ଭାରତର ତେଜସ ଲଢୁଆ ବିମାନ କିଣିବାକୁ ମାଲେସିଆର ଆଗ୍ରହ
ନୂଆଦିଲ୍ଲୀ : ଭାରତର ସ୍ବଦେଶୀ ଜ୍ଞାନକୌଶଳରେ ନିର୍ମିତ ଲଢୁଆ ବିମାନ ଏଲସିଏ ବା ତେଜସକୁ କିଣିବାକୁ ଆଗ୍ରହ ପ୍ରକାଶ କରିଛି ମାଲେସିଆର ବାୟୁସେନା । ଏହି ବିମାନର ଦକ୍ଷତା ପରଖିବାକୁ ମାଲେସିଆ ବାୟୁସେନାର ଏକ ବିଶେଷଜ୍ଞ ଦଳ ଭାରତ ଆସିବାର କାର୍ଯ୍ୟକ୍ରମ ରହିଛି ।
Sambad is now on WhatsApp
Join and get latest news updates delivered to you via WhatsApp
ମିଳିଥିବା ସୂଚନା ଅନୁସାରେ ମାଲେସିଆ ବାୟୁସେନାର ବିଶେଷଜ୍ଞ ଦଳ ଆସନ୍ତା ଦୁଇ ମାସ ମଧ୍ୟରେ ବାଙ୍ଗାଲୁରୁସ୍ଥିତ ହାଲ୍ ମୁଖ୍ୟାଳୟରେ ପହଞ୍ଚି ତେଜସର ପର୍ଯ୍ୟବେକ୍ଷଣ କରିବେ । ଏହି ଅବସରରେ ହାଲ ପକ୍ଷରୁ ଏହି ବିମାନର ଟେକନଲୋଜୀ, ଉତ୍ପାଦନ ଓ ଲଢୁଆ ଦକ୍ଷତା ସମ୍ପର୍କରେ ସବିଶେଷ ପ୍ରଦର୍ଶନ କରାଯିବ ।
ରାଷ୍ଟ୍ରାୟତ୍ତ ଉଦ୍ୟୋଗ ହିନ୍ଦୁସ୍ତାନ ଏରୋନୋଟିକ୍ସ ଲିଃ (ହାଲ) ପକ୍ଷରୁ ନିର୍ମାଣ କରାଯାଉଥିବା ଲାଇଟ କମ୍ବାଟ୍ ଏୟାରକ୍ରାଫ୍ଟ ବା ତେଜସ ଏକ ୪ର୍ଥ ପିଢିର ଲଢୁଆ ବିମାନ । ଏହା ଏକ ସିଙ୍ଗଲ ଇଂଜିନ ମଲଟିରୋଲ ଲଢୁଆ ବିମାନ । ବିଶ୍ବର ଅନ୍ୟ ଲଢୁଆ ବିମାନ ସହ ଏହା ସମକକ୍ଷ ବୋଲି ହାଲ ଦାବି କରୁଛି । ୨୦୨୬ ସୁଦ୍ଧା ଭାରତୀୟ ବାୟୁସେନାକୁ ୬୦ଟି ତେଜସ ଯୋଗାଣ ପାଇଁ ହାଲ ଚୁକ୍ତି କରିଛି ।
ୟୁରୋପୀୟ ଲଢୁଆ ବିମାନଗୁଡ଼ିକ ତୁଳନାରେ ଭାରତର ତେଜସ ଅପେକ୍ଷାକୃତ ଶସ୍ତା ହୋଇଥିବାବେଳେ ଏହାର ଦକ୍ଷତା ମଧ୍ୟ ଆଶାନୁରୂପ ରହିଛି । ଏଣୁ ଏହା ମାଲେସିଆ ବାୟୁସେନାର ଦୃଷ୍ଟି ଆକର୍ଷଣ କରିଛି ।