କେନ୍ଦ୍ରମନ୍ତ୍ରୀ ନିତିନ ଗଡକରୀଙ୍କୁ ଭେଟି ବିଭିନ୍ନ ପ୍ରକଳ୍ପ ଉପରେ ଆଲୋଚନା କଲେ ମୁଖ୍ୟମନ୍ତ୍ରୀ ମମତା ବାନାର୍ଜୀ
ନୂଆଦିଲ୍ଲୀ: ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ତଥା ତୃଣମୂଳ କଂଗ୍ରେସର ନେତ୍ରୀ ମମତା ବାନାର୍ଜୀ ୫ ଦିନିଆ ଦିଲ୍ଲୀ ଗସ୍ତରେ ଅଛନ୍ତି । ଏହି କ୍ରମରେ ଗତକାଲି ସେ କଂଗ୍ରେସ ଅଧ୍ୟକ୍ଷା ସୋନିଆ ଗାନ୍ଧୀ, ରାହୁଲ ଗାନ୍ଧୀ ଓ ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲଙ୍କୁ ଭେଟିଥିବା ବେଳେ ଆଜି କେନ୍ଦ୍ର ସରକାରଙ୍କ ସଡ଼କ ଓ ପରିବହନ ମନ୍ତ୍ରୀ ନିତିନ ଗଡକରୀଙ୍କୁ ଭେଟିଛନ୍ତି । ଆଜି କେନ୍ଦ୍ରମନ୍ତ୍ରୀ ଗଡକରୀଙ୍କ ବାସଭବନରେ ତାଙ୍କୁ ଭେଟି ଆଲୋଚନା କରିଛନ୍ତି ମମତା ବାନାର୍ଜୀ । ବିଭିନ୍ନ ପ୍ରକଳ୍ପ ନେଇ କେନ୍ଦ୍ରମନ୍ତ୍ରୀଙ୍କ ସହ ଆଲୋଚନା ମମତା ବାନାର୍ଜୀ କରିଥିବା ଜଣାପଡ଼ିଛି ।
Sambad is now on WhatsApp
Join and get latest news updates delivered to you via WhatsApp
ଏହା ବ୍ୟତୀତ ଏନସିପି ନେତା ଶରଦ ପାୱାର, ଶିବସେନା ମୁଖପାତ୍ର ସଂଜୟ ରାୱତ, ଗୀତିକାର ଜାଭେଦ୍ ଅଖତାରଙ୍କୁ ଭେଟିବାର କାର୍ଯ୍ୟକ୍ରମ ରହିଛି । ଏହାସହ ବଲିଉଡ ଅଭିନେତ୍ରୀ ତଥା ସାମାଜିକ କର୍ମୀ ଶବନା ଆଜମୀଙ୍କୁ ଭେଟିପାରନ୍ତି ବୋଲି ଅନୁମାନ କରାଯାଇଛି ।
୨୦୨୪ ନିର୍ବାଚନରେ ବିରୋଧୀମାନଙ୍କୁ ଏକଜୁଟ କରି ମୋଦୀ ସରକାରଙ୍କ ବିରୋଧରେ ଛିଡ଼ା କରିବାକୁ କରିଛନ୍ତି ମମତା । ପଶ୍ଚିମବଙ୍ଗରେ ତୃତୀୟ ଥର ପାଇଁ ମୁଖ୍ୟମନ୍ତ୍ରୀ ହେବା ଓ ବିଜେପିର ସବୁ କଳ, ବଳ କୌଶଳକୁ ଶେଷ କରି ରାଜ୍ୟରେ ବହୁମତ ହାସଲ କରିବା ପରେ ମମତା କେନ୍ଦ୍ର ରାଜନୀତିରେ ପାଦ ଥାପିବାକୁ ଚେଷ୍ଟା କରିଛନ୍ତି ।
ଏହି କ୍ରମରେ ସେ ଗତକାଲି ଦିଲ୍ଲୀରେ ସୋନିଆ ଗାନ୍ଧୀଙ୍କୁ ଭେଟିବା ପରେ ବିଜେପିକୁ ଟାର୍ଗେଟ କରି ଗଣମାଧ୍ୟମରେ କହିଥିଲେ କି, ବିଜେପି ଅପରାଜେୟ ନୁହେଁ, ଯଦି ସବୁ ବିରୋଧୀ ଦଳ ଏକାଠି ହୋଇଯିବେ ତେବେ ଦେଶର ରାଜନୈତିକ ଦୃଶ୍ୟପଟ ୬ ମାସ ମଧ୍ୟରେ ବଦଳିଯିବ । ଅନ୍ୟପଟେ ବିରୋଧୀ ଦଳର ଚେହେରା କିଏ ହେବ ବୋଲି ଗଣମାଧ୍ୟମ ପଚାରିଥିବା ପ୍ରଶ୍ନର ଉତ୍ତର ଦେଇ ସେ କହିଥିଲେ କି ଭୋଟରମାନେ ହିଁ ମୁଖ୍ୟ ଚେହେରା । ଯିଏ ସେମାନଙ୍କୁ ଦେଶର ବାସ୍ତବ ଚିତ୍ର ଦେଖାଇପାରିବ ସେ ହିଁ ହେବ ମୁଖ୍ୟ ।
ଅନ୍ୟପଟେ ଆଜି ନିତିନ ଗଡକରୀଙ୍କୁ ଭେଟିବା ନେଇ କାରଣ ସ୍ପଷ୍ଟ ହୋଇ ନଥିଲେ ବି କିଛିଦିନ ହେବ ବିଜେପି ଉପରେ ଗଡକରୀ ସନ୍ତୁଷ୍ଟ ନାହାନ୍ତି । ତୈଳଦର ବୃଦ୍ଧିନେଇ ସେ ଇସାରାରେ ବିଜେପିକୁ ବିରୋଧ କରିଥିଲେ । ଅନୁମାନ କରାଯାଉଛି ଯେ ନିତିନ ଗଡକରୀଙ୍କୁ ଭେଟି ମମତା ଦିଲ୍ଲୀ ରାଜନୀତିରେ ନୂଆ ଚାଲ୍ ଖେଳିବାକୁ ଯାଉଛନ୍ତି ।