ଶସ୍ତାରେ ପିଆଜ ବିକ୍ରୟ କରୁଥିବା କଂଗ୍ରେସ ନେତାଙ୍କ ଆଙ୍ଗୁଠିକୁ କାମୁଡ଼ି ଦେଲେ ବିଜେପି ସମର୍ଥକ
ଡେରାଡୁନ୍: ନୈନିତାଲରେ ପିଆଜ ଦର ବୃଦ୍ଧି ବିପକ୍ଷରେ ପ୍ରତିବାଦ କରି ଶୁକ୍ରବାର ଦିନ ଶସ୍ତାରେ ପିଆଜ ବିକୁଥିବା ଜଣେ କଂଗ୍ରେସ ନେତାଙ୍କର ଆଙ୍ଗୁଠି ଟିପକୁ ଜଣେ ବିଜେପି ସମର୍ଥକ କାମୁଡ଼ି ପକାଇଛନ୍ତି ବୋଲି ଅଭିଯୋଗ ଆସିଛି।
Sambad is now on WhatsApp
Join and get latest news updates delivered to you via WhatsApp
ମନୀଷ ବିସ୍ତ୍ ନାମକ ସେ ଲୋକଟି ବିରୋଧରେ ଥାନାରେ ମାମଲା ରୁଜୁ କରାଯାଇଛି। କିନ୍ତୁ ବିଜେପି କହିଛି କି, ଦଳ ସହ ସେ ଲୋକର କୌଣସି ସମ୍ପର୍କ ନାହିଁ।
କଂଗ୍ରେସର ଜିଲ୍ଲା ସାଧାରଣ ସମ୍ପାଦକ ନନ୍ଦନ ମେହେରା କହିଛନ୍ତି: ପ୍ରତିବାଦକାରୀ ଦଳୀୟ ଲୋକଙ୍କୁ ମନୀଷ ଗାଳିଫଜିତ କରୁଥିଲେ। ସେ ଚୁପ୍ କରାଇବାକୁ ଉଦ୍ୟମ କରିବାରୁ ମନୀଷ ତାଙ୍କ ଆଙ୍ଗୁଠିକୁ କାମୁଡ଼ି ପକାଇଲେ।
ଟିପ ଛିଡ଼ି ଯିବାରୁ ରକ୍ତ ବହିଥିଲା। ଦଳର ଅନ୍ୟ ସଦସ୍ୟମାନଙ୍କ ଠାରୁ ଖବର ପାଇ ପୁଲିସ ବିସ୍ତ୍ଙ୍କୁ ଗିରଫ କରିଥିଲା।
କଂଗ୍ରେସ ସେବା ଦଳର ଉପାଧ୍ୟକ୍ଷ ରମେଶ ଗୋସ୍ୱାମୀ କହିଛନ୍ତି, ସହରର ବୁଦ୍ଧ ପାର୍କ ଅଞ୍ଚଳରେ ଦଳର ମହିଳା କର୍ମୀମାନେ କିଲୋପିଛା ୩୦ ଟଙ୍କାରେ ପିଆଜ ବିକ୍ରୟ କରୁଥିବା ବେଳେ ବିସ୍ତ୍ ଅସଭ୍ୟ ଭାଷାରେ ଗାଳିଗୁଲଜ କରିବା ସହ ଅଶୋଭନୀୟ ଆଚରଣ କରିଥିଲେ। ତେଣୁ ମେହେରା ଯାଇ ହସ୍ତକ୍ଷେପ କରିଥିଲେ।
ହଲ୍ଦ୍ଓ୍ଵାନି ଥାନାର ଏସ୍ଏଚ୍ଓ ବିକ୍ରମ ରାଠୋର କହିଛନ୍ତି: ପ୍ରାଥମିକ ତଦନ୍ତରୁ ଜଣାପଡ଼ିଛି ଯେ ବିସ୍ତ ସେତେବେଳେ ମଦ କିଂବା ନିଶା ଔଷଧ ଖାଇଥିଲେ। ଘଟଣାର ତଦନ୍ତ ଚାଲିଛି।