ମୋ ଶବନମକୁ ଡାକ...; ବିଦ୍ୟୁତ ଖୁଣ୍ଟରେ ଚଢ଼ି ଏଭଳି ନିବେଦନ କଲେ ଯୁବକ

ଗାଜିଆବାଦ: ଆପଣ ନିଶ୍ଚିତ ଭାବରେ ବଲିଉଡର ଶୋଲେ ଫିଲ୍ମକୁ ଅନେକ ଥର ଦେଖିଥିବେ। ଏଥିରେ ଥିବା ଅନେକ ଦୃଶ୍ୟ ବହୁତ ଲୋକପ୍ରିୟ ହୋଇଥିଲା। ସେ ମଧ୍ୟରୁ ଲୋକମାନେ ଅଧିକ ପସନ୍ଦ କରିଥିବା ଦୃଶ୍ୟଟି ଥିଲା 'ବୀରୁ' ଟାଙ୍କି ଉପରକୁ ଚଢ଼ିବାର ଦୃଶ୍ୟ। ଏହି ଦୃଶ୍ୟରେ ବୀରୁ ଭୂମିକାରେ ଅଭିନୟ କରିଥିବା ଧର୍ମେନ୍ଦ୍ର ଟାଙ୍କି ଉପରେ ଚଢ଼ିଥିଲେ। ତା’ପରେ ସେ ଲୋକମାନଙ୍କୁ ବସନ୍ତୀଙ୍କ ସହ ତାଙ୍କର ବିବାହ କରାଇ ଦେବାକୁ ଅନୁରୋଧ କରିଥିଲେ। ଏବେ ଗାଜିଆବାଦରେ ମଧ୍ୟ ସମାନ ଦୃଶ୍ୟ ଦେଖିବାକୁ ମିଳିଛି।

ହେଲେ ଗାଜିଆବାଦରେ ଯୁବକଜଣକ ପାଣି ଟାଙ୍କି ପରିବର୍ତ୍ତେ ବିଦ୍ୟୁତ ଖୁଣ୍ଟରେ ଚଢ଼ିଥିବା ଦେଖାଯାଇଛି। ତେବେ ସେ ବିବାହ ପାଇଁ ନୁହେଁ, ବରଂ ପତ୍ନୀଙ୍କୁ ତାଙ୍କ ବାପ ଘରୁ ଫେରାଇ ଆଣିବା ପାଇଁ ବିଦ୍ୟୁତ ଖୁଣ୍ଟରେ ଚଢ଼ି ଜିଦ୍ ଧରିଥିବା କୁହାଯାଉଛି। ଏହି ମାମଲା ଗାଜିଆବାଦର ମସୁରୀ ପୁଲିସ ଷ୍ଟେସନ ଅନ୍ତର୍ଗତ ଡାସନା ଅଞ୍ଚଳରେ ଘଟିଛି।

ମିଳିଥିବା ସୂଚନା ମୁତାବକ, ବିଦ୍ୟୁତ ଖୁଣ୍ଟରେ ଚଢ଼ିଥିବା ଯୁବକ ଶାହାଜହାଁଙ୍କ ପତ୍ନୀ ଶବନମ ଗତ ସପ୍ତାହରେ ନିଜ ବାପ ଘରକୁ ଚାଲି ଯାଇଥିଲେ। ଦୁଇ-ତିନି ଦିନ ପୂର୍ବରୁ ଯେତେବେଳେ ସେ ତାଙ୍କୁ ଫେରାଇ ଆଣିବାକୁ ଯାଇଥିଲେ, ସେତେବେଳେ ପତ୍ନୀ ତାଙ୍କ ସହିତ ଆସିବାକୁ ମନା କରିଦେଇଥିଲେ। ଏହା ଶୁଣି ସେ ଚିନ୍ତିତ ହୋଇପଡ଼ିବା ସହ ପତ୍ନୀଙ୍କ କଥା ମନେ ପଡ଼ିବାରୁ ବିଦ୍ୟୁତ ଖୁଣ୍ଟରେ ଚଢ଼ି ସେ ପତ୍ନୀଙ୍କୁ ଫେରାଇ ଆଣିବା ପାଇଁ ଲୋକଙ୍କୁ ନିବେଦନ କରିଥିଲେ।

ଖୁଣ୍ଟରେ ଚଢ଼ି ଶାହଜହାଁ କହିଥିଲେ, 'ମୋ ପତ୍ନୀ, ମୋର ଶବନମକୁ ଫେରାଇ ଆଣ। ନଚେତ୍ ମୁଁ ଏଠାରୁ ଡେଇଁପଡ଼ିବି। ଏହା ଦେଖି ସ୍ଥାନୀୟ ଲୋକେ ପୁଲିସକୁ ଖବର ଦେବାରୁ ପୁଲିସ ପତ୍ନୀଙ୍କୁ ଫେରାଇ ଆଣିବାର ପ୍ରତିଶ୍ରୁତି ଦେଇ ଶାହାଜହାଁଙ୍କୁ ତଳକୁ ଆଣିଥିଲେ ବୋଲି ଜଣାପଡ଼ିଛି।