୭,୦୦୦ ନକଲି ଆଧାର କାର୍ଡ ତିଆରି କରିଥିବା ବ୍ୟକ୍ତି ଗିରଫ
ଇନ୍ଦୋର: ୭,୦୦୦ ନକଲି ଆଧାର କାର୍ଡ ତିଆରି କରି ଫେରାର ଥିବା ଜଣେ ବ୍ୟକ୍ତିଙ୍କୁ ମଧ୍ୟପ୍ରଦେଶ ପୁଲିସର ସାଇବର ସେଲ୍ ଶୁକ୍ରବାର ଇନ୍ଦୋରରୁ ଗିରଫ କରିଛି। ଗିରଫ ଅଭିଯୁକ୍ତ ଜଣଙ୍କୁ ପରବର୍ତ୍ତୀ କାର୍ଯ୍ୟାନୁଷ୍ଠାନ ପାଇଁ ହାଇଦ୍ରାବାଦ ପୁଲିସକୁ ହସ୍ତାନ୍ତର କରାଯାଇଛି। କିଛି ଦିନ ପୂର୍ବେ ହାଇଦ୍ରାବାଦ ପୁଲିସ ଅଭିଯୁକ୍ତର ଆଠ ଜଣ ସହଯୋଗୀଙ୍କୁ ଗିରଫ କରିଥିଲା।
Sambad is now on WhatsApp
Join and get latest news updates delivered to you via WhatsApp
ଏ ସଂପର୍କରେ ଏସପି (ସାଇବର ସେଲ) ଜିତେନ୍ଦ୍ର ସିଂ କହିଛନ୍ତି ଯେ କିଛି ଦିନ ପୂର୍ବେ ହାଇଦ୍ରାବାଦରେ ଅଭିଯୁକ୍ତ ଏବଂ ତାଙ୍କ ସହଯୋଗୀଙ୍କ ବିରୋଧରେ ଦୁଇଟି ମାମଲା ପଞ୍ଜୀକୃତ ହୋଇଥିଲା। ଏହି ମାମଲାରେ ସଂପୃକ୍ତ ଥିବା ସହରର ସୁଖଲିଆ ଅଞ୍ଚଳର ବାସିନ୍ଦା ପବନ କୋଟିଆ ନାମକ ଅଭିଯୁକ୍ତ ଫେରାର ହୋଇ ଯାଇଥିଲା। ହାଇଦ୍ରାବାଦ ପୁଲିସ ଆଠ ଜଣ ଅଭିଯୁକ୍ତଙ୍କୁ ଗିରଫ କରିଥିବାବେଳେ ପବନଙ୍କୁ ଗିରଫ କରିବା ପାଇଁ ଖୋଜାଖୋଜି ଆରମ୍ଭ କରିଥିଲା। ଏହି କ୍ରମରେ ଏକ ସୂଚନା ଆଧାରରେ ସାଇବର ସେଲ୍ ଟିମ୍ ପବନଙ୍କୁ ଅଟକ ରଖିଥିଲା।
ପଚରାଉଚରା ସମୟରେ ଅଭିଯୁକ୍ତ ତଦନ୍ତକାରୀ ଅଧିକାରୀମାନଙ୍କୁ ସୂଚନା ଦେଇଥିଲା ଯେ ସେ ଶିବପୁରୀ ଜିଲ୍ଲାରୁ ଆସିଛି ଏବଂ ଗତ କିଛି ବର୍ଷ ଧରି ସହରରେ ରହୁଛି। ୨୦୧୧ରୁ ଆଧାର କାର୍ଡ ପ୍ରସ୍ତୁତ କରିବା ପାଇଁ ସେ ଜଣେ ଅପରେଟର ଭାବରେ ନିୟୋଜିତ ହୋଇଥିଲା। ପବନ ତାର ବନ୍ଧୁ ରୋହିତ ସହ ମିଶି ୨୦୧୬ରୁ ମଧ୍ୟପ୍ରଦେଶ ଏବଂ ଆସାମରେ ଆଧାର କାର୍ଡ ପ୍ରସ୍ତୁତ କରିବା ପାଇଁ ବୈଷୟିକ ସହାୟତା ପ୍ରଦାନ କରିବା ଆରମ୍ଭ କରିଥିଲେ। ଆସାମରେ ସେମାନଙ୍କ ଦ୍ୱାରା ପ୍ରଦାନ କରାଯାଇଥିବା ବୈଷୟିକ ସହାୟତା ଆଧାରରେ ହାଇଦ୍ରାବାଦରେ ତାର ସାଙ୍ଗମାନେ ନକଲି ଆଧାର କାର୍ଡ ତିଆରି କରିବା ଆରମ୍ଭ କରିଥିଲେ।
ଏହି ଘଟଣାରେ ହାଇଦ୍ରାବାଦ ପୁଲିସ ଆଠ ଜଣ ଅଭିଯୁକ୍ତଙ୍କୁ ଗିରଫ କରିଥିଲା। ଅଭିଯୁକ୍ତମାନେ ହାଇଦ୍ରାବାଦ ପୁଲିସ ନିକଟରେ ସ୍ୱୀକାର କରିଥିଲେ ଯେ ସେମାନେ ଏପର୍ଯ୍ୟନ୍ତ ୭,୦୦୦ ନକଲି ଆଧାର କାର୍ଡ ପ୍ରସ୍ତୁତ କରିଛନ୍ତି। ହାଇଦ୍ରାବାଦ ପୁଲିସ ଦ୍ୱାରା ଗିରଫ ହେବା ପରେ ପବନ ଏବଂ ତାର ସହଯୋଗୀ ଆସାମରୁ ଇନ୍ଦୋରରେ ଆସି ପହଞ୍ଚିଥିଲେ ଏବଂ ପୁଲିସକୁ ବିଭ୍ରାନ୍ତ କରିବା ପାଇଁ କ୍ରମାଗତ ଭାବରେ ସ୍ଥାନ ବଦଳାଉ ଥିଲେ।