ଜାକିର ନାଏକକୁ ଭାରତ ଅଣାଯିବା ସମ୍ଭାବନା ବଢିଲା
ନୂଆଦିଲ୍ଲୀ: ବିବାଦୀୟ ଇସ୍ଲାମିକ୍ ଶିକ୍ଷକ ଜାକିର ନାଏକକୁ ଭାରତକୁ ଅଣାଯିବାର ସମ୍ଭାବନା ରହିଛି । ଜାକିରର ପ୍ରତ୍ୟାର୍ପଣ ନେଇ ଭାରତର ବୈଦେଶିକ ମନ୍ତ୍ରାଳୟ ପକ୍ଷରୁ ମାଲେସିଆ ସରକାରଙ୍କ ନିକଟରେ ଆବେଦନ କରାଯାଇଛି । ଜାତୀୟ ତଦନ୍ତକାରୀ ସଂସ୍ଥା ଏନଆଇଏ ଏ ସଂପର୍କରେ ସମସ୍ତ ତଥ୍ୟ ପ୍ରମାଣ ସଂଗ୍ରହ କରିବା ପରେ ଏହି ଆବେଦନ କରାଯାଇଛି ।
Sambad is now on WhatsApp
Join and get latest news updates delivered to you via WhatsApp
କିଛିଦିନ ତଳେ ମାଲେସିଆର ଏକ କୋର୍ଟ କହିଥିଲେ ଯେ ଭାରତ ସରକାର ଜାକିର ନାଏକ ପ୍ରତ୍ୟାର୍ପଣ ମାମଲାରେ ଆବେଦନ କଲେ ତାହାର ଶୁଣାଣୀ କରାଯିବ । ମାଲେସିଆ ସରକାର ମଧ୍ୟ ପ୍ରତ୍ୟର୍ପଣ ପାଇଁ ପ୍ରସ୍ତୁତ ଥିବା ପୂର୍ବରୁ ସଂକେତ ଦେଇଥିଲେ । ଗତ ନଭେମ୍ବର ମାସରେ ମାଲେସିଆର ଉପ-ପ୍ରଧାନମନ୍ତ୍ରୀ ମହମ୍ମଦ ଜାହିଦ କହିଥିଲେ ଯେ ଭାରତ-ମାଲେସିଆ ମଧ୍ୟରେ ସ୍ୱାକ୍ଷରିତ ପାରସ୍ପରିକ ଆଇନ ସହାୟତା ଚୁକ୍ତି ଅଧିନରେ ଭାରତ ସରକାର ଏକ ଅନୁରୋଧ ପଠେଇଲେ ପ୍ରତ୍ୟାର୍ପଣ କରାଯିବାରେ କିଛି ଅସୁବିଧା ନାହିଁ ।
ଗତ ବର୍ଷ ଅକ୍ଟୋବର ମାସରେ ଏନଆଇଏ ପକ୍ଷରୁ ଦାଏର ଚାର୍ଜସିଟ୍ରେ କୁହାଯାଇଥିଲା ଯେ ଜାକିର ନାଏକ ଜାଣିଶୁଣି ହିନ୍ଦୁ, ଖ୍ରୀଷ୍ଟିଆନ, ସିହା, ସୁଫି ଆଦି ଧର୍ମାବଲମ୍ବୀ ଲୋକଙ୍କ ଧାର୍ମିୟ ଭାବନାକୁ ଆଘାତ ପହଞ୍ଚାଇଛି । ତାହାର ଉତ୍ତେଜନାପୂର୍ଣ୍ଣ ଭାଷଣରେ ପ୍ରଭାବିତ ହୋଇ ଅନେକ ଯୁବକ ଆଇଏସଆଇଏସ ପରି ଆତଙ୍କବାଦୀ ସଂଗଠନରେ ଯୋଗ ଦେଇଛନ୍ତି । ଦେଶର ସାଂପ୍ରଦାୟିକ ସଦ୍ଭାବକୁ ନଷ୍ଟ କରିବା ଅଭିଯୋଗରେ ତା ବିରୋଧରେ ବିଭିନ୍ନ ଦଫା ଲଗାଯାଇଛି ।