ନୂଆଦିଲ୍ଲୀ: ପ୍ରସାଦରୁ ମିଳିଲା ପୋକ। ରବିବାର ଦିନ ଆନ୍ଧ୍ର ପ୍ରଦେଶର ଶ୍ରୀଶୈଳମ୍ ଦେବସ୍ଥାନମ୍ ମନ୍ଦିରରେ ଭକ୍ତଙ୍କୁ ମିଳିଥିବା ଲଡୁରୁ ପୋକ ବାହାରିଥିବା ଜଣାଯାଇଛି। ଜଣେ ବ୍ୟକ୍ତି ଏଭଳି ଅଭିଯୋଗ କରିଛନ୍ତି। ତାଙ୍କର ଏହି ଦାବି ପରେ ପ୍ରସାଦର ମାନକୁ ନେଇ ପ୍ରଶ୍ନ ଉଠିବା ସହ ଉତ୍ତେଜନା ଦେଖାଯାଇଛି। ଏହି ଖବର ସାମ୍ନାକୁ ଆସିବା ପରେ ଏବେ ମନ୍ଦିରର ସ୍ୱଚ୍ଛତା ରକ୍ଷଣାବେକ୍ଷଣ ଉପରେ ଚିନ୍ତା ପ୍ରକଟ ହୋଇଛି।

Advertisment

ସରସଚନ୍ଦ୍ର କେ ନାମକ ଜଣେ ଭକ୍ତ ଲଡୁରେ ମୃତ ପୋକ ଥିବାର ଏକ ଭିଡିଓ ସେୟାର କରି ମନ୍ଦିରର କାର୍ଯ୍ୟନିର୍ବାହୀ ଅଧିକାରୀଙ୍କ ନିକଟରେ ଅଭିଯୋଗ କରିଥିଲେ। ଏହି ଭିଡିଓକୁ @ତେଲୁଗୁସ୍କ୍ରାଇବ୍ ନାମକ ଜଣେ ଉପଭୋକ୍ତା ଏକ୍ସରେ ମଧ୍ୟ ସେୟାର କରିଥିଲେ।

ଗଣମାଧ୍ୟମ ରିପୋର୍ଟ ଅନୁସାରେ, ସରସଚନ୍ଦ୍ର ଏପରି ଦାବି କରିବା ପରେ, ଭକ୍ତମାନେ ପ୍ରସାଦ କାଉଣ୍ଟରରେ ଚିନ୍ତିତ ହୋଇପଡ଼ିଥିଲେ। ମନ୍ଦିର କର୍ମଚାରୀମାନେ ଲଡୁ ପ୍ରସ୍ତୁତ କରିବାରେ ଅବହେଳା କରିଥିବା ନେଇ ମନ୍ଦିରର କାର୍ଯ୍ୟନିର୍ବାହୀ ଅଧିକାରୀ ଶ୍ରୀନିବାସ ରାଓଙ୍କୁ ଲିଖିତ ଅଭିଯୋଗ କରିଥିଲେ ସରସଚନ୍ଦ୍ର।

ହେଲେ ମନ୍ଦିର ଅଧିକାରୀ ଶ୍ରୀନିବାସ ରାଓ ସରସଚନ୍ଦ୍ରଙ୍କ ଦାବିକୁ ଖଣ୍ଡନ କରି ଆଶ୍ୱାସନା ଦେଇଛନ୍ତି ଯେ, "ଲଡୁଗୁଡ଼ିକ ତିଆରି କରିବା ବେଳେ ପରିଷ୍କାର ପରିଚ୍ଛନ୍ନତା ଉପରେ ଗୁରୁତ୍ବ ଦିଆଯାଉଛି। ଏଥିରେ ପୋକ ମିଳିବାର କୌଣସି ସମ୍ଭାବନା ନାହିଁ। ସତରେ ଲଡୁରୁ ପୋକ ବାହାରିଥିଲା ନା ଜାଣିଶୁଣି ଏଭଳି କରାଯାଇଥିଲା, ତାହା ଜାଣିବା ପାଇଁ ସିସିଟିଭି ସ୍କାନ କରାଯାଉଛି।"