ମହାରାଷ୍ଟ୍ରରେ ଚାଲିଥିବା ରାଜନୈତିକ ଖେଳର ମୁଖ୍ୟ ଖେଳାଳି କିଏ ?
ମୁମ୍ବାଇ : ମହାରାଷ୍ଟ୍ରରେ ଚାଲିଥିବା ରାଜନୈତିକ ଖେଳ ଦିନକୁ ଦିନ ଅଧିକ ରୋଚକ ହେଉଛି । ଶନିବାର ଦିନ ବିଜେପିର ଦେବେନ୍ଦ୍ର ଫଡନବୀସ ମୁଖ୍ୟମନ୍ତ୍ରୀଭାବେ ଶପଥ ନେବା ପରେ ସ୍ଥିତି ସ୍ପଷ୍ଟ ହେବା ବଦଳରେ ଅଧିକ ଜଟିଳ ହୋଇଛି । ତେବେ ଏହା ସମସ୍ତେ ସ୍ୱୀକାର କରିବେ ଯେ ଏସବୁ ନାଟକର କେନ୍ଦ୍ରରେ ରହିଛନ୍ତି ପାଓ୍ଵାର ପରିବାର ।
Sambad is now on WhatsApp
Join and get latest news updates delivered to you via WhatsApp
ଗତକାଲି ଶରଦ ପାଓ୍ଵାରଙ୍କ ପୁତୁରା ଅତିତ ପାଓ୍ଵାରଙ୍କ ସମର୍ଥନରେ ଫଡନବୀସ ଶପଥ ନେବା ପରେ ସଂଧ୍ୟାରେ ଶରଦ ପାଓ୍ଵାର ଅଧିକାଂଶ ବିଧାୟକଙ୍କୁ ଏକାଠି କରି ନିଜର ଶକ୍ତି ପ୍ରଦର୍ଶନ କରିଥିଲେ । କିନ୍ତୁ ଆଜି ଅର୍ଥାତ ରବିବାରଦିନ ଅଜିତ ପାଓ୍ଵାର ଟ୍ଵିଟ କରି ଜଣାଇଲେ ଯେ ସବୁକିଛି ଠିକ ଅଛି, ଆସନ୍ତା ୫ ବର୍ଷ ପର୍ଯ୍ୟନ୍ତି ବିଜେପି-ଏନସିପି ସରକାର ଚାଲିବ । ଏହାର କିଛି ସମୟ ପରେ ଶରଦ ପାଓ୍ଵାର ଟ୍ଵିଟ କରି ସ୍ପଷ୍ଟ କଲେ ଯେ ବିଜେପି ସହିତ କୌଣସି ମେଣ୍ଟ ହୋଇନାହିଁ, ମେଣ୍ଟ କେବଳ ଶିବସେନା ଓ କଂଗ୍ରେସ ସହିତ ହୋଇଛି । କିନ୍ତୁ ଦାଦା ପୁତୁରାଙ୍କ ଏହି ଟ୍ଵିଟର ଯୁଦ୍ଧ ସ୍ଥିତିକୁ ସ୍ପଷ୍ଟ କରିବା ବଦଳରେ ଜଟିଳ କରିଦେଇଛି ।
ଅଜିତଙ୍କ ବିଦ୍ରୋହ ସତ୍ତ୍ୱେ ଶରଦ ପାଓ୍ଵାର ତାଙ୍କୁ ଏପର୍ଯ୍ୟନ୍ତ ଦଳରୁ ବହିଷ୍କାର କରିନାହାନ୍ତି । ଆହୁରି ମଧ୍ୟ କିଛି ଦିନ ତଳେ ଶରଦ ପାଓ୍ଵାର ମୋଦୀଙ୍କୁ ଭେଟିବା ଓ ମୋଦୀ ସଂସଦରେ ଏନସିପିକୁ ପ୍ରସଂଶା କରିବା ଏକ ଭିନ୍ନ ସମୀକରଣ ନେଇ ସଂଦେହ ସୃଷ୍ଟି କରିଥିଲା । ଏପର୍ଯ୍ୟନ୍ତ ଏହି ସଂଦେହ ତୁଟିବା ବଦଳରେ ଅଧିକ ଗଭୀର ହେବାରେ ଲାଗିଛି ।