ସ୍ତ୍ରୀକୁ ହତ୍ୟା କରିବା ପରେ ୪ ଦିନ ଧରି ମୃତଦେହକୁ ପାଖରେ ରଖିଲା ସ୍ୱାମୀ, ତା’ପରେ ପଡ଼ୋଶୀଙ୍କୁ କହିଲା, ପୁଲିସକୁ ଡାକ

ନୂଆଦିଲ୍ଲୀ: ପତ୍ନୀଙ୍କୁ ହତ୍ୟା କରି ମୃତଦେହକୁ ୪ଦିନ ଧରି ଘରେ ରଖିଥିବା ଅଭିଯୋଗରେ ଜଣେ ୫୫ ବର୍ଷିୟ ବ୍ୟକ୍ତିଙ୍କୁ ଗିରଫ କରାଯାଇଛି। ରିପୋର୍ଟରୁ ପ୍ରକାଶ, ଗାଜିଆବାଦ ସ୍ଥିତ ଘରୁ ଅସହ୍ୟ ଦୁର୍ଗନ୍ଧ ଆସିବା ପରେ ଘର ମାଲିକ ଭରତ ସିଂହ ତାଙ୍କ ଘର ସାମ୍ନାରେ ବସି ପତ୍ନୀଙ୍କୁ ହତ୍ୟା କରିଥିବା ନେଇ ଚିତ୍କାର କରି କହିବା ସହ ପଡ଼ୋଶୀଙ୍କୁ ପୁଲିସକୁ ଡାକିବାକୁ କହିଥିଲା।

ଗାଜିଆବାଦର ଏକ ହାଉସିଂ କଲୋନୀରେ ଥିବା ଏକ ଭଡ଼ା ଘରେ ଏହି ଘଟଣା ଘଟିଛି। ବରିଷ୍ଠ ପୁଲିସ ଅଧିକାରୀ ନରେଶ କୁମାର କହିଛନ୍ତି ଯେ ଗତକାଲି ଫ୍ଲାଟରୁ ସୁନୀତା (୫୧)ଙ୍କ ମୃତଦେହ ଉଦ୍ଧାର କରାଯାଇଥିଲା।

ପଡ଼ୋଶୀମାନେ ଆମକୁ ଜଣାଇଥିଲେ ଯେ ଭରତ ତାଙ୍କ ପତ୍ନୀ ସୁନୀତାଙ୍କୁ ଗଳା କାଟି ହତ୍ୟା କରିଛନ୍ତି। ସେଠାରେ ପହଞ୍ଚିବା ପରେ ସେମାନଙ୍କ ଘରେ ମୃତଦେହ ଦେଖିବାକୁ ମିଳିଥିଲା। ଏହି ହତ୍ୟାକାଣ୍ଡ ଅତି କମରେ ତିନି ଦିନ ତଳେ ଘଟିଥିବା ଜଣାପଡିଛି। ଆମେ ଅଭିଯୁକ୍ତଙ୍କୁ ଗିରଫ କରିଛୁ। ପଚରାଉଚରା ବେଳେ ସେ ଆମକୁ କହିଛନ୍ତି ଯେ ପାରିବାରିକ କଥାକୁ ନେଇ ଝଗଡ଼ା ବେଳେ ସେ ତାଙ୍କ ପତ୍ନୀଙ୍କୁ ହତ୍ୟା କରିଛନ୍ତି। ଆମେ ମହିଳାଙ୍କ ପରିବାର ଲୋକଙ୍କୁ ଖବର ଦେଇଛୁ ଏବଂ ମୃତଦେହକୁ ବ୍ୟବଚ୍ଛେଦ ପାଇଁ ପଠାଇଛୁ ଏବଂ ତଦନ୍ତ ଜାରି ରହିଛି।

ଘଟଣା ସଂପର୍କରେ ଜଣେ ପଡ଼ୋଶୀ କହିଛନ୍ତି ଯେ ସିଂହ ତାଙ୍କୁ କହିବା ପର୍ଯ୍ୟନ୍ତ ସେମାନେ ଅପରାଧ ବିଷୟରେ ଅବଗତ ନଥିଲେ ଯେ ସେ ତାଙ୍କ ପତ୍ନୀଙ୍କୁ ହତ୍ୟା କରିଛନ୍ତି ଏବଂ ପୁଲିସ ନିକଟରେ ଆତ୍ମସମର୍ପଣ କରିବାକୁ ଚାହୁଁଛନ୍ତି। ପୁଲିସ ପହଞ୍ଚି ମୃତଦେହ ଜବତ କରିବା ପୂର୍ବରୁ ୪/୫ ଦିନ ଧରି ତାଙ୍କ ମୃତଦେହ ଘରେ ରହିଥିଲା।

ଅନ୍ୟ ଜଣେ ପଡ଼ୋଶୀ ବର୍ଣ୍ଣନା କରିଛନ୍ତି ଯେ କିପରି ସିଂ ତାଙ୍କ ଘର ବାହାରେ ବସିଥିଲେ ଏବଂ ପ୍ରତ୍ୟେକ ପଥଚାରୀଙ୍କୁ କହିଥିଲେ ଯେ ସେ ତାଙ୍କ ପତ୍ନୀଙ୍କୁ ହତ୍ୟା କରିଛନ୍ତି! କ’ଣ ହେଲା ଆମେ ଜାଣିନାହୁଁ? ସେ ଏଠାରେ ବସି ଚିତ୍କାର କରିଥିଲେ, ‘ମୁଁ ମୋ ପତ୍ନୀଙ୍କୁ ହତ୍ୟା କରିଛି, ମୋତେ ଗିରଫ କର’! ତେଣୁ ଆମେ ପୁଲିସକୁ ଡାକିଥିଲୁ ଏବଂ ପୁଲିସ ଆସି ମୃତଦେହ ଉଦ୍ଧାର କରିଥିଲା।