ୟୁପିଏ ବୋଲି ଆଉ କିଛି ନାହିଁ : ମମତା
ନୂଆଦିଲ୍ଲୀ : କଂଗ୍ରେସ ନେତୃତ୍ବାଧୀନ ମିଳିତ ପ୍ରଗତିଶୀଳ ମେଣ୍ଟ (ୟୁପିଏ)ର ଏବେ ସ୍ଥିତି କ’ଣ ? ଏହି ପ୍ରଶ୍ନକୁ ନେଇ ଏବେ ମୁହାଁମୁହିଁ ହୋଇଛନ୍ତି ତୃଣମୂଳ କଂଗ୍ରେସ ଓ କଂଗ୍ରେସ ।
Sambad is now on WhatsApp
Join and get latest news updates delivered to you via WhatsApp
ଆଜି ଏନସିପି ନେତା ଶରଦ ପାଓ୍ବାରଙ୍କୁ ଭେଟିବା ଅବସରରେ ତୃଣମୂଳ କଂଗ୍ରେସ ନେତ୍ରୀ ତଥା ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ କହିଥିଲେ ଯେ ୟୁପିଏ କ’ଣ ? ଏବେ ୟୁପିଏ ବୋଲି କିଛି ନାହିଁ । ଶରଦ ପାଓ୍ବାରଙ୍କୁ ୟୁପିଏ ଅଧ୍ୟକ୍ଷ କରିବା ନେଇ ଏକ ପ୍ରଶ୍ନର ଉତ୍ତରରେ ମମତା ଏପରି କଥା କହିଥିଲେ ।
ମମତାଙ୍କ ଏହି ବୟାନର ଜବାବ ରଖି କଂଗ୍ରେସ କହିଛି ଯେ, ଭାରତୀୟ ରାଜନୀତିର ବାସ୍ତବତାକୁ ସମସ୍ତେ ଜାଣିଛନ୍ତି । ଯଦି କୌଣସି ବିରୋଧୀ ଦଳ ଭାବୁଥାଏ ଯେ କଂଗ୍ରେସକୁ ସାଙ୍ଗରେ ନ ନେଇ ବିଜେପିକୁ ହରାଇ ହେବ ବୋଲି, ତେବେ ତାହା ଦିବାସ୍ବପ୍ନ ଛଡ଼ା ଆଉ କିଛି ନୁହେଁ । ତେବେ ମମତାଙ୍କ ସହ ବୈଠକ ପରେ ଶରଦ ପାଓ୍ବାର କହିଛନ୍ତି ଯେ ବିଜେପିକୁ ହରାଇବାକୁ ବିରୋଧୀ ଦଳମାନଙ୍କୁ ଏକାଠି ଆଣି ଏକ ବିକଳ୍ପ ଗଠନ କରାଯିବ ।
ଏହି ପ୍ରସଙ୍ଗରେ ବିଜେପିର ପ୍ରତିକ୍ରିୟା ବି ଆସିଛି । ବିଜେପି ଆଇଟି ସେଲ ମୁଖ୍ୟ ଅମିତ ମାଲବ୍ୟ ଟୁଇଟ କରି ଲେଖିଛନ୍ତି ଯେ ମମତା ବାନାର୍ଜୀ ୟୁପିଏକୁ ମୃତ ଘୋଷଣା କରିଦେଲେ । ଯଦି କୌଣସି ଦଳର ଆତ୍ମସମ୍ମାନ ଅଛି ତେବେ ଏପରି ଅପମାନ ପରେ ମେଣ୍ଟ ଭାଙ୍ଗିଦବା କଥା । କିନ୍ତୁ କଂଗ୍ରେସ ନିର୍ଲ୍ଲଜଭାବେ ଏମଭିଏ ମେଣ୍ଟରେ ଅଛି ।