ବୀରଭୂମ ହତ୍ୟା: ବିଜେପି ପ୍ୟାନେଲର ରିପୋର୍ଟକୁ ମମତା ବାନାର୍ଜୀଙ୍କ ନିନ୍ଦା
କୋଲକାତା: ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ ବୁଧବାର କହିଛନ୍ତି ଯେ, ବୀରଭୂମ ହିଂସା ବାବଦରେ ବିଜେପି ଅଧ୍ୟକ୍ଷ ଜେପି ନଡ୍ଡାଙ୍କୁ ଦିଆଯାଇଥିବା ବିଜେପି ସତ୍ୟ-ଉଦ୍ଘାଟନ କମିଟିର ରିପୋର୍ଟ ହେଉଛି ଉଦ୍ଦେଶ୍ୟ-ପ୍ରଣୋଦିତ। ଏହା ସିବିଆଇ ତଦନ୍ତକୁ ପ୍ରଭାବିତ ଓ ବାଟବଣା କରିବ।
Sambad is now on WhatsApp
Join and get latest news updates delivered to you via WhatsApp
ସୂଚନାଯୋଗ୍ୟ, ତୃଣମୂଳ କଂଗ୍ରେସ ନେତା ଭଦୁ ଶେଖଙ୍କ ହତ୍ୟା ଘଟଣା ପରେ ମାର୍ଚ୍ଚ ୨୧ ତାରିଖରେ ରାମପୁର ହାଟ ନିକଟ ବଗତୁଇ ଗାଁରେ ପେଟ୍ରୋଲ ବମ୍ ପକାଇ ଘର ପୋଡ଼ିବା ସହ ୮ ଜଣ ଲୋକଙ୍କୁ ଜିଅନ୍ତା ଜାଳି ଦିଆଯାଇଥିଲା ଏବଂ ପରେ ଆଉ ଜଣେ ଆହତଙ୍କର ହସ୍ପିଟାଲରେ ମୃତ୍ୟୁ ଘଟିଥିଲା। ଏହି ଘଟଣା ଉପରେ ବିଜେପିର ଫ୍ୟାକ୍ଟ-ଫାଇଣ୍ଡିଂ କମିଟି ଯେଉଁ ରିପୋର୍ଟ ପ୍ରସ୍ତୁତ କରିଛି ତାହା ଉଦ୍ଦେଶ୍ୟ-ପ୍ରଣୋଦିତ ବୋଲି ମମତା ଅଭିଯୋଗ କରିଛନ୍ତି। ବିଜେପି ଓ କେନ୍ଦ୍ର ସରକାରଙ୍କର ଏଭଳି ମନୋଭାବକୁ ସେ ନିନ୍ଦା କରିଛନ୍ତି। ସେ କହିଛନ୍ତି ଯେ, ଯେତେବେଳେ ଗୋଟିଏ ତଦନ୍ତ ଚାଲିଛି ସେତେବେଳେ କୌଣସି ଦଳ ପକ୍ଷରୁ ସେଥିରେ ହସ୍ତକ୍ଷେପ କରାଯିବା ଉଚିତ ନୁହେଁ। ଏହା କ୍ଷମତାର ଦୁରୁପଯୋଗ। ଏହା ଖରାପ, ପ୍ରତିହିଂସାତ୍ମକ ଓ ପକ୍ଷପାତଦୁଷ୍ଟ ମନୋଭାବ। ବିଜେପି କ’ଣ ଭାବୁଛି ସେମାନେ ଏକା ଏ ଦେଶରେ ରହିବେ ବୋଲି ମମତା ପ୍ରଶ୍ନ କରିଥିଲେ।