ବ୍ରେନ୍ ଡେଡ୍ ହେବା ପରେ ମା’ଙ୍କ ଅଙ୍ଗଦାନ କରି ଦୁଇଟି ଜୀବନ ବଞ୍ଚାଇଲା ପୁଅ, ଖବର ପ୍ରସାର ପରେ ଛୁଟିଲା ପ୍ରଶଂସାର ସୁଅ
ମୁମ୍ବାଇ: ମୁମ୍ବାଇର ନାନାବତୀ ଡ଼ାକ୍ତରଖାନାରେ ଘଟିଥିବା ଏକ ଘଟଣାକୁ ନେଇ ଏବେ ଚର୍ଚ୍ଚା ଆରମ୍ଭ ହୋଇଛି । ଜଣେ ପୁଅ ତା’ ମା’ଙ୍କ ଅଙ୍ଗଦାନ କରିବା ପରେ ତା’ର ଏପରି କାମକୁ ପ୍ରଶଂସା କରିଛନ୍ତି ଲୋକେ । ନିଜ ମା’ଙ୍କୁ ଅନ୍ୟ ଶରୀରରେ ବଞ୍ଚାଇ ରଖିବା ପାଇଁ ପୁଅ ନିଜ ମା’ଙ୍କ ଲିଭର୍ ଏବଂ କିଡ଼୍ନି ଦାନ କରିଥିବା ଜଣା ପଡ଼ିଛି । ଏହି ଅଙ୍ଗଦାନ ପରେ ଦୁଇ ଜଣଙ୍କୁ ନୂଆ ଜୀବନ ମିଳିଛି ।
ସୂଚନା ମୁତାବକ, ଉଜ୍ୱଳା ସକାଳ ସମୟରେ ବସି ଚା’ ପିଉଥିବା ସମୟରେ ତଳେ ପଡ଼ି ଯାଇଥିଲେ । ଯାହା ପରେ ତାଙ୍କୁ ଡ଼ାକ୍ତରଖାନା ନିଆଯାଇଥିଲା । ଚିକିତ୍ସା କରାଯିବା ପରେ ତାଙ୍କ ବ୍ରେନ୍ ଡ଼େଡ୍ ହୋଇଯାଇଥିବା ଜଣାଇଥିଲେ ଡ଼ାକ୍ତର । ଅଙ୍ଗଦାନ କରିବା ପାଇଁ ଡ଼ାକ୍ତର ପରାମର୍ଶ ଦେବା ପରେ ଉଜ୍ୱଳାଙ୍କ ପରିବାର ପଛଘୁଞ୍ଚା ଦେଇଥିବା ବେଳେ ତାଙ୍କ ପୁଅ ଅଶ୍ୱିନ୍ କିନ୍ତୁ ମା’ଙ୍କ ଅଙ୍ଗଦାନ କରିବା ପାଇଁ ହଁ ଭରିଥିଲେ । ତାଙ୍କ ମା’ ସବୁ ବେଳେ ଅନ୍ୟମାନଙ୍କ ସାହାଯ୍ୟ କରିବାକୁ ଭଲ ପାଆନ୍ତି ।
Sambad is now on WhatsApp
Join and get latest news updates delivered to you via WhatsApp
ମରିବା ପରେ ମଧ୍ୟରେ ଯଦି ତାଙ୍କ ଅଙ୍ଗ ଦ୍ୱାରା କାହାର ଜୀବନ ବଞ୍ଚୁଛି ତେବେ ମା’ ଖୁସି ହେବେ ବୋଲି ଅଶ୍ୱିନ୍ କହିବା ପରେ ଉଜ୍ୱଳାଙ୍କ ଲିଭର ଏବଂ କିଡ଼୍ନିକୁ କଢ଼ା ଯାଇ ଅନ୍ୟ ରୋଗୀଙ୍କ ଶରୀରରେ ପ୍ରତିରୋପଣ କରାଯାଇଥିଲା । କିଡ଼୍ନିଟି ନାନାବତୀ ଡ଼ାକ୍ତରଖାନାରେ ଚିକିତ୍ସିତ ହେଉଥିବା ରୋଗୀଙ୍କ ଶରୀରରେ ପ୍ରତିରୋପଣ କରାଯାଇଥିବା ବେଳେ ଲିଭରକୁ ଗ୍ଲୋବାଲ ହସ୍ପିଟାଲରେ ଚିକିତ୍ସିତ ହେଉଥିବା ଅନ୍ୟ ଜଣେ ରୋଗୀଙ୍କ ଶରୀରରେ ପ୍ରତିରୋପଣ କରାଯାଇଥିଲା ।