ବେଙ୍ଗାଲୁରୁ: କର୍ଣ୍ଣାଟକର ହାସନ ଜିଲ୍ଲାରେ ଏକ ଆଶ୍ଚର୍ଯ୍ୟଜନକ ଘଟଣା ସାମ୍ନାକୁ ଆସିଛି । ଜିଲ୍ଲାର ବାଗିଭାଲୁ ଗାଁରେ ଜଣେ ଯୁବକ ନିଜ ଜମି ନିକଟରେ ଏକ ଅସୁସ୍ଥ କଲରାପତ୍ରିଆ ବାଘକୁ ଦେଖିବାକୁ ପାଇଥିଲେ। ଏହାପରେ ସେ କଲରାପତ୍ରିଆ ବାଘକୁ ନିଜ ଦୁଇ ଚକିଆ ଯାନରେ ଦଉଡ଼ିରେ ବାନ୍ଧି ଚିକିତ୍ସା ପାଇଁ ପ୍ରାଣୀ ଚିକିତ୍ସାଳୟକୁ ନେଇଯାଇଥିଲେ । ବାଟରେ ଲୋକମାନେ ଏହାକୁ ଦେଖି ଆଶ୍ଚର୍ଯ୍ୟ ହେବା ସହ ଘଟଣାର ଭିଡିଓ ରେକର୍ଡିଂ କରିଥିଲେ । ଭିଡିଓଟି ଏବେ ଭାଇରାଲ ହୋଇଛି ।

Advertisment

ମିଳିଥିବା ସୂଚନା ଅନୁଯାୟୀ, ୨୫ ବର୍ଷୀୟ ବେଣୁଗୋପାଳ ଓରଫ ମୁଥୁ ସକାଳେ ନିଜ ମୋଟର ସାଇକେଲରେ ନିଜ ଚାଷଜମି ଆଡ଼କୁ ଯାଉଥିଲେ। ଏହି ସମୟରେ ସେ ଜମିର ଏକ କୋଣରେ ଏକ କଲରାପତ୍ରିଆ ବାଘପଡ଼ିଥିବା ଦେଖିଥିଲେ। ବାଘଟି ଅସୁସ୍ଥ ଥିଲା ଓ ଚାଲିବାକୁ ଅକ୍ଷମ ଥିଲା । ଏହା ଦେଖି ବେଣୁଗୋପାଳ ବାଘକୁ ଧରି ନିଜ ମୋଟର ସାଇକେଲର ପଛ ସିଟରେ ଏକ  ଦଉଡ଼ି ସହାଯ୍ୟରେ ବାନ୍ଧି ଦେଇଥିଲା ଓ ପ୍ରାଣୀ ଚିକିତ୍ସାଳୟ ଅଭିମୁଖେ ଯାଇଥିଲା । ପରେ ବନ ବିଭାଗ ଅଧିକାରୀମାନେ ଏ ସଂପର୍କରେ ସୂଚନା ପାଇବା ପରେ କଲରାପତ୍ରିଆକୁ ଧରି ପ୍ରାଣୀ ଚିକିତ୍ସାକେନ୍ଦ୍ରରେ ଚିକିତ୍ସା କରାଇଥିଲେ । ବାଘର ଅବସ୍ଥା ସ୍ଥିର ଥିବା ବିଭାଗ ପକ୍ଷରୁ କୁହାଯାଇଛି । ବାଘଟି ଶିକାର ସନ୍ଧାନରେ ଆସି ଗ୍ରାମ ନିକଟରେ ଫସି ଯାଇଥିଲା ବୋଲି ବିଭାଗ ପକ୍ଷରୁ କୁହାଯାଇଛି ।