ଆର୍‌ଜି କର ହସ୍ପିଟାଲରେ ଦୁଷ୍କର୍ମ-ହତ୍ୟା ମାମଲା: ପୀଡ଼ିତାଙ୍କ ପ୍ରତିମୂର୍ତ୍ତିକୁ ନେଇ ତୀବ୍ର ପ୍ରତିକ୍ରିୟା

କୋଲକାତା: ଅଗଷ୍ଟ ୯ ତାରିଖରେ ଦୁଷ୍କର୍ମ-ହତ୍ୟାର ଶିକାର ହୋଇଥିବା ୩୧ ବର୍ଷୀୟ ପିଜିଟି ଡାକ୍ତରଙ୍କୁ ଶ୍ରଦ୍ଧାଞ୍ଜଳି ଜଣାଇ ଆର୍‌ଜି କର ମେଡିକାଲ କଲେଜ ଓ ହସ୍ପିଟାଲର କନିଷ୍ଠ ଡାକ୍ତରମାନେ ଏକ ପ୍ରତିମୂର୍ତ୍ତି ଉନ୍ମୋଚନ କରିଛନ୍ତି। ପ୍ରଖ୍ୟାତ ଚିତ୍ରଶିଳ୍ପୀ ଅସିତ ସାଇନଙ୍କ ଦ୍ୱାରା ନିର୍ମିତ ‘କ୍ରାଇ ଅଫ୍ ଦି ଆୱାର’ ନାମକ ଏହି ମୂର୍ତ୍ତିଟି ପୀଡ଼ିତାଙ୍କ ଯନ୍ତ୍ରଣା ଓ ଆଘାତକୁ ଚିତ୍ରଣ କରିବା ପାଇଁ ଉଦ୍ଦିଷ୍ଟ। ପ୍ରିନ୍ସିପାଲଙ୍କ କାର୍ଯ୍ୟାଳୟ ନିକଟସ୍ଥ ପିଜିବି ଗାର୍ଡେନ୍ ସମ୍ମୁଖରେ ଏହାକୁ ରଖାଯାଇଛି। 

ଫାଇବରଗ୍ଲାସରେ ନିର୍ମିତ ଏହି ମୂର୍ତ୍ତିରେ ଚିତ୍କାର କରୁଥିବା ଜଣେ ମହିଳାଙ୍କ ପ୍ରତିମୂର୍ତ୍ତିକୁ ଦର୍ଶାଯାଇଛି। ଜଣେ କନିଷ୍ଠ ଡାକ୍ତର କହିଛନ୍ତି, ଏହା ଆମ ପାଇଁ ଏକ ଭାବପ୍ରବଣ ମୁହୂର୍ତ୍ତ। ସେ ଆମର ସହକର୍ମୀ ଥିଲେ। ଆମେ ତାଙ୍କ ପାଇଁ ଲଢ଼େଇ କରୁଛୁ। ସେ ଆମ ହୃଦୟରେ ଅଛନ୍ତି, କିନ୍ତୁ ଏହି ମୂର୍ତ୍ତି ପ୍ରତିଷ୍ଠା ସୁନିଶ୍ଚିତ କରିବ ଯେ କେହି ତାଙ୍କୁ କେବେ ବି ଭୁଲିବେ ନାହିଁ। ହସ୍ପିଟାଲର ଅନ୍ୟ ଜଣେ କନିଷ୍ଠ ଡାକ୍ତର କହିଛନ୍ତି, ଏହି ପ୍ରତିମୂର୍ତ୍ତି ପୀଡ଼ିତାଙ୍କର ନୁହେଁ, ବରଂ ଏହା ସେ ପାଇଥିବା ଯନ୍ତ୍ରଣା, ନିର୍ଯାତନା ଏବଂ ଚାଲିଥିବା ପ୍ରତିବାଦର ପ୍ରତୀକ। କିନ୍ତୁ ଏହି ମୂର୍ତ୍ତିଟି ଭଲ ଉଦ୍ଦେଶ୍ୟରେ ହୋଇଥାଇପାରେ, ମାତ୍ର ଏହା ଅପମାନଜନକ ଓ ଅସମ୍ବେଦନଶୀଳ ବୋଲି ସୋସିଆଲ ମିଡିଆରେ ଅନେକ ପ୍ରତିକ୍ରିୟା ପ୍ରକାଶ ପାଇଛି। ଦୁଷ୍କର୍ମ ପୀଡ଼ିତାଙ୍କୁ ଆଧାର କରି ଏଭଳି ପ୍ରତିମୂର୍ତ୍ତି କାହିଁକି ତିଆରି କରାଯାଇଛି ବୋଲି ଜଣେ ଏକ୍ସ ୟୁଜର ପ୍ରଶ୍ନ କରିଛନ୍ତି। କିଏ ଭାବିଲା ଏହା ଏକ ଭଲ ଧାରଣା? ଏହାକୁ କିଏ ଅନୁମୋଦନ କରିଛି ବୋଲି ଅନ୍ୟମାନେ ପ୍ରଶ୍ନ କରିଛନ୍ତି।