅନ୍ୟ ୧୯ଜଣ ମନ୍ତ୍ରୀଙ୍କ ବୟସ ୫୦ ବର୍ଷରୁ ଅଧିକ ହୋଇଥିବାବେଳେ ସାମନ୍ତଙ୍କ ପରେ ଯୁବ ମନ୍ତ୍ରୀମାନଙ୍କ ମଧ୍ୟରେ ୫୨ ବର୍ଷୀୟ ଦେବେନ୍ଦ୍ର ଫଡନାଭିସ୍ ଏବଂ ରବିନ୍ଦ୍ର ଚୌହାନଙ୍କ ନାମ ରହିଛି |
Sambad is now on WhatsApp
Join and get latest news updates delivered to you via WhatsApp
ଏଥି ସହିତ ଶିବସେନା ଟିକେଟରେ ଜିତିଥିବା ଦୀପକ କେସରକର ମନ୍ତ୍ରିମଣ୍ଡଳର ବରିଷ୍ଠ ମନ୍ତ୍ରୀ ହୋଇଛନ୍ତି |୨୦୧୯ ବିଧାନସଭା ନିର୍ବାଚନରେ ୬୭ ବର୍ଷୀୟ କେସରକର ସାୱନ୍ତୱାଡି ବିଧାନସଭା ଆସନ ଜିତିଥିଲେ। କ୍ୟାବିନେଟରେ ଥିବା ୧୧ଜଣ ମନ୍ତ୍ରୀଙ୍କ ବୟସ ୬୦ ବର୍ଷରୁ ଅଧିକ ହୋଇଥିବାବେଳେ ମୁଖ୍ୟମନ୍ତ୍ରୀ ଏକନାଥ ସିନ୍ଦେଙ୍କୁ ୫୮ ବର୍ଷ ବୟସ ବୋଲି ଜଣାପଡିଛି | ଏକନାଥ ସିନ୍ଦେ ତାଙ୍କ କ୍ୟାବିନେଟରେ ସର୍ବନିମ୍ନ ଶିକ୍ଷିତ ମନ୍ତ୍ରୀମାନଙ୍କ ମଧ୍ୟରୁ ଜଣେ। ମନ୍ତ୍ରିମଣ୍ଡଳରେ ଦୁଇ ଜଣ ମନ୍ତ୍ରୀ ଦଶମ ପାସ୍ କରିଛନ୍ତି।
ଏଥିମଧ୍ୟରେ ଏକନାଥ ସିନ୍ଦେ ଏବଂ ସନ୍ଦୀପନ ରାଓ ଭୁମରେ ରହିଛନ୍ତି | ସିନ୍ଦେ କ୍ୟାବିନେଟରେ ମୁଖ୍ୟମନ୍ତ୍ରୀଙ୍କ ସମେତ ସମସ୍ତ ୨୦ ଜଣ ମନ୍ତ୍ରୀ ହେଉଛନ୍ତି କୋଟିପତି। ଶିବସେନାର ସନ୍ଦୀପନ ରାଓ କ୍ୟାବିନେଟର ସବୁଠାରୁ ଗରିବ ମନ୍ତ୍ରୀ। ୨୦୧୯ ବିଧାନସଭା ନିର୍ବାଚନରେ ସନ୍ଦୀପନ ତାଙ୍କର ମୋଟ ସମ୍ପତ୍ତି ୨.୯୨ କୋଟି ଟଙ୍କା ବୋଲି ଘୋଷଣା କରିଥିଲେ। ଅନ୍ୟପକ୍ଷରେ ମଙ୍ଗଲ ପ୍ରଭାତ ଲୋଡା କ୍ୟାବିନେଟର ସବୁଠାରୁ ଧନୀ ମନ୍ତ୍ରୀ । ୨୦୧୯ ବିଧାନସଭା ନିର୍ବାଚନ ଆଫିଡେଭିଟରେ ଲୋଡାଙ୍କର ମୋଟ ୪୪୧.୬୫ କୋଟି ଟଙ୍କା ଥିବାର ଘୋଷଣା କରିଥିଲେ।